Barack Obama kjörinn forseti Bandaríkjanna

Þá hefur Barack Obama formlega verið kjörinn 44. forseti Bandaríkjanna og markað pólitísk þáttaskil í bandarískri stjórnmálasögu með því að verða fyrsti þeldökki forsetinn. Þegar blökkumannaleiðtoginn dr. Martin Luther King lést fyrir fjórum áratugum átti hann sér draum um samfélag þar sem litaraft skipti ekki máli og þeldökkir hefðu sömu tækifæri í lífinu og hvítir. Sú barátta kostaði hann lífið. Á þessum sögulega degi í bandarískum stjórnmálum hefur Barack Obama látið drauma baráttumannsins frá Atlanta rætast. Þetta eru söguleg tímamót.

Fyrir aðeins átta til tíu árum hefði engum órað fyrir því að fyrir lok fyrsta áratugar 21. aldarinnar myndi þeldökkur forsetaframbjóðandi ná alla leið í forkosningaferli stóru flokkanna, hljóta atkvæði hvítra kjósenda um gervöll Bandaríkin og sverja embættiseið sem valdamesti maður heims. Með sigri Obama á John McCain í þessum forsetakosningum er ritaður nýr kafli í pólitíska sögu Bandaríkjanna.

Ekki einu sinni dr. King hefði látið sér detta í hug þegar að hann talaði um draumsýn sína í Washington á sjöunda áratugnum að það gæti gerst í upphafi nýrrar aldar. Flestir áttu eflaust von á að sú barátta tæki lengri tíma að blökkumaður ætti raunhæfa möguleika á Hvíta húsinu, þó að handritshöfundar hafi gert blökkumanninn Palmer að forseta í hasarþáttunum 24 í upphafi áratugarins. Eðlilegt er að þeldökkir Bandaríkjamenn fagni þessum tímamótasigri í kvöld.

Barack Obama hefur rakað að sér stuðningi síðustu mánuði úr öllum áttum. Hann er fersk pólitísk stjarna. Hann kom, sá og sigraði á flokksþingi Demókrataflokksins í Boston í júlí 2004 með glæsilegri ræðu. Gleymi þeirri ræðu aldrei, enda var hún að mínu mati stærstu tíðindi þess þings, þvílík stjörnuframmistaða. Allir fundu fyrir því að þar fór sannkölluð vonarstjarna. Hann er ekki bara stjórnmálamaður, hann er einstakur pólitískur predikari sem nær til fólks og hefur áhrif á það.

Eðlilega finnst mörgum demókrötum Barack Obama vera ferskur valkostur, unglegur og heillandi, og hugsa ósjálfrátt til Kennedys forseta, sem heillaði bandarísku þjóðina fyrir hálfri öld er hann hóf forsetaframboð sitt og naut mikils stuðnings allt þar til að öllu lauk svo snögglega er hann féll fyrir morðingjahendi í Dallas á nöprum föstudegi sem markaði mikil þáttaskil í bandarískum stjórnmálum.

Frá fyrsta degi hafa söguleg skref verið mörkuð í þessari kosningabaráttu. Þeirra stærst er að draumur dr. Martins Luthers Kings í hinni sögulegu baráttu fyrir sjálfsögðum mannréttindum þeldökkra á umbrotatímum á sjöunda áratugnum hefur ræst.

Sannað er að litaraft skiptir ekki lengur máli, allir hafa jöfn tækifæri til að láta að sér kveða og það sem meira er að með því er staðfest að blökkumaður getur orðið valdamesti maður heims.

Obama kjörinn forseti

Athugasemdir

[Óskar Örn Arnarson (IP-tala skráð) 5.11.2008 kl. 04:39]

Þetta er svo sannarlega söguleg stund. Obama, ef þú skyldir lesa þetta. Congratulations on presidency and i hope you are very good president

[Nína S (IP-tala skráð) 5.11.2008 kl. 09:07]

Já, draumar rætast. Það er frábært að þessi glæsilegi maður verði næsti forseti Bandaríkjanna. Vissulega á hann erfitt verk fyrir höndum að hreinsa til eftir Bush stjórnina og takast á við efnahagsmálin með öllu tilheyrandi. En hann hrífur fólk með sér. Í öllum fréttum af honum hef ég aldrei pælt í litarhætti hans, finnst bara sjálfsagt að persóna eins og Obama (miðað við J McCain) sigri. Hann er sigurvegari, hagar sér eins og sigurvegari og sigraði að lokum baráttuna um forsetastólinn. Óska honum alls hins besta. Og ég held að konan hans verði virkur þátttakandi  með honum, sem er bara gott mál. Draumur Kings hefur rætst. Látum okkar drauma um breytt stjórnskipulag og lagagerðir rætast hér líka.