Valdapólitíkin heldur líminu í vinstristjórninni

Augljóst er að mjög hefur gengið á pólitískt kapítal vinstristjórnarinnar í dag eftir afsögn Ögmundar Jónassonar. Jóhanna og Steingrímur voru mjög þreytuleg í kvöld - mikið hefur gengið á. Samstarfið heldur enn en augljóst að límið er farið að gefa sig mjög - undirstöðurnar gliðna. Aðeins virðist valdapólitíkin lifa eftir sem lím á milli Samfylkingarinnar og VG og sumpart óttinn við að eftirmæli stjórnarinnar verði glundroði vinstrimanna á örlagastundu.

Vandræðagangurinn er samt algjör. Aldrei hefur verið full samstaða innan vinstristjórnarinnar með Icesave - samið var í júní án þingmeirihluta og sumarið fór í að klára það mál. Þar þurfti að friða alla vinstri græna og lægja öldur í ólgunni. Ögmundur lék þar lykilhlutverk. Hann hefur nú tekið hatt sinn og staf - sættir sig ekki við næstu skref og lætur ekki beygja sig. Virðingarvert það. Held að afstaða hans sé til marks um innri mein stjórnarinnar.

Þau innri mein eru meiri en látið hefur verið uppi. Þau innanmein hverfa ekki með brotthvarfi Ögmundar en magnast eflaust frekar en hitt. Ögmundur hefur nú frítt spil, enda utan ráðherrastóls og getur sagt meira. Hann hefur eflaust fjarri því sagt sitt síðasta. Ergó: stjórnin lifir en hún stendur tæpt. Þar eru mikil innanmein sem munu ekki hverfa, heldur magna.

Svo verður að ráðast hversu lengi límið heldur. Eflaust er það ofrausn að spá stjórninni löngu lífi. Vinstrimenn eru auðvitað dauðhræddir við að glundroðakenningin verði að veruleika - vinstrimönnum sé ekki treystandi fyrir neinu. En hitt er orðið augljóst mál að vinstrimenn eiga erfitt með að höndla verkefnið. Verkstjórnin er auðvitað engin og klúðrið augljóst.

Fær Steingrímur umboð í kvöld?

Pólitísk upplausn - vinstristjórn á brauðfótum

Upplausnarblær er yfir íslenskum stjórnmálum á þessum degi. Vinstristjórnin er á algjörum brauðfótum og stendur mjög illa. Ögmundur er maður að meiri að fara - sætta sig ekki við hvað sem er. Hann er hugsjónamaður sem getur borið höfuðið hátt að standa og falla með sannfæringu sinni. Jóhanna hefur greinilega látið sverfa til stáls.

Ummæli hennar í gær um að hún hefði fengið nóg báru þess merki að hún væri að tukta til vinstri græna, til að sætta sig við Icesave-breytingar án alvöru þinglegrar meðferðar. Ögmundur gerir rétt að sætta sig ekki við það. Svo verður að ráðast hvort aðrir hafa bein í nefinu.

Var ekki að fórna sér

Ögmundur Jónasson segir af sér vegna Icesave

Ögmundur Jónasson á að mínu mati heiður skilið fyrir að hafa sagt af sér sem heilbrigðisráðherra vegna Icesave. Þarna fer ráðherra sem fer eftir sannfæringu sinni og lætur hugsjónirnar ráða för. Þetta er merki um drengskap og pólitískan kraft sem við höfum ekki séð lengi. Þó ég hafi oft verið ósammála Ögmundi pólitískt virði ég mikils að hann skuli hafa tekið þá ákvörðun að láta sannfæringuna ráða í þessu risavaxna máli. Hann er maður að meiri.

Þessi ríkisstjórn er mjög illa stödd í þessu Icesave-máli. Hún hefur gliðnað, virðist ráða illa við vandann. Augljóst er að þrýst er á að klára Icesave til að bjarga pólitísku andliti Jóhönnu Sigurðardóttur og Samfylkingarinnar. Ögmundur hefur þorað að taka af skarið í þessu máli, leitt andstöðu innan hennar og verið ófeiminn við að láta hjartað ráða för.

Er þessi ríkisstjórn á vetur setjandi, þegar lykilmenn innan samstarfsins geta ekki unnið hennar og velja frekar að fara en sætta sig við hvað sem er. Kannski verður Ögmundur bjargvættur VG í þessu samstarfi þar sem þeir hafa samið af sér hugsjónirnar oftar en tölu verður á komið.

Ögmundur segir af sér

Jóhanna tekur loksins af skarið

Mikið var að Jóhanna Sigurðardóttir, forsætisráðherra, sýndi einhverja pólitíska forystu og talaði hreint út um samstarfið við Alþjóða gjaldeyrissjóðinn. Framkoma IMF við Ísland er óþolandi, stjórnvöld verða að vera ákveðin og taka málin traustum tökum í stað þess að bíða endalaust eftir einhverju sem kemur ekki af sjálfu sér. Þetta hefur verið stóra vandamálið mánuðum saman. Það hefur verið beðið og beðið eftir einhverju sem við þurfum sjálf að vinna í. Það hefur vantað forystu.

Skilaboð Jóhönnu um helgina voru fyrst og fremst að biðin gengi ekki lengur og alls óvíst væri orðið um Icesave-samninginn. Augljóst er að málið er komið í nýja stöðu ef lögfestir fyrirvarar Alþingis eru út af borðinu. Þá verður að vinna málið upp á nýtt. Við annað verður varla unað. Ef vinstristjórnin getur ekki landað þessu máli sem hún tók að sér með viðunandi hætti verður henni ekki sætt lengur.

Kannski er stóra niðurstaðan sú að vinstristjórnin höndlar ekki verkefnið. Nú ræðst hvort Jóhanna og Steingrímur geta komið málum á rekspöl... nú þegar ár er liðið frá hruninu virðist sem komið sé að örlagastund þegar kemur að forystu þeirra sem fengu afgerandi umboð til verka í vor.

Þarf niðurstöðu fyrir helgi

5 ára stelpa stungin með eggvopni í Keflavík

Maður er eiginlega alveg orðlaus vegna frétta um að fimm ára stelpa hafi verið stungin með eggvopni í Keflavík.... eggvopnið var aðeins millimetrum frá því að fara í hjarta hennar.

Alveg hræðilegt... hvaða grimmdarhugur er að baki svona fólskuverki? Hvernig getur fullorðin manneskja gert barni þetta.... skelfilegt. Meira en lítið sjúk manneskja.

Á svona stundum er ekki nema von að maður hugsi hvað sé að gerast í þessu samfélagi.

Telpan á gjörgæslu

Ólafur Örn Nielsen kjörinn formaður SUS

Ég vil óska Ólafi Erni Nielsen innilega til hamingju með formennskuna í Sambandi ungra sjálfstæðismanna. Er ánægður með að það var kosið um formennskuna og tekist á - tel að það sé gott fyrir flokkinn og ungliðahreyfinguna að það sé líflegur slagur um forystuna.

Sýnir bara styrkleika og karakter fyrir ungliðahreyfingu Sjálfstæðisflokksins. Formannsslagur hefur ekki verið síðan í Eyjum 1999 og kominn tími til að það sé ekki beinlínis sjálfkjörið í þetta.

Fyrst og fremst þarf að efla starfið úti á landi og virkja betur tengslin við það sem gerist þar. Of mikið hefur verið af því að teknar séu einhliða ákvarðanir án þess að tala við landsbyggðina.

Sjálfstæðisflokkurinn stendur á krossgötum. Efla þarf ungliðastarfið til muna og taka til hendinni. Ég treysti Óla og nýrri stjórn til að gera það sem gera þarf.

Ólafur Örn kjörinn formaður SUS

Roman Polanski á leið heim til Bandaríkjanna

Eftir þrjá áratugi fjarri Bandaríkjunum og á flótta undan réttvísinni er óskarsverðlaunaleikstjórinn Roman Polanski á leið heim... sem fangi framseldur frá Sviss. Nú verður að ráðast hvort gamli perrastimpillinn situr í Bandaríkjamönnum og hann þurfi að dúsa í fangelsi í mörg ár. Auðvitað hefur Polanski gert mörg meistaraverk og notið mikillar virðingar þrátt fyrir þessa fortíð á heimaslóðum. En þetta hefur samt alltaf vofað yfir honum, hann hefur ekki losnað við þennan stimpil.

Polanski vann samt sinn mesta sigur í Bandaríkjunum á þessum áratug í skugga þessarar fortíðar. Það var sögulegt þegar kvikmyndaakademían ákvað að verðlauna hann með leikstjóraóskarnum fyrir The Pianist. Umdeilt val... en samt sem áður traust. Myndin var stórfengleg og átti að mínu mati að vinna verðlaunin sem besta kvikmynd.... akademían var ekki tilbúin að ganga það langt. En Polanski hlaut uppreisn æru í kvikmyndaborginni og klapp á bakið þá.

Sumir voru eilítið hikandi þegar hann vann óskarinn... margir höfðu þá veðjað á að akademían myndi ekki þora að taka skrefið. Harrison Ford (sem lék í Frantic, mynd leikstjórans) afhenti verðlaunin en Martin Scorsese fékk marga í salnum þó til að rísa á fætur, eftir smáhik, og hylla leikstjórann, sem var heima hjá sér í París. Steve Martin átti einn besta brandara kvöldsins þegar hann sagði mjög afslappaður... Roman Polanski is here og öskraði svo grimmilega Geeeeet him... :)

Ekki er um það deilt að Roman Polanski er einn meistara nútíma kvikmyndagerðar... en hann er umdeildur meistari. Nú verður fróðlegt að fá svarið við hinni áleitnu spurningu undanfarinna ára... verður hann úthrópaður eða hylltur við heimkomuna sem perri eða meistari....

Polanski verður framseldur

Lífsmark með Össuri í New York

Mikið var að Össur Skarphéðinsson, utanríkisráðherra, sýndi einhvern lit og sýndi eitthvað lífsmark í hópi þjóðarleiðtoganna í New York. Alltof lengi hefur vinstristjórnin þagað og sætt sig við framkomu IMF og fjölmargra þjóða við Ísland. Þar hefur gunguhátturinn haft betur ansi lengi... eflaust til að reyna að liðka við Evrópusambandsumsókninni. Ekki hefur mátt anda á neinn til að hafa alla góða.

Ekki hefur verið neinn dugur í þeim sem fara með völd hér á Íslandi að tala hreint út og reyna að tala máli Íslands, þegar þess er mest þörf. Þetta er fyrsta skiptið sem eitthvað heyrist annað en mjálm frá þessum stjórnvöldum. Össur þorði ekki að taka slaginn við Brown á leiðtogafundi NATÓ í vor þegar Jóhanna þorði ekki að fara til að hitta aðra þjóðarleiðtoga.

En þetta er samt allt frekar máttlaust. Össur hefur átt einhver samtöl í New York, enda kominn tími til að gera eitthvað annað en bíða og vona að hlustað sé á Íslendinga. Þegar stjórnvöld þora ekki að taka slaginn er ekki nema von að aðrir gangi á lagið og taki okkur í bóndabeygju.

Össur ávarpaði allsherjarþing SÞ

Snjóar á Akureyri

Hér á Akureyri hefur snjóað í nótt... fyrsti snjórinn á þessu hausti... og snjóar enn nú. Átti ekki von á þessu magni af snjó strax. Vetraríþróttakappar hljóta að gleðjast manna mest með þetta. Í fyrra kom fyrsti snjórinn 1. október að mig minnir... smá kuldahret en svo hlýnaði aftur og hélst gott í eitthvað um þrjár vikur áður en næsti kuldakafli skall á.

Vonandi mun sama gerast aftur nú... það hlýni aftur allavega í einhverjar vikur.

Mikil hálka á Öxnadalsheiði

Jákvæð samkeppni á matvörumarkaði

Ég vil óska Jóni Gerald Sullenberger góðs gengis með nýju verslunina. Okkur vantar alvöru samkeppni á íslenskum matvörumarkaði núna. Góð samkeppni er alltaf mikilvæg fyrir neytendur og skiptir sérstaklega máli núna þegar sjá má merki þess að samkeppnin er meira í orði en í verki.

Heilbrigð og góð samkeppni er eitthvað sem við ættum öll að vilja. Ef Jón Gerald telur sig geta farið í þá samkeppni með alvöru verslun og lág verð er það hið allra besta mál.

Auk þess er ástæða til að hrósa honum fyrir það að ráða eldra fólk til starfa hjá sér - jákvæð og virðingarverð stefna það.

Jón Gerald opnar í október

Icesave-málið á núllpunkti hjá vinstristjórninni

Því fyrr sem Jóhanna Sigurðardóttir, forsætisráðherra, brýtur odd af oflæti sínu og viðurkennir hið augljósa... að Icesave-málið er á núllpunkti hjá þessari vinstristjórn því betra! Augljóst er að málið er strand... erfitt að samræma áherslur svo allir haldi andlitinu í vinstriflokkunum.

Stóri vandinn er sá að vinstristjórnin gerði einn samning við Breta og Hollendinga og svo annan við óánægða þingmenn vinstri grænna... sem höfðu málið í gíslingu í allt sumar og tryggðu ásamt Sjálfstæðisflokknum að það komst í betri farveg fyrir íslensku þjóðina.

Nú þarf að gera þriðja samninginn... samræma báðar áherslur úr þeim fyrri. Ergó... málið er á núllpunkti. Það þarf að vinna upp á nýtt. Jóhanna ætti að viðurkenna þetta. Svona er staða málsins í dag.

Vinstristjórnin hefur setið í átta mánuði.... hún setti sér markmið að fara að vinna... gera eitthvað. Ekki getur hún verið stolt af þessum átta mánuðum. Öll mál eru stopp... það er ekkert að gerast.

Þetta felur feigðina í sér...

Ekki séð fyrir enda Icesave

Vinstri grænir hafa betur í deilunni um Bakka

Mikil vonbrigði eru að vinstristjórninni hafi tekist að rústa viljayfirlýsingu um álverið á Bakka. Þetta er afrek vinstri grænna, sem aldrei hafa stutt framkvæmdina. Í raun tel ég að mesta skemmdarverkið hafi verið gert í umhverfisráðherratíð Þórunnar Sveinbjarnardóttur, sem var einbeitt í því að eyðileggja sem mest fyrir Þingeyingum, sem vildu byggja upp einhverja framtíð á sínu svæði.

Katrín Júlíusdóttir hefur verið frekar máttlaus í verkum sínum, en þó reynt að þoka málum áfram, halda verkefninu við, en er borin ofurliði af vinstri grænum. Þeir hafa kyngt svo mikið af ógeði frá Samfylkingunni á undanförnum mánuðum, beygt sig í mörgum lykilmálum, að kannski er ekki undarlegt að þeir spyrni við og reyni að drepa álverið á Bakka þegar þeir geta það.

Annars er augljóst að það er engin samstaða um fjölda mála hjá þessari ríkisstjórn. Hún er algjörlega ráðalaus á vaktinni, getur engar ákvarðanir tekið heilstætt. Hver dagurinn er öðrum líkur í aðgerðarleysi hennar. Forsætisráðherrann er úti á túni, getur ekki tilkynnt eitt né neitt og virðist vera eins og leikkona án handrits. Vandræðalegt en dæmigert vinstri ráðaleysi.

En ég vorkenni þeim Þingeyingum sem enn kjósa Samfylkinguna. Þeir höfðu einlæga trú á því að Katrín Júlíusdóttir myndi sem iðnaðarráðherra standa í lappirnar... treystu henni fyrir málinu og trúðu því fram á síðasta dag að orð myndu standa. En vinstri grænir ráða för í þessu síðasta hugsjónamáli sem þeir hafa ekki selt frá sér.

Viljayfirlýsing ekki framlengd

Flott söfnun fyrir Grensás - frábært málefni

Íslendingar sýndu með myndarlegum hætti í kvöld að þeir standa vörð um það sem mestu skiptir með því að styðja við bakið á Grensás. Flott söfnun... frábært málefni... vönduð sjónvarpsútsending... samhugur þjóðarinnar eins og hann gerist bestur. Á þessum síðustu og verstu tímum sýnir þjóðin hvar hjartalagið er... þrátt fyrir stöðuna í samfélaginu styðjum við traust málefni alla leið. Alveg yndislegt.

Edda Heiðrún Backman er algjör hetja. Ég dáist að viljastyrk hennar og festu í baráttunni við sjúkdóminn... hún er glæsilegur fulltrúi í forystusveit þeirra sem berjast fyrir því að Grensás haldi velli í kreppunni og þar sé byggt upp en ekki rifið niður þegar mestu skiptir að verja grunngildin í þessu samfélagi. Ferfalt húrra fyrir Eddu og forystu hennar... sönn hvunndagshetja.

Rúmlega 113 milljónir safnast

Höfða bjargað

Þegar ég heyrði fyrstu fréttir af eldsvoðanum í Höfða óttaðist ég, eins og flestir, að þetta sögufræga hús, vettvangur leiðtogafundarins sem markaði þáttaskil við lok kalda stríðsins, væri að fara sömu leið og Valhöll á Þingvöllum. En því tókst til allrar lukku að bjarga með samstilltu átaki allra aðila... Þar skipti mestu máli auðvitað öflugt slökkvilið, vel búið af tækjum.

Mér fannst það gott að borgarfulltrúar með Hönnu Birnu Kristjánsdóttur, borgarstjóra, í broddi fylkingar mættu á svæðið til að hjálpa til með því að bjarga menningarverðmætum úr húsinu. Traust vinnubrögð í alla staði.

Viðgerð á Höfða undirbúin

Ætti þetta ekki að verða Eftirlitsstofnun ríkisins?

Vinstristjórnin með Katrínu Jakobsdóttur í broddi fylkingar boða eftirlit með fjölmiðlum af hálfu ríkisins... svo öruggt sé að fjölmiðlarnir geri nú örugglega einhverja vitleysu. Þetta er eitthvað svo ekta vinstri að setja á fót svona eftirlitsbatterí... tilgangurinn er auðvitað alveg augljós.

Ætti þetta ekki frekar að heita Eftirlitsstofnun ríkisins en Fjölmiðlastofa... sem er btw lummó nafn....

Fjölmiðlastofa hafi eftirlit

Jóhannes í Bónus kastar grjóti úr glerhúsi

Jóhannes Jónsson í Bónus ætti ekki að vera að kasta grjóti úr glerhúsi með því að tjá sig sérstaklega um ráðningu Davíðs Oddssonar með þeim ómerkilega hætti sem hann gerir. Orð hans um að Davíð sé óheilbrigður maður eru verulega ósmekkleg og honum ekki sæmandi, vilji hann yfir höfuð að einhver taki mark á honum.

En kannski er það óþarfi að einhver taki mark á Jóhannesi.... eflaust. Eins og staðan er í samfélaginu er það algjör óþarfi.

„Fortíðin til framdráttar“

Átakalínur og dramadrottningar

Ég óska nýjum ritstjórum Morgunblaðsins velgengni í verkefnum sínum. Blaðið er í eldlínunni með þá í frontinum. Allir fjölmiðlar vilja vera í sviðsljósinu.... Mogginn er sannarlega í sviðsljósinu nú. Hef haft eilítið gaman af dramadrottningum af báðum kynjum sem hafa farið af límingunum eftir að tilkynnt var um nýja ritstjóra í Hádegismóum.

Aldrei var hægt að búast við að allir séu sáttir, enda er Davíð Oddsson einn þeirra manna sem eru umdeildir, fyrst og fremst vegna þess að hann hefur skoðanir. Sumir hafa aldrei sætt sig við það.

Mikið væri lífið annars leiðinlegra ef enginn Davíð Oddsson væri til. Þeir eru samt margir sem elska að tjá sig um Davíð Oddsson og munu eflaust hafa gaman af því á næstunni.

Allir hafa skoðun á honum.... sá er lífsins gangur.

Nýir ritstjórar til starfa

Davíð Oddsson mætir til Sölva

Sölvi Tryggvason, einn besti sjónvarpsmaður landsins, fær Davíð Oddsson, ritstjóra Morgunblaðsins, til sín í kvöld. Verður eflaust áhugavert og spennandi viðtal. Öruggt að allir horfa á það, enda hafa allir áhuga að heyra hvað Davíð hefur að segja eftir að hann tekur til starfa í Hádegismóum.

Sölvi hefur blómstrað eftir að hann var rekinn af Stöð 2 fyrir tæpu ári.... þegar Ísland í dag var Séðogheyrt-vætt. Þættir hans á Skjá einum hafa vakið mikla athygli og ekki óeðlilegt að Davíð mæti til hans, enda fór hann þar í mjög gott viðtal í sumar vegna Icesave-málsins.

Davíð á SkjáEinum í kvöld

Hallærisleg ályktun hjá Blaðamannafélaginu

Ég tel að enginn sé ánægður með fjöldauppsagnirnar í Hádegismóum - þær eru hinsvegar leið eigenda til að snúa vörn í sókn í rekstrinum á erfiðum tímum. Ályktun Blaðamannafélagsins um málið er pínleg... allt að því hallærisleg. Stutt er síðan fyrrverandi forsætisráðherra og formaður Sjálfstæðisflokksins var látinn fara af Fréttablaðinu vegna sparnaðar eftir að hafa verið þar ritstjóri í rúm þrjú ár... af hverju ályktaði BÍ aldrei um hversu afleitt væri að sá maður væri þar?

Þorsteinn Pálsson var umdeildur stjórnmálamaður - honum mistókst að halda utan um þriggja flokka stjórn á sínum tíma og sprengdi hana með vandræðalegum vinnubrögðum. Ólafur Þ. Þórðarson, fyrrum þingmaður Framsóknarflokksins, kallaði forsætisráðherraferil hans reyndar dýrasta stjórnunarnámskeið Íslandssögunnar þá... en það er nú önnur saga.

Mér finnst það aumt að formaður Blaðamannafélagsins misnoti aðstöðu sína daginn sem hún er rekin og beiti félaginu fyrir sig með pólitískri ályktun. Af hverju var ekki ályktað svona vegna ritstjóraskipta á öðrum miðlum á síðustu árum, þegar ritstjórar komu og fóru vegna þess að eigendurnir settu þá af og völdu aðra í staðinn?

Er kannski ekki alveg sama hver á í hlut og hvern á að gagnrýna. Sumir hafa gleymt að Össur Skarphéðinsson, utanríkisráðherra, var ritstjóri DV meðfram þingmennsku fyrir áratug... ekki var talað um það. BÍ er ekki samkvæmt sjálfum sér frekar en formaðurinn.

Harmar uppsagnir

Endurkoma Davíðs Oddssonar

Endurkoma Davíðs Oddssonar í eldlínu þjóðmálaumræðunnar eru mikil tíðindi. Morgunblaðið verður í eldlínunni með hann á frontinum - blað sem þorir að hafa skoðanir og lætur í sér heyra. Ekki er við öðru að búast en leiðaraskrif og Reykjavíkurbréfið verði lesið með meiri áhuga en áður. Þeir sem þekkja Davíð vita að hann þorir að hafa skoðanir og lætur óhikað í sér heyra.

Davíð hefur nú fengið eitt besta skriftarpláss í landinu.... eðlilegt að þar verði talað afdráttarlaust og ákveðið. Þetta eru þannig tímar að við þurfum að tala tæpitungulaust. Fáum hefur tekist að vekja meiri viðbrögð í samfélaginu á undanförnum áratugum en Davíð Oddsson. Engin lognmolla hefur verið um hann og ekki við því að búast þegar hann fer að skrifa úr Hádegismóum.

Það hefur alltaf verið erfitt fyrir suma að sætta sig við að Davíð Oddsson hefur málfrelsi eins og ég og þú - svo og allir aðrir í þessu landi. Þegar hann var í stjórnmálum gat hann stuðað andstæðinga sína svo mjög að þeir alveg umpóluðust og urðu rauðir af illsku. Þetta er náðargáfa og Davíð hefur hana enn.

Nú verður líf og fjör. Það er af hinu góða.

Davíð og Haraldur ritstjórar