Nýr meirihluti í Reykjavík án málefnagrunns

Leiðtogar nýs meirihlutaÞað er öllum ljóst að nýr meirihluti fjögurra stjórnmálaflokka í borgarstjórn Reykjavíkur er án málefnagrunns. Hið eina sem fram kom á blaðamannafundi fyrir stundu var það hver af fjórum forystumönnum ætti að skipa stóru embættin og síðan ætti bara að sjá til með framhaldið. Þetta er auðvitað mjög veikur meirihluti, enda veit t.d. enginn hvaða pólitíska umboð Margrét Sverrisdóttir hefur.

Í sjálfu sér eru þetta tímamót fyrir alla aðila. En hinsvegar vekur mikla athygli hversu mikill vinur minnihlutaflokkanna Björn Ingi Hrafnsson er orðinn eftir öll átökin í REI-málinu. Eftir öll stóru orðin um kaupréttarsamningana og bitlinginn til kosningastjóra Binga er allt fallið í ljúfa löð milli þessara aðila. Heilt yfir tel ég að þetta verði veikur meirihluti. Þetta eru fulltrúar fjögurra ólíkra framboða, eitt þeirra er reyndar algjörlega blankó eftir að Margrét Sverrisdóttir yfirgaf Frjálslynda flokkinn, svo ekki er hún fulltrúi hans í þessum meirihluta. Og hvar er Ólafur F. Magnússon, réttkjörinn borgarfulltrúi? Er hann orðinn ósýnilegur?

Það er vonandi að Magnús Þór Hafsteinsson og Guðjón Arnar Kristjánsson séu ánægðir með að stjórnmálaferli Margrétar Sverrisdóttur hafi verið bjargað, enda er hún að verða forseti borgarstjórnar í Reykjavík, svo skömmu eftir að hún yfirgaf þá. Hún fær fljúgandi start í fjölmiðlaathygli og verður einn valdamesti forystumaður borgarinnar, hefur t.d. líf meirihluta í höndum sér rétt eins og Björn Ingi Hrafnsson hafði áður. Það var ekki undrunarefni að Margrét væri spurð í hverra umboði hún sæti. Það verður að ráðast.

Fulltrúar flokkanna sem mynda nýjan meirihluta eru farnir að éta upp í sig öll stóru orðin. Bjarni Harðarson, alþingismaður, leit t.d. mjög kjánalega út í þinginu áðan þar sem hann át ofan í sig öll stóru orðin um að Bingi ætti að segja af sér. Guðjón Arnar Kristjánsson leit út eins og fyrrum eiginmaður maka sem hefur gift sig öðrum og er spurður um hvernig honum líki hjónaband makans fyrrverandi; semsagt mjög hlægilegur. En þetta verður bara að ráðast.

Ég held að þessi meirihluti verði mjög óstöndugur og hlakka sérstaklega til að sjá hvernig Margrét Sverrisdóttir standi að verki umboðslaus í meirihluta. Fjölmiðlar spyrja um stöðu hennar og eðlilegt að aðrir gera það. Björn Ingi Hrafnsson verður að eiga við sig sín óheilindi. Mér finnst þau ekki honum til sóma, enda greinilega prinsipplaus maður þar á ferð.

En nú verður spurt að því hvernig þessum fjórum flokkum gangi að sjóða saman málefnin, eitthvað sem við heyrðum ekkert um í dag. Það lyktar víða af óheilindum og fróðlegt að heyra hvernig gangi að bæta brunarústum Frjálslynda flokksins við R-listann.


mbl.is Samkomulag um nýjan meirihluta handsalað klukkan 14
Tilkynna um óviðeigandi tengingu við frétt

« Síðasta færsla | Næsta færsla »

Athugasemdir

1 Smámynd: Friðrik Þór Guðmundsson

Eðlilega eru meint óheilindi Björns Inga nú borin með réttu saman við það þegar Villi lét Ólaf Magnússon bíða 2006 og sá síðarnefndi taldi taldi sig illa svikinn af óheilindamanni. Þessi mál eru gjörsamlega sambærileg. Villi teymdi Ólaf á asnaeyrunum á sama tíma og hann var að rotta sig saman með Birni Inga. Björn Ingi hefur þá lært vettlingatökin af Villa.

Friðrik Þór Guðmundsson, 11.10.2007 kl. 19:25

2 Smámynd: Stefán Friðrik Stefánsson

Gunnar: Það var enginn sitjandi meirihluti í þeirri stöðu, meirihluti R-listaflokkanna féll í kosningunum og hraðinn var mikill. Hvað lá á? Af hverju gat ekki Björn Ingi Hrafnsson slitið meirihlutanum með heiðarlegri hætti, fyrst að kominn var annar málefnagrundvöllur. Þetta hefur aldrei fyrr gerst í Reykjavík. Við erum að tala um slit á meirihluta, það vantar málefnaáherslur slitanna. Mér finnst það sem ég hef heyrt mjög veikt, frá framsóknarmönnum og eins þeim sem vilja taka upp samstarf við Björn Inga eftir ásakanir um að hann sé spilltur vegna REI-málsins. Þess vegna skrifa ég með þessum hætti. Aðstæður eru aðrar, um er að ræða slit meirihluta og það þarf málefnaáherslur í ljósi þess og hver grunnur mála sé.

Viðar: Hvernig líst þér á að Margrét Sverrisdóttir sé komin til valda í Reykjavík? Hún var reyndar að afneita Frjálslynda flokknum áðan og sagði að honum hefði verið rænt í ársbyrjun. Hugguleg orð það. Hvaðan kemur umboð Margrétar sem forseta borgarstjórnar? Segðu mér þitt heiðarlega mat á því.

Friðrik Þór: Það voru þreifingar eftir kosningar þar sem meirihlutinn hafði fallið og allir voru að tala við alla að mestu leyti. Nú stöndum við frammi fyrir nýjum veruleika í Reykjavík. Meirihluti hefur aldrei sprungið án kosninga. Mér finnst skýringar Binga mjög veikar og finnst reyndar merkilegt að hann nefni aðeins þetta eina mál. Er Bingi að standa vörð um hagsmuni Glitnis (Árna Magg) í útrásardæminu? Snýst þetta ekki um það í heildina. Ég held það.

Stefán Friðrik Stefánsson, 11.10.2007 kl. 19:57

3 Smámynd: Kristján Pétursson

Mér finnst Björn Ingi hafa slitið samstarfinu við Sjálfstæðisfl.í borgarstjórn á ómálefnalegan og órökstuddan  hátt.Að lofa að kveldi áframhaldandi viðræðum um ágreiningin í REI málinu,en um hádegi næsta dags kominn í meirihluta samstarf við fjórflokkana.Ég er ekki sjálfstæðism.en svona vinnubrögð lýsa miklum óheilindum.

Mér finnst ekki gott fyrir þá flokka sem nú taka við stjórn borgarinnar,að þurfa að ýta úr vör með BIH innanborðs.

Kristján Pétursson, 11.10.2007 kl. 20:49

4 Smámynd: Óðinn Þórisson

Hvað hlutverk spilaði Guðni í þessum nýja meirihlutasamstarfi - var hann bakvið tjöldin að hefna fyrir ráðerrasætið ?

Guðlaugur Þór nýbúinn að sparka Don Alfredo - hvaða hlutverk spilaði hann í þessu

Hærri skattar, einkaskólar&einkabíllinn eiga slæma daga framundan og skuldasöfnun mun hefjast að nýju í Reykjavík

4.flokkar við völd - 4 borgarstjórar - samt mun þetta eflaust haldast til næstu kosninga.

Það verður að hafa í huga að Villi stóð sig illa og þarf að axla ábyrgð á því að hafa tapað borginni en hann ætlar víst að sitja áfram rúin trausti.

Óðinn Þórisson, 11.10.2007 kl. 20:52

5 Smámynd: Stefán Friðrik Stefánsson

Gunnar: Það virðist ekkert vera ljóst. Stærsta málið, samruni REI og GGE, virðist enn í uppnámi, Svandís kaus gegn því og gat ekki sagt áðan að hún myndi styðja samrunann. Hver er skoðun hennar? Það virðist ekkert vera komið á hreint í miðju hitamálinu mikla sem þó virðist hafa slitið meirihlutanum. Merkilegt.

Kristján: Ég var aldrei mikill stuðningsmaður þessa meirihlutamynsturs. Borgarbúar vildu ekki Binga til valda í fyrra og menn áttu að leyfa honum að svamla í minnihluta. Sé ekki í sjálfu sér eftir því að hann sitji í skjóli Sjálfstæðisflokksins. Svíður þó verklagið. Ef hann hefði sagt mönnum þetta í morgun og gert þetta aðeins betur hefði þetta verið áferðarskárra fyrir hann sjálfan. Þetta er bara svona og ekkert við því að gera, en verði þeim að góðu að ná öllum þessum örmum saman og sér ekki enn fyrir endann á því öllu.

Óðinn: Já, það hafa eflaust margir lagt hönd á plóg. Það koma öll kurl til grafar um síðir tel ég.

Viðar: Já, Margrét er ágætiskona og ég hef yfir engum svosem að kvarta, ég á vini í flestöllum flokkum og finnst þeir ekkert slæmir þó við höfum ólíkar grunnskoðanir í pólitík. En eftir stendur hvert umboð Margrétar er, í umboði hvaða flokks situr hún þarna, varaborgarfulltrúinn sem á að kjósa sem forseta borgarstjórnar? Villi er fínasti maður, honum varð á og verður að vinna sig úr því. Stór hluti þessa var trúnaðarbrestur milli fólks vegna gamaldags verklags Villa, en menn höfðu yfirstigið það. Það sem réði öllu voru aðrar aðstæður.

mbk.

Stefán Friðrik Stefánsson, 11.10.2007 kl. 21:05

6 Smámynd: Stefán Friðrik Stefánsson

Margrét er umboðslaus.

Jón Magnússon segir orðrétt á vef sínum að spillingarfnykinn leggi af borgarstjórninni hvar sem litið er. Hann gagnrýnir nýja meirihlutann og segir að til samstarfsins sé stofnað með óheilindum og af óheilindum. Sterk orð það.

Villa varð á og verður að vinna sig úr því. Hann upplýsti fólk ekki um sjálfsagðar upplýsingar og þess vegna varð ólgan. Það var búið að vinna úr henni. Ég held að Bingi sé að redda Glitni vegna orkuútrásarinnar. Þar eru miklir hagsmunir fyrir Árna Magnússon, fyrrum félagsmálaráðherra, sem vinnur að henni. 

Stefán Friðrik Stefánsson, 11.10.2007 kl. 21:29

7 Smámynd: Stefán Friðrik Stefánsson

Ólgan snerist að langmestu leyti um kaupréttarsamningana. Sú ólga er fjarri því búin, enda var þar illa unnið og öllum til skammar, sérstaklega Binga, sem sat í stjórn REI og var nátengdur öllum ferlum þess máls og hyglaði t.d. sérstaklega kosningastjóranum sínum.

Frjálslyndi flokkurinn hefur verið að tala um að Margrét sé umboðslaus og eigi að víkja, líka Ólafur F. Veit ekki betur en að það hafi komið frá aðalfundi einhvers kjördæmafélagsins þar. Ertu ósammála því? Þetta segir btw líka fyrrum þingmaður MÞH.

Stefán Friðrik Stefánsson, 11.10.2007 kl. 21:55

8 identicon

Viðar gegn hverjum ertu að berjast, dagurinn í dag var enginn sigur. það er ekki sigur þegar menn eins og Björn Ingi geta gengið frá mistökum sem þeir hafa gert án afleiðinga. og hvað veist þú um hvað gerist nú þegar nýr meirihluti tekur til valda. það má vera að þetta eina mál leysist, en hvað með öll hin málin sem gætu orðið ansi seig tugga fyrir flokkana að tyggja í sameiningu. 

Mér finnst það ekki rétt að ráða örlögum borgarinnar útaf REI

mbk

Óli 

Ólafur Hannesson (IP-tala skráð) 11.10.2007 kl. 23:27

9 Smámynd: Stefán Friðrik Stefánsson

Takk fyrir kommentið Óli. Alltaf gott að eignast nýja bloggvini og þá sem vilja tjá sig. Mikið innilega erum við annars sammála, vel skrifað komment. :)

mbk.

Stefán Friðrik Stefánsson, 11.10.2007 kl. 23:29

10 identicon

Þakka þér fyrir það, ég hef lengi lesið bloggið hjá þér og verið sammála mörgu sem þarkemur fram, en í dag þá fékk ég hálfgert sjokk og ákvað í kölfarið að tjá mig um málefnin. það er bara verst að maður er að fara í próf á morgun, og dagurinn skildi mann eftir hálf ruglaðann:)

mbk

Óli 

Ólafur Hannesson (IP-tala skráð) 11.10.2007 kl. 23:35

11 Smámynd: Stefán Friðrik Stefánsson

Takk fyrir góð komment um bloggið Óli. Alltaf gott að heyra að fólki líki skrifin. Gangi þér vel í prófinu. Verðum endilega í bandi, sendu mér komment hér eða póst við tækifæri.

mbk.

Stefán Friðrik Stefánsson, 12.10.2007 kl. 00:24

12 identicon

Hvaða auðlind þjóðarinnar er verið að ræna um?. Á íslenska þjóðin einhver jarðnæði í útlöndum sem á að gefa einhverjum Hannesum og Jónum?

Jú mikið rétt, mikil þekking er til staðar í OR á sviði orkunýtingar varma úr jörð. Þessa þekkingu vilja menn gera að útflutningsvöru, en hvernig getur OR gert pening úr dæminu. Jú stofna fyrirtæki sem í eru sett slatti af peningum, einir tveir milljarðar. Svo er tekið slatti af pappírum og öðrum gögnum til að gera vöruna sölulega, svo þarf eitthvað af starfmönnum að fylgja með. Það er nefnilega svo einkennilegt að svona pappírar og gögn gera ekkert sjálf, það þarf fólk sem hefur getu og áhuga á að koma svona vöru í pening. Enn sem komið er ekki farið að selja neina þekkingu, enn er þetta bara skúffufyrirtæki.

En mikið væri nú gaman að hafa aðgang að svona mönnum sem geta sagt fyrir um hagnað löngu áður en starfsemin hefst, þá væri maður ekki alltaf að kaupa í þessum félögum sem lækka í Kauphöllinni.

Kannski verður REI bara smá þróunaraðstoð Reykvíkinga við vanþróuð ríki úti í heimi, hver veit.

Guðmundur Jóhannsson (IP-tala skráð) 12.10.2007 kl. 08:03

13 Smámynd: Guðmundur Jóhannsson

Hvaða auðlind þjóðarinnar er verið að ræna um?. Á íslenska þjóðin einhver jarðnæði í útlöndum sem á að gefa einhverjum Hannesum og Jónum?

Jú mikið rétt, mikil þekking er til staðar í OR á sviði orkunýtingar varma úr jörð. Þessa þekkingu vilja menn gera að útflutningsvöru, en hvernig getur OR gert pening úr dæminu. Jú stofna fyrirtæki sem í eru sett slatti af peningum, einir tveir milljarðar. Svo er tekið slatti af pappírum og öðrum gögnum til að gera vöruna sölulega, svo þarf eitthvað af starfmönnum að fylgja með. Það er nefnilega svo einkennilegt að svona pappírar og gögn gera ekkert sjálf, það þarf fólk sem hefur getu og áhuga á að koma svona vöru í pening. Enn sem komið er ekki farið að selja neina þekkingu, enn er þetta bara skúffufyrirtæki.

En mikið væri nú gaman að hafa aðgang að svona mönnum sem geta sagt fyrir um hagnað löngu áður en starfsemin hefst, þá væri maður ekki alltaf að kaupa í þessum félögum sem lækka í Kauphöllinni.

Kannski verður REI bara smá þróunaraðstoð Reykvíkinga við vanþróuð ríki úti í heimi, hver veit.

Guðmundur Jóhannsson, 12.10.2007 kl. 08:13

14 Smámynd: Stefán Friðrik Stefánsson

Takk kærlega fyrir kommentið Mundi. Vel skrifað og gott komment.

mbk.

Stefán Friðrik Stefánsson, 13.10.2007 kl. 04:42

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband