Menntaskólinn í Reykjavík sigrar í Gettu betur

Menntaskólinn í Reykjavík vann glæsilegan sigur í Gettu betur fyrir stundu í bráðabana eftir hörkuspennandi úrslitaviðureign við Menntaskólann í Kópavogi. Liðin voru jöfn eftir hraðaspurningar, bæði með 20 stig. Eftir því sem leið á bjölluspurningarnar jókst forskot MK og flest stefndi orðið í sigur þeirra.

Með því að landa þrem stigum fyrir þríþrautina náði MR að jafna MK undir lokin og knýja fram bráðabana. Þetta var spennuþrungin stund og mátti heyra saumnál detta í sjónvarpsútsendingunni er haldið var í bráðabanann og liðin voru jöfn, bæði með 27 stig. Tókst MR að svara tveim spurningum í bráðabana og með því landa sigri. Ævintýralega skemmtilegt kvöld og mikil spenna. Svoleiðis á það auðvitað að vera á úrslitakvöldi, ekki satt?

Þetta er í þrettánda skipti sem MR sigrar í Gettu betur, frá því að keppnin hófst árið 1986. Skólinn sigraði fyrst árið 1987, en síðan vann skólinn keppnina í heil ellefu ár í röð, á árunum 1993-2003. Það var ótrúleg sigurganga, sem andstæðingum þeirra á þessu langa tímabili gramdist mjög í geði vissulega en gerði þá sigursælasta lið í sögu keppninnar. Þeir hafa stundum staðið nærri sigri síðan og landa nú þrettánda sigrinum. Þeir hljóta að vera ansi glaðir í kvöld með sitt.

Mér fannst MR-liðið það langbesta í ár. Mjög sterkt og gott lið. MK var klárlega næstbesta liðið, þeir komu rosalega á óvart og stimpluðu sig rækilega inn á kortið. Þetta er lið sem hefur vaxið alveg rosalega í gegnum allt ferlið og þeir eru varla síðri sigurvegarar í kvöld í raun. Þetta var svo tæpt að þetta gat í raun fallið á hvorn veginn sem var. En tvö glæsileg lið sem stóðu sig firnavel. En sárindi MK-inga hljóta að vera mikil, en þeir geta verið stoltir með sitt þó.

Bloggvinur minn, Magnús Þorlákur Lúðvíksson, er í sigurliði MR ásamt Birni Reyni Halldórssyni og Hilmari Þorsteinssyni. Ég óska þeim innilega til hamingju og auðvitað öllum MR-ingum. Það verður fróðlegt að sjá hvort að MR sé að fara að feta í aðra eins langa sigurgöngu og áður, eftir svolítið erfitt tímabil síðustu fjögur árin.

MR-ingar höfðu betur í Gettu betur

Athugasemdir

[Steini Briem (IP-tala skráð) 30.3.2007 kl. 23:32]

MR RÉTT MARÐI ÞETTA og ef MK-ingar hefðu sagt "Sauðá" í staðinn fyrir að segja óvart "Sauðárkrókur" hefðu þeir unnið MR-inga GLÆSILEGA. Hver segir líka "Sauðá"?! Hins vegar hef ég oft sagt "Sauðárkrókur" og miklu oftar en ég hef kært mig um. 

[Kristján Hrannar (IP-tala skráð) 31.3.2007 kl. 09:59]

Var ekki staðan eftir hraðaspurningar 20-16 fyrir MR?

[Guðmundur H. Bragason, 31.3.2007 kl. 13:24]

ég heyrði frá kennara í MH í morgun að í undanúrslitarimmunni milli MH og MK hafi átt sér stað mistök í stigatalningu í hraðaspurningum og keppnin ekki átt að hafa farið í bráðabana þar sem MH var yfir. Stigateljarar skólans reyndu ítrekað að koma þessum skilaboðum til stjórnenda keppninnar en var haldið frá til að trufla ekki beina útsendingu. Leitt ef satt reynist.

[Stefán Friðrik Stefánsson, 31.3.2007 kl. 14:41]

Takk fyrir kommentin.

Kristján Hrannar: Takk fyrir ábendinguna, þarna á auðvitað að standa hraðaspurningar og vísbendingaspurningar. Þau voru jöfn eftir fyrstu lotu. Feill hjá mér í orðavali, vantar að botna setninguna.

Steini: MR var með langbesta liðið í ár. Enginn vafi á því. Það var eins og þeir væru ekki nógu hungraðir í gær, en þeim tókst að vinna. Þeir unnu keppnina, enginn vafi á því. Fyrst að Davíð Þór gat ekki gefið Versló rétt fyrir að segja Branden við Brandenborgarhöll gat hann ekki gefið rétt fyrir þetta. Einfalt mál. En MK kom mest á óvart í vetur og þeir komust lengra og nær þessu en mörgum óraði fyrir í upphafi lotunnar.

Guðmundur: Takk fyrir kommentið og þessa sögu.

mbk.

[Jón Ingi Stefánsson, 31.3.2007 kl. 15:07]

Sögðu MH-ingar ekki að 10 í þriðja veldi væru 10 þúsund og fengu stig fyrir? Jafnast þessi stigagjöf í hraðaspurningum þá ekki út?

[Stefán Friðrik Stefánsson, 31.3.2007 kl. 15:11]

Sæll Jón Ingi

Takk fyrir kommentið. Algjörlega sammála þér. Auðvitað vann MK MH. Enginn vafi á því. Það var líka glæsilegur sigur. Ég veit að það er sárt að tapa en MK stimplaði sig rosalega mikið inn og þetta lið á eftir að gera að góða hluti hér eftir og menn vanmeta þá ekki aftur, þú getur verið viss um það. Stóðu sig vel strákarnir. En það er grátlegt að tapa þegar að maður stendur svo nærri sigri, en MK var senuþjófur vetrarins og stóðu sig vel. Flottur árangur hjá ykkur í Kópavoginum!

mbk.

[Guðmundur H. Bragason, 31.3.2007 kl. 15:44]

Að sjálfsögðu Jón Ingi. sá ekki þáttinn sjálfur en var bara á tali við þennan kennara í dag vegna annars  Meiningin var ekki að gera lítið úr sigri MKinga í undanúrslitunum