Kiddi Konn og Hamraborgin

Mér finnst enginn syngja Hamraborgina, lag Sigvalda Kaldalóns við ljóð Davíðs Stefánssonar frá Fagraskógi, betur en Kristján Jóhannsson, eða Kiddi Konn eins og við Akureyringar nefnum hann. Krafturinn í laginu verður aldrei meiri en í flutningi Kidda. Hann er söngvari kraftsins og þetta lag markar hápunkt ferils hans, enda syngur Kristján jafnan lagið þegar að hann heldur tónleika hér heima.

Síðustu tónleikar hans hérna í haust voru eftirminnilegasti tónlistarviðburður ársins hér fyrir norðan og sýndu okkur öllum að Kiddi er enn í toppformi, þó hann hafi vissulega dregið mjög úr tónleikahaldi og sé farinn að róa sig aðeins niður eftir þrjá áratugi í fremstu röð víða um heim og virka tónlistaþátttöku, eftir að hann flutti til Ítalíu. Kiddi fékk mikið lof eftir þá tónleika, sannarlega verðskuldað enda heillaði hann alla sem þar voru staddir.

Gott að hann ætli sér að vera heima um jólin. Vissulega situr enn í mörgum viss leiðindi fyrir nokkrum árum, en ég held að þær deilur séu að mestu gleymdar og grafnar.

Hamraborgin nötraði

Athugasemdir

[Heimir Lárusson Fjeldsted, 18.12.2007 kl. 20:21]

"Gott að hann ætli sér að vera heima um jólin."

Ég hélt að Kristján hefði gerst Ítalskur ríkisborgari fyrir mörgum árum síðan og með heimilisfesti í heimalandi sínu.

Vinsamlegast leiðréttu mig Stebbi ef ég fer með rangt mál.

[Stefán Friðrik Stefánsson, 18.12.2007 kl. 20:29]

Kiddi hefur búið á Ítalíu í yfir þrjá áratugi. Hann seldi allt sitt hér til að skapa sér nýtt líf erlendis. Þar hefur hann átt heimili. Hann talar samt sem áður alltaf um að fara heim þegar að hann kemur til Íslands, enda verður hann alltaf Akureyringur í hjartanu og á hér rætur að sjálfsögðu. Þetta er ekkert öðruvísi en t.d. þegar að Sir Anthony Hopkins flutti lögheimili sitt til Bandaríkjanna, samt er hann með þá nafnbót heima og flestir líta á hann auðvitað sem Breta. Mér er alveg sama hvar Kiddi býr í heiminum, í mínum augum verður hann alltaf hluti af samfélaginu hér. Héðan er hann kominn og honum er alltaf vel tekið þegar að hann kemur hingað í Eyjafjörðinn.

[Heimir Lárusson Fjeldsted, 18.12.2007 kl. 20:39]

Þakka þér Stefán fyrir greinagott svar.

Ég var hinsvegar að spyrja um ríkisfangið?

Ég þykist vita að honum verði veltekið í Eyjafirði sem annarsstaðar á landinu; ekki síður en í iðrum þess þótt hann sé Ítalskur.

[Helga (IP-tala skráð) 18.12.2007 kl. 20:44]

Gott hjá ykkur Akureyringum! Þið eigið hann í friði.

[Helga (IP-tala skráð) 18.12.2007 kl. 20:56]

jæja. Gleðilega hátíð.

[Stefán Friðrik Stefánsson, 18.12.2007 kl. 20:59]

Heimir: Það er alveg rétt að Kiddi hefur heimili á Ítalíu. Þar hefur hann auðvitað markað sér líf. Það var hans valkostur á sínum tíma og ekki geri ég neinar athugasemdir við það. Hann er söngvari af þeim skala að hann getur ekki búið hér heima og sinnt listsköpun sinni. Það sást vel þegar að hann söng í Þjóðleikhúsinu fyrir þrettán árum, þá voru deilur um launakjör hans og hann hefur held ég ekki sungið á leiksviði hér heima síðan. Kristján væri eflaust enn að vinna í Slippnum hérna ef hann hefði ekki tekið áhættuna og farið út á sínum tíma. Það var þrautaganga framan af, enda námið honum dýrt en það hefur sannarlega borgað sig fyrir hann að fara.

Helga: Varð ekki var við að bara Norðlendingar væru á tónleikunum hans Kristjáns í haust. Þar var fólk víðsvegar um land og fjöldi Sunnlendinga. Enda eðlilegt, þar sem það telst alltaf viðburður þegar að óperusöngvarar af þessum kalíber halda tónleika. Það er hinsvegar svo að Kristján er ekki skaplaus maður og hefur aldrei verið lognmolla í kringum hann. Þetta er bara hans karakter. Hann er ekki eini listamaður heimsins sem er skapheitur.

[Heimir Lárusson Fjeldsted, 18.12.2007 kl. 21:04]

Stefán.

Enn svarar þú ekki spurningu minni.

Ég tel þá rétt munað að hann sé Ítali.

Hann er samt góður .

[Stefán Friðrik Stefánsson, 18.12.2007 kl. 21:11]

Kristján býr bæði og starfar erlendis. Það hefði aldrei orðið neitt úr Kristjáni sem listamanni ef hann hefði verið bara hérna á Akureyri. Garðar Thor Cortes er sestur nær alveg að erlendis og sinnir sinni listsköpun þar. Svona er þetta bara. Kristján er vissulega orðinn mjög ítalskur, enda búið þar síðan um miðjan áttunda áratuginn. Það verður samt aldrei sagt að Kristján sé ekki íslenskur, enda er hann fæddur hér og uppalinn. Það er fjöldi þekktra Íslendinga sem býr erlendis og hefur markað sér líf þar. Eiríkur Hauksson er t.d. algjörlega sestur að í Noregi. Lít á hann sem Íslending. Uppruni fólks breytist aldrei.

Gleðilega hátíð Helga.

[Heimir Lárusson Fjeldsted, 18.12.2007 kl. 21:18]

Mig minnir að Kristjá Jóhannson hafi gefið þá skýringu á nýja ríkisfanginu að eftirlaunin væru hærri þar en hér. Ágætis sjónarmið og skiljanlegt.

[Stefán Friðrik Stefánsson, 18.12.2007 kl. 21:29]

Ertu þá að segja að Eiríkur Hauksson sé ekki Íslendingur?