Hvað varð um gegnsæið Steingrímur?

Leynd og pukur eru að verða einkennismerki vinstristjórnarinnar við völd. Nú segir Steingrímur að klára verði Icesave af ótilgreindum ástæðum. Ekki eigi að segja þjóðinni allan sannleikann. Hvað hefði verið sagt ef forystumenn Sjálfstæðisflokksins hefðu látið svona orð falla?

Þetta eru algjörlega óásættanleg vinnubrögð. Þó Steingrímur hafi sætt sig við að vera barinn af Bretum og Hollendingum er óþarfi að dæma þau örlög yfir alla þjóðina.

Allt upp á borðið, strax! Er ekki kominn tími til að Jóhanna og Steingrímur leiti að gegnsæinu sem þau lofuðu þjóðinni þegar þau tóku við völdum fyrir tæpu ári.

Verður að klára Icesave af ótilgreindum ástæðum

Aumingjaskapur og hugleysi vinstristjórnarinnar

Æ fleiri nýjar upplýsingar bætast við sem vekja spurningar hvers vegna íslenska vinstristjórnin er að beygja sig undir ægivald Breta og Hollendinga. Hugleysið og aumingjaskapurinn er algjör. EKki er einu sinni reynt að berjast, taka slaginn við stjórnvöld sem hafa barið okkur í duftið. Undirlægjuhátturinn virðist til þess eins að reyna að halda dyrunum til Evrópusambandsins opnum.

Ummæli Wouter Bos og Alistair Darling eru þess eðlis að við verðum að taka málið upp aftur - fara aftur í viðræður eða einfaldlega segja nei við þessu boði. Íslendingar eiga ekki að sætta sig við hvað sem er þegar fjármálaráðherrar Breta og Hollendinga hafa sjálfir látið falla ummæli sem viðurkenna að réttur okkar er til staðar í málinu.

Og hvað gerir og segir fjármálaráðherra Íslands? Jú þetta er svo erfitt og við eigum ekki að láta á þetta reyna... aumt er það. Hann er að verða eins og hornkarl úr gömlum þjóðsögum. Raunalegur og mæddur karl. Ætli menn hafi ekki verið nefndir gunga og drusla af minna tilefni.

Vill að ráðherrar ræði við Breta og Hollendinga

Hvar er umburðarlyndið og kærleikurinn?

Að mínu mati á umburðarlyndi og kærleikur að vera leiðarstef kristinnar trúar. Hana á að boða bæði í orði, og mun frekar þó, í verki. Hví er það óeðlilegt á árinu 2009 að samkynhneigðir söngvarar komi fram í jólaskemmtun? Í ljósi þess að fjölmörgum gestum hefur verið boðið til að syngja með kór Fíladelfíu er eðlilegt að velta fyrir sér hvort það skipti máli hver kynhneigð söngvarans er. Á þetta ekki að vera notaleg og hugljúf stemmning þar sem tónlistin leikur aðalhlutverkið?

Vissulega er hægt að hafa ólíkar skoðanir á einkalífi fólks - í þeim efnum gildir þó að hver og einn ræður sínu lífi. Við eigum að virða frelsi fólks til að hafa skoðanir og móta líf sitt sjálft. Forræðishyggja í þeim efnum boðar aldrei gott, heldur ekki öfgar og einstrengingsháttur.

Því finnst mér leitt að við séum ekki komin lengra en þetta - að tekist sé á um hvort söngvarinn sé gagn- eða samkynhneigður. Þetta rýrir aðeins þessa jólaskemmtun, enda hef ég talið hingað til að sú skemmtun sé kærleiksrík samkoma þar sem gleðin nýtur sín.

Svo má deila um hvort þessi mótmæli séu rétt skilaboð á móti þeirri ákvörðun að vísa Friðriki Ómari og öðrum vinsælum samkynhneigðum söngvurum á dyr. Hver og einn verður að hafa sína skoðun.

En það er leitt að trúin snúist ekki um umburðarlyndi og kærleika heldur öfgar - slíkt boðar aldrei gott.

Samkynhneigðir kyssast í Fíladelfíu

Einar steypir Óskari af stóli hjá Framsókn

Ósigur Óskars Bergssonar í leiðtogakjöri Framsóknarflokksins í Reykjavík eru mikil pólitísk tíðindi. Bæði er munurinn milli hans og Einars Skúlasonar talsverður og Óskari er steypt af stóli með frekar kuldalegum hætti. Krafan um breytingar er augljós - einnig að ný forysta flokksins á landsvísu hefur beitt sér fyrir því að steypa Óskari af stóli.

Skilaboðin eru skýr. Framsókn ætlar sér að koma með nýja ásýnd til leiks í kosningunum í vor - ætlar sér að sækja fylgi út á ný vinnubrögð og taka hressilega til. Út á við eru úrslitin á þá leið að spillingarstimpillinn sé á bak og burt.

Stóra spurningin er hvaða áhrif þetta hafi á meirihlutann í Reykjavík sem hefur staðið og fallið með traustu samstarfi Hönnu Birnu og Óskars. Meirihlutinn er í undarlegri stöðu með leiðtoga sem hefur verið sparkað með auðmýkjandi hætti.

Óskari er jú hent út úr forystu innan eigin flokks, en þarf að leiða mál næsta hálfa árið. Reyndar má benda á að Óskar hefur aldrei verið kjörinn leiðtogi - varð í þriðja sæti í prófkjöri 2006, en færðist upp þegar Anna Kristinsdóttir hætti.

En þetta breytir miklu í borgarmálunum. Kosningarnar í vor verða spennandi og áhugaverðar - löngu ljóst að þær verða uppgjör á þessu umbrotatímabili þar sem stöðugleikinn varð enginn þar til Hanna Birna varð borgarstjóri.

Einar sigraði Óskar

Saga Maríu - vönduð bók um slysið í Héðinsfirði

Oft er sagt að ekki verði feigum forðað né ófeigum í hel komið. Saga Maríu Jóhannsdóttur, sem á líf sitt að þakka því að hafa ekki getað borgað flugferð norður í land fyrir 62 árum, er gott dæmi um það. Röð tilviljana björguðu henni frá því að farast í flugslysinu í Héðinsfirði. Þetta er merkileg saga og ég vissi ekki um hana fyrr en bókin um flugslysið kom út. Þetta er ein af þessum hvunndagssögum sem vekja alltaf athygli.

Ég vil hrósa Margréti Þóru Þórsdóttur fyrir góða bók um flugslysið í Héðinsfirði. Las hana með miklum áhuga fyrir nokkrum dögum. Eins og Margrétar er von og vísa er bókin vel rituð og yfirgripsmikil samantekt um þennan dapurlega atburð. Hvet alla til að kaupa sér bókina og lesa hana fyrir þessi jól.

Ennfremur er ástæða til að gleðjast yfir því að fréttirnar á N4 séu komnar inn í Moggafréttirnar og fréttaumfjöllun á Skjá einum. Allir fundu illilega fyrir því hér þegar N4 stoppaði í ársbyrjun - mikilvægt að það sé komið allt í fullan gang þar aftur. Megi stöðin eflast og dafna.

Flaug yfir slysstaðinn

Samfylkingin fer í hringi varðandi kostnað

Mér finnst spuni Samfylkingarinnar gegn Daniel Gros meira en lítið skondinn í ljósi þess að Samfylkingin ber ábyrgð á því fluttur var inn seðlabankastjóri frá Noregi fyrr á þessu ári. Ég veit ekki betur en greiddur hafi verið margvíslegur kostnaður vegna þess, uppihald hans og húsnæði hérlendis auk ýmissa hlunninda.

Vilji menn láta taka sig alvarlega og fara af stað með svona spuna er lágmark að þeir muni eftir norska seðlabankastjóranum og kostnaði vegna hans. Enda er augljóst að þetta er spuni gegn málflutningi Gros gegn Icesave en hann átti gott innlegg þar í vikunni.

Gros kostar Seðlabanka 5 milljónir á ári

Engin pólitísk forysta fyrir ESB-aðildarumsókn

Raunalegt er að fylgjast með ríkisstjórninni í málum tengdum ESB-aðildarumsókn Íslands. Engin pólitísk forysta er til staðar við að leiða umsóknina og óeining stjórnarflokkanna öllum ljós. Jón Bjarnason gerir gott í því að tala hreint út, fræða útlendinga um að íslenska þjóðin er andvíg aðild í auknu mæli og ríkisstjórnin sé sundruð við að leiða málið.

Þetta eru staðreyndir sem eru orðnar vel kunnar á heimavelli en eru sífellt betur að ná eyrum Brusselvaldsins. Jón Bjarnason og Össur Skarphéðinsson hafa í ferðalögum sínum að undanförnu staðfest vel hversu umdeild aðildarumsóknin er. Eðlilegt er að þeir sem eiga að halda utan um ferlið velti fyrir sér hvort sé pólitískt kapítal á bakvið hana.

Óðagot Össurar hefur reyndar vakið spurningar um trúverðugleika hans sem utanríkisráðherra. Æ betur sést hversu Samfylkingin hefur veika stöðu með umsóknina. Þeim tókst að koma henni í gegn en virðast strandaðir í ferlinu. Nú hefur viðræðum verið seinkað. Ekkert gerist fyrr en í fyrsta lagi í mars og alls óvíst hversu hratt verði farið.

Raunalegt verður það fyrir Samfylkinguna ef málið verður varla komið á rekspöl á ársafmæli umsóknarinnar í júlí 2010. En svona fer oft fyrir þeim sem ætla að flýta sér of mikið og hafa ekki hugsað fleiri en einn leik í stöðunni.

Betur sett utan ESB

Brown valtar yfir Jóhönnu - ósýnileg forysta

Breski tuddinn Gordon Brown valtar yfir Jóhönnu Sigurðardóttur í stuttu og snubbóttu svarbréfi við þriggja mánaða gömlum skrifum íslenska forsætisráðherrans. Hann virðir ekki fundarboð Jóhönnu viðlits frekar en Hollendingurinn Balkanende. Þeir einfaldlega koma fram við Jóhönnu eins og hún sé undirlægja eða góðmannleg rola.

Íslensk stjórnvöld hafa síðustu mánuði komið þessum mönnum upp á lagið með að sparka í sig og koma fram við sig eins og aumingja. Þetta er raunaleg staða, en samt algjört sjálfskaparvíti íslenskra stjórnvalda. Þeir stóðu ekki í lappirnar þegar eftir hrun.

Jóhanna Sigurðardóttir spilaði sig reyndar eins og kjána í dag þegar hún varði 42 mínútna þátttöku sína í þingumræðum um Icesave með því að hennar tími væri ekki kominn í umræðunni. Þvílíkt orðaval manneskju sem leiðir ríkisstjórn Íslands.

Tími hennar er bæði kominn og farinn. Hún er ekki leiðtogi, hefur ekki höndlað verkefnið eftir hrun. Verkstjórn hennar hefur verið ósýnileg og lánlaus.

Brown álítur Icesave bindandi

Mun jólaveltan bjarga Bónusfeðgum?

Skrípabankinn með gríska nafnið, sem þó meikar sens sem AriJón, virðist ætla að gefa Bónusfeðgum feitustu jólagjöfina þetta árið, eitt stykki verslunarveldi á silfurfati til manna sem eiga ekkert nema skuldir - með því að leyfa þeim að leggja fram fyrstu greiðslu með jólaversluninni.

Merkilegur díll, en lýsandi dæmi um vinnuferlið í þessari bankastofnun, þar sem ekkert hefur breyst þrátt fyrir hrun, mótmæli og stjórnarskipti.

Sorglega sjúkur andskoti. Nú þarf þjóðin að fara að hugsa sitt ráð.

Segja ákvörðun Arion ráðgátu

Nýtt nafn = sami banki og sömu vinnubrögðin

Augljóst er að Arion banki ætlar sér að afskrifa tugmilljarða skuldir Bónusfeðga. Þeir njóta víst svo mikils trausts þó þeir eigi ekkert nema skuldir þessir menn. Djöfuls skömm er þetta! Þetta eru víst allar breytingarnar sem sumir hafa státað sig af síðustu mánuði. Sukkið hjá vinstristjórninni og siðleysið í bankakerfinu er algjört. Ekkert hefur breyst. Við lifum enn í firrtu samfélagi.

Eðlilegt er að spyrja sig hvaða hagsmunir ráði því að stórskuldugum mönnum er einum treyst fyrir því að byggja upp á þeim brunarústum sem þeir skilja eftir sig út um allt. Hver er á bakvið það rugl að fela þessum mönnum fyrirtækin aftur sem þeir hafa rústað sjálfir, steypt í skuldir og óreiðu. Þetta eru skrítin vinnubrögð, en ömurleg innsýn inn í siðlaust bankakerfi sem er enn eins.

Fyrir nokkrum dögum var Kaupþing aflagt og tekið upp nafnið Arion. Gjörsamlega mislukkuð extreme makeover tilraun - ekki einu sinni hægt að velja almennilegt nafn. Er verið að reyna að opna útrásarlínurnar aftur með þessu?

Hver er tilgangurinn með þessu nafni. Ekki er þetta traust íslenskt nafn sem var valið. Átti þessi banki ekki að vera á innanlandsmarkaði? Ekki hljómar það sannfærandi. Ekkert við þessa breytingu er sannfærandi.

Nýtt nafn = sami banki og sömu sukkuðu vinnubrögðin. Tíðindi dagsins staðfesta það, hafi einhver verið í vafa sem ég efast um.

Hlutur í Högum ekki til sölu

Jóhanna sendir eitraða pillu til Svandísar

Jóhanna Sigurðardóttir, forsætisráðherrann sem þurfti að sjá spurningar unglinga fyrirfram svo hún gæti svarað þeim "rétt", er loksins að þora að taka af skarið í málum Suðvesturlínu eftir margra vikna japl, jaml og fuður vinstri grænna og sólóspil Svandísar Svavarsdóttur.

Hvers vegna er svona yfirlýsing ekki löngu komin frá forsætisráðherra í ríkisstjórn á þeim tímum þegar mikilvægt er að byggja upp en ekki brjóta niður? Æ ofan í æ hefur jú verið ráðist að uppbyggingu sem þorri íbúa á Suðurnesjum vill.

Gott er að Jóhanna taki af skarið í einhverjum málum og sýni fólki að það sé einhver við völd í þessu landi og vilji uppbyggingu en sé ekki einbeitt í niðurrifsstarfsemi. Mikið var að einhver vaknaði. Hvaða ráðgjafi ætli hafi loksins sagt henni þetta?

Fyndnast af öllu er að sjá að einn liður Samfylkingarinnar í dag er að læra á facebook. Til að ná til unga fólksins! Hvernig væri nú að Samfylkingin reyndi að ná til þjóðarinnar og færi að hugsa um eitthvað annað en ESB.

En ætli þetta þýði kannski að Jóhanna verði mætt á facebook fljótlega?

Hindrunum rutt úr vegi Suðvesturlínu

Baugsmyndbandið fjarlægt af YouTube

Búið er að fjarlægja Baugsmyndbandið úr partýinu í Mónakó 2007 af YouTube. Augljóslega hefur einhver kippt í spotta til að reyna að stoppa klippuna og koma henni úr umferð, þó auðvitað sé það gert undir yfirskini þess að um annað sé að ræða.

Þessi klippa var vægast sagt vandræðaleg, bæði fyrir Baugsfeðgana og fleiri sem þar komu fram, voru ferðalangar í þessu vandræðalegu gleðivímu, sem er eflaust í suddalegri þynnkuvímu núna.

Þeir eiga hinsvegar hrós skilið sem komu þessari klippu á YouTube - vöktu máls á þessu vandræðalega partýi og færðu okkur innsýn inn í þessa ömurlegu fortíð.

Snýst um lítinn bút í Baugs myndbandinu

2007-sukkið vemmulega hjá Baugi

Manni langar helst til að æla við að horfa á vemmulegu klippuna af partýi Baugs í Mónakó anno 2007 - bruðlið og sukkið er svo yfirgengilega sjúklegt. Þvílík tegund af steik sem þetta lið var. Algjör vibbi - ekkert annað hægt að segja!

Stuð með Baugi í Mónakó

Jón Gnarr veltir pólitíkinni upp úr gríninu

Jón Gnarr er snillingur í að finna húmorinn í öllu hinu mannlega. Nýjasta útspilið er það fyndnasta langa lengi - að gera nett grín að stjórnmálunum hérna heima, sem eru eins og absúrd rugl, með því að draga það upp úr háðinu.

Jón má eiga það að hann að gera grín að öllu ruglinu með því að sáldra yfir það gríninu. Vel gert hjá honum!

Jón Gnarr í framboð

Balkenende niðurlægir Jóhönnu

Mér þykir Jan Peter Balkenende, forsætisráðherra Hollands, niðurlægja Jóhönnu Sigurðardóttur með svari sínu. Bæði kemur það mörgum mánuðum eftir að bréf var sent til hans með boði um fund eða viðræður milli þeirra og auk þess virðist Hollendingurinn tala við Jóhönnu eins og hún sé algjör api. Ekki ber mikið á virðingu í samskiptunum.

Kannski ekki furða, þegar íslenski forsætisráðherrann og ríkisstjórn hennar hefur samið herfilega af sér - rétt Hollendingum auðveldan sigur í milliríkjadeilu. Hún hefur ekki staðið vörð um íslenska hagsmuni og Hollendingurinn gengur á lagið.

Þvílík niðurlæging fyrir Ísland.

Svarbréf Balkenende til Jóhönnu birt

Arnþrúður rekur Guðmund af Útvarpi Sögu

Held að Arnþrúður Karlsdóttir geri mikil mistök með því að reka Guðmund Ólafsson af Útvarpi Sögu. Hann hefur skarpa sýn á pólitík og helstu lykilmál. Ég hef ekki alltaf verið sammála honum en haft gaman af að hlusta á þætti hans og Sigurðar G, spjall þeirra um þjóðmálin.

Enda er það ekki alltaf skilyrði að vera sammála öllum skrifum eða skoðunum sem eru í gangi. Slíkt yrði fljótt leiðinlegt, enda verða allir að hlusta á aðrar skoðanir til að hafa víða sýn yfir þjóðmálin.

Sú var tíðin að ég hlustaði eitt sinn nokkuð á Útvarp Sögu, en hef misst áhugann á henni í seinni tíð. Einna helst hlustað á þennan þátt hafi ég ákveðið að hlusta á stöðina.

Kverúlantabragurinn á sumum þáttum Útvarps Sögu er jafnan þannig að það er freistandi að gleyma tíðninni eða fara annað.

Guðmundur rekinn af Útvarpi Sögu

Lélegur Marteinn á kjörtíma í sjónvarpi

Gamanþátturinn Marteinn, sem er sýndur á kjörtíma í sjónvarpi á föstudagskvöldi er því miður óttalegt flopp. Horfði á þáttinn fyrir viku og fannst hann hundleiðinlegur og gaf honum aftur séns í kvöld - mikil mistök.

Er til of mikils mælst að búa til íslenskan gamanþátt í íslenskum veruleika en ekki eftiröpun á frægum bandarískum þáttum eða svo yfirborðskennda að þeir drukkna í klisjunum?

Svo finnst mér hláturinn á milli atriða óttalega leiðinleg viðbót og glamursleg. Hversvegna þurfum við að búa til íslenskt sitcom sem apar upp allt hið bandaríska?

Held að sjónvarpsáhorfendur eigi skilið betri leikið efni, sem er ekki yfirborðslegt og klisjulegt - alvöru íslenskan veruleika.

Ingibjörg Sólrún sparkar í Jóhönnu og Össur

Yfirlýsing Ingibjargar Sólrúnar Gísladóttur um að íslenska þjóðin semji eins og sakamaður um Icesave hljómar eins og almenn skynsemi um afleitan samning - líka spark í Jóhönnu og Össur sem hafa borið samning Svavars Gestssonar og vinstri græna í gegnum þingflokk Samfylkingarinnar og lögðu pólitískt kapítal sitt undir með Steingrími J.

Fram til þessa hefur þingflokkur Samfylkingarinnar verið eins og einn maður í því að styðja þennan samning - varla heyrst þar múkk í aðra átt en þá að Íslendingum beri að standa undir þessum skuldum óreiðumanna. Hagsmunir Íslands vigta ekki þar. Ingibjörg Sólrún á hrós skilið fyrir að tala af skynsemi um þennan afleita samning.

Hitt er svo annað mál að þessi áfellisdómur yfir samningi Svavars Gestssonar frá Ingibjörgu Sólrúnu eru mikil pólitísk skilaboð innan úr Samfylkingunni og gefur eflaust til kynna þá innri baráttu sem framundan er þar þegar Jóhanna hættir, sem gerist fljótlega enda hefur hún veikst mjög í sessi og fer ekki aftur í kosningar.

Enda var Jóhanna alltaf uppfyllingarefni þar, valin til að koma Samfylkingunni gegnum síðustu kosningar, en er búin að missa þá stöðu á örfáum mánuðum.

Ingibjörg Sólrún: Komum fram eins og sá seki

Sjálfstæðisflokkurinn á Akureyri ákveður prófkjör

Fulltrúaráð Sjálfstæðisflokksins á Akureyri ákvað í kvöld að efna til prófkjörs til að velja á framboðslista fyrir sveitarstjórnarkosningarnar í maí á næsta ári. Kjörnefnd flokksins lagði fram tillögu um uppstillingu á fundinum en hún hlaut ekki hljómgrunn. Sigurður J. Sigurðsson, fyrrum leiðtogi flokksins í bæjarmálunum, lagði fram tillögu um prófkjör sem mótvægi við hana og hlaut hún góðan stuðning á fundinum.

Ég fagna því að Sjálfstæðisflokkurinn á Akureyri ákveði prófkjör. Annað hefði verið ótækt með öllu - afleit skilaboð eftir gjörningaveður síðustu mánaða í landsmálum. Fólk kallar eftir uppstokkun og breytingum. Þeir sem fyrir eru á fleti verða að sækja sér endurnýjað umboð vilji þeir halda áfram. Reyndar var þessi tillaga kjörnefndar stórundarleg því leiðtogi kjörinn í prófkjöri 2006, Kristján Þór Júlíusson, ætlar að hætta og annar bæjarfulltrúi til, Hjalti Jón Sveinsson, lýst því einnig yfir.

Í einu orði sagt var ég undrandi á skilaboðum frá kjörnefnd og fannst tillagan í engu samræmi við tíðarandann og stöðuna. Enda var ekki hljómgrunnur fyrir henni - engin rök sem héldu henni á floti. Enda er nauðsynlegt að stokka upp hópinn, virkja nýtt fólk til starfa og taka til hendinni. Þeir sem vilja taka þátt fara þá bara í framboð og flokksmenn taka svo ákvörðunina um hvað gerist.

Hvað varð um opnu og gegnsæju stjórnsýsluna?

Vinstrimenn hafa um árabil talað fjálglega um mikilvægi opinnar og gegnsærrar stjórnsýslu. Eftir tæpt ár sést árangur vinstristjórnar í ráðningum í stjórnkerfinu án auglýsingar, þar sem búið er að raða 42 starfsmönnum á garðann, flokksgæðingum í flestum tilfellum. Vinstrimenn hafa fallið á prófinu, hafa ekki iðkað það sem þeir hafa talað um árum saman. Þeir hafa verið gripnir í bólinu, eru ekkert betri en þeir sem gagnrýndir voru áður.

Þarf þetta að koma einhverjum á óvart? En hvernig stendur á því að forsætisráðherrann Jóhanna Sigurðardóttir sem margoft hefur flutt predikanir um opin og gegnsæ vinnubrögð, auk fleiri ráðherra vinstrimanna snýst í hring þegar komið er í valdastóla og byrjar að gera eitthvað allt annað en áður var sagt?

Er það kannski svo að valdið spillir og þetta fólk er ekki merkilegra en svo að það gleymir öllu sem áður var sagt?

Gagnrýna ráðningar án auglýsinga