Hitinn á milli Bjarna og Keflvíkinga eykst enn

Bjarni Guðjónsson talaði um hasarinn á Akranesi eftir leik Skagans og Keflavíkur á Stöð 2 í kvöld og sagði þar frá eftirmálum leiksins og hótunum Keflvíkinga í sinn garð. Þar talaði hann hreint út en var ekki stóryrtur svosem. Skömmu eftir viðtalið kom yfirlýsing frá Keflvíkingum þar sem þeir svara fyrir sig með mjög ákveðnum hætti. Þessu umdeilda máli virðist fjarri því lokið.

Ég verð að viðurkenna að um leið og ég sá þetta mark í gærkvöldi í beinni átti ég von á að það yrði mjög umdeilt. Það verður þó held ég enn umdeildara en flestum óraði fyrir. Þetta er móment sem verður lengi í minnum haft og mun lengi verða deilt um. Það eru alls ekki allir sannfærðir um hvort Bjarni hafi gert þetta viljandi eður ei. Ég er þess fullviss að hann skoraði ekki viljandi og ég get ekki ímyndað mér að nokkur vilji gefa honum það fyrirfram að vera svo ómerkilegur í raun og veru, þó sumir tali hvasst í hita og þunga leiksins.

Fyrst og fremst er þetta auðvitað leiðindamál. Ég skil vel að Bjarna hafi sárnað hafi honum verið hótað með þeim hætti sem hann segir. Þar er þó orð gegn orði. Hinsvegar er öllum ljóst að Keflvíkingar gengu alltof langt í skapkasti sínu. Það er skiljanlegt að mönnum hafi runnið í skap við þetta en samt sem áður gekk það of langt. Það að ætla sér að veitast að Bjarna með hnefalögmálið að vopni er fyrir neðan allar hellur.

Þetta mál verður vonandi lexía fyrir einhverja. Það verður áhugavert að sjá lokaleik þeirra í sumar, en þá munu þeir hittast í Keflavík. Það verður eflaust hiti, að óbreyttu, ef Bjarni Guðjónsson mætir á svæðið, sem auðvitað allt stefnir í. Koma Bjarna til Keflavíkur verður athyglisverð. Það væri gaman að heyra í Keflvíkingum eða Skagamönnum með þetta eða fleirum, hvernig þeir líta þetta mál og sérstaklega eftirmálana.

Yfirlýsing frá Keflvíkingum

Athugasemdir

[Mummi Guð, 5.7.2007 kl. 23:05]

Hvenær og hver veittist að Bjarna með hnefalögmálið að vopni. Ef þú ert að tala um það sem sást í sjónvarpinu þá voru það Skagamenn sem hluðu með svona miklum tilþrifum til að stofna til óláta.

[Stefán Friðrik Stefánsson, 5.7.2007 kl. 23:13]

Sæll Mummi

Ég get ekkert fullyrt um þetta mál annað en ég sá í Sjónvarpinu. Það var auðvitað leiðindamórall á vellinum og það var veist að Bjarna með orðum og svona viss aðsúgur líka. Þetta er auðvitað leiðindamál. Ætla ekki að verja þetta mark, það var fyrir neðan allt en lætin voru líka fyrir neðan allt. Allt hið ömurlegasta mál. Ætla ekki að taka afstöðu með Keflvíkingum né heldur með Bjarna. Ég trúi því einfaldlega ekki að hann hafi gert þetta viljandi. En atvikið allt er auðvitað til skammar. Þetta mark er enginn yndisauki fyrir Skagann.

mbk.

[Ásdís Sigurðardóttir, 5.7.2007 kl. 23:18]

Þetta er ljótt mál og öllum til vansa.  Vona að menn hætti þessu þrasi og snúi sér að næsta leik. Held það sé best í stöðunni.

[Rögnvaldur Hreiðarsson, 5.7.2007 kl. 23:24]

Skiptir það einhverju máli hvort þetta var viljandi eður ei? Það er alþekkt í lífinu að menn biðjast afsökunar þó þeir hafi óviljandi gert á hlut annars og leitast við að leiðrétta. Geta ekki allir verið sammála því að fair play er ein glæsilegast regla sem notast er við í íþróttum. Óskrifuð og þarfnast þess eins að menn hafi sómatilfinningu. Geta menn með einhverum hætti fengið undanþágu frá þeirri reglu af því að viðbrögð þeirra sem órétti er beittir eru reiði?

Refsingar keflvíkinga ef þeir hafa sannarlega farið yfir strikið eru tryggðar. En refsingar skagamanna eru þó verri því smánarblettinn þrífa þeir ekki af sér þó Guðón segi það blákalt að gestirnir geti sálfum sér um kennt.

Hver skilur þannig málflutning?

[Magnús Þór Jónsson, 6.7.2007 kl. 00:11]

Sammála þér Rögnvaldur.

Fyrir hvern leik í Landsbankadeildinni er borinn inn á leikvöllinn fáni með áletrun:

"Háttvísi, höfum rétt við".

Það verður væntanlega hlegið að þessum fána næstu mánuðina!!!

Fair play í íslenskum fótbolta dó í gær.  Þetta hefur átt aðdraganda og ég hef rætt þessi "Fair play" atvik áður.  Eitt slíkt átti sér stað á Akureyri í 1.deild í upphafi móts, nákvæmlega eins og sást í gær í sjónvarpinu.  Þá skoraði Þór slíkt mark gegn Víkingi Ólafsvík.

Ég hef sagt nú um nokkurt skeið að öll slík atvik verða að lúta stjórn dómara.  Einfalt.  Dómari stöðvar leik og skipuleggur nýtt upphaf.

Þarna er verið að láta völd leiksins í hendur leikmanna sem geta gert afdrifarík mistök.

Svo er ég ALGERLEGA sammála þér varðandi ummæli Guðjóns, sem hafa verið hver öðrum verri í dag.

[Eyjólfur Kristinn Vilhjálmsson, 6.7.2007 kl. 00:12]

Er ekki alveg að sjá að þetta hafi verið óvart, eftir að hafa horft nokkrum sinnum á upptökuna af þessu, maðurinn lítur upp, sér að markvörðurinn er vel framarlega og spyrnir boltanum í markið, þetta er ekkert flóknara en það.  Varðandi framkomu Keflvíkinga þá er í sjálfu sér ekker hægt að afsaka hana, en vel skiljanlegt að menn æsist pínu þegar svona kemur upp.

[H, 6.7.2007 kl. 00:30]

Það er alveg greinilegt að Bjarni horfir ekki einu sinni á eftir boltanum þegar hann hefur sparkað honum í átt að endalínu ! Þetta sést EF þið viljið sjá það á upptökum , ef hann hefði viljað skora og ætlað hefði hann eins og allir aðrir fótboltamenn horft á eftir skoti sínu alla leið ! En NEI það gerir hann ekki og um leið og boltinn lendir í markinu og hann sér það grípur hann um höfuð sér og Keflavíkurliðið tapar sér !

Verið ekki að þessu bulli ! sérstaklega þú Rögnvaldur um allar trissur ! Keflvíkingum á  að refsa harðlega fyrir þessa framkomu sína innan sem utan vallar og aganefnd Ksí á að gera fordæmi úr þessum skrípaleik Keflvíkavíkurliðsins og taka hart á þeim !

Bjarni hefði ekki þurft lögreglufylgd heim ef Keflavíkurliðið hefði ekkert gert af sér ! 

[Elín Katrín Rúnarsdóttir. , 6.7.2007 kl. 01:31]

Ég verð að viðurkenna að ég les aldrei íþróttasíðurnar og hef takmarkaðan áhuga á fótbolta....huhmm....engan En ég þykist samt oft, þegar það á við og held með Liverpool og KR...afþví að pabbi gerir það

Takk fyrir að vera bloggvinur minn

[S. Lúther Gestsson, 6.7.2007 kl. 01:58]

Því miður get ég ekkert annað séð í stöðunni en KSÍ dæmi Keflavík í heimleikjabann, einnig ættu þeir að dæma einhverja leikmenn í leikbann.

Það er því miður ekkert annað í stöðunni fyrir KSÍ, leikmenn og þjálfari liðsins eru ennþá að bera rógburð um Bjarna og Guðjón, þeir hafa ekki ennþá beðist afsökunar hvorki leikmenn né áhorfendur.

Auðvitað verður hitinn mikill í þessari stöðu sem kom upp á vellinum og það er að mínu viti ekkert endilega óeðlilegt.

Ég hef sjálfur orðið fyrir því að ráðast á móti mótherja mínum í leik og varð liði mínu til skammar og átti ekkert með að bera merki félags míns á brjósti treyju minnar.

Eftir leik gekk ég af bekknum og bað dómara leiksins og mótherja mína afsökunnar með handabandi.

[S. Lúther Gestsson, 6.7.2007 kl. 02:02]

Horfiði á yfirlýsingu stjórnar Keflavíkur á heimasíðu þeirra, gott fólk þetta er ekkert eðlilegt.

Lúther

[Gísli Sigurðsson, 6.7.2007 kl. 08:22]

Það sem Lúther segir er nákvæmlega það sem ég benti á í gær, að eina refsingin sem gæti komið út úr þessu leiðindamáli væri að upphaflega fórnarlambinu verði refsað. Það er ekkert sem bannar það sem Bjarni gerði nema sómatilfinning forystumanna viðkomandi félags/liðs og hún er ekki til staðar. En segið mér hvað gerðist inni á vellinum eftir þetta, var einhver laminn? nei, var einhver tuskaður til? nei, var einhver skammaður? já alveg örugglega.

Guðjón er náttúrulega snillingur í að stjórna umræðunni og stýra henni frá upphaflega málinu. Er það ekki kallað smjörkípuaðferðin. 

[Jón Sigurgeirsson , 6.7.2007 kl. 08:34]

Ekki ætla ég að hafa skoðun á þessu máli í sjálfu sér. Mér er svo sem sama en tel atvikið lítt til sóma þeim sem komu að því - Ungmannafélags og íþróttaandinn horfinn. Baráttan er hörð - ekki aðeins tilfinningar heldur atvinnuframtíð og peningar í húfi.

Það sem mér fannst athyglisvert var gúrkutíðarandinn í umfjöllun Helga og það hitt að hann dróg í viðtal menn sem voru í sama liði og þeir látir velta sér upp úr atvikinu fram og til baka án þess að hinir hefðu þar talsmann nema í smá viðtali í byrjun.

Gúrkutíð af því að þessi íþróttafrétt var dregin inn í Kastljósið og sömu spurnningar spurðar aftur og aftur til að fá sömu svörin. Lopinn teygður í það óendalega.

Ég tek hins vegar undir þá ósk þína Stefán að málið verði lexí fyrir þá sem að því standa - en fyrsta skrefið i þessum bata eins og örðum er að viðurkenna.

[Gísli Bergsveinn Ívarsson, 6.7.2007 kl. 11:01]

Þetta er orðið eins og sandkassaleikur.

[Stefán Friðrik Stefánsson, 6.7.2007 kl. 15:54]

Takk kærlega fyrir öll kommentin og hugleiðingarnar.

Gott að vera bloggvinur þinn sömuleiðis Ella.