Sturla kærður - munu mótmælin halda áfram?

Eftir atburðarás síðustu daga þarf ekki að koma að óvörum að Sturla Jónsson hafi verið ákærður vegna mótmæla atvinnubílstjóra. Lögregluyfirvöld hafa orðið sífellt óþolinmóðari í garð mótmælanna eftir því sem frá hefur liðið og greinilegt um skeið að eitthvað myndi brátt gerast. Það sem verður þó áhugaverðast að sjá í kjölfarið hvernig atvinnubílstjórar svari kærunni, hvernig mótmæli verði næstu dagana.

Það þarf ekki sérfræðing til að sjá að síendurtekin mótmæli á aðalumferðaræðum borgarinnar bættu ekki málstað bílstjóranna. Þetta voru sterk skilaboð fyrstu vikuna eða svo, en síðan fór boðskapurinn svolítið að verða útvatnaður og umdeildari - fólk sem hafði samúð með bílstjórunum fóru að verða óánægð og það fór að lokum svo eins og ég sagði í pistli eftir fyrstu mótmælin að síendurtekin mótmæli, alveg eins, myndu ekkert gera nema veikja málstað bílstjóranna og gera það að verkum að samúð almennings myndi dvína. Margir studdu málstaðinn en ekki verklagið við að vekja athygli á honum.

Mótmæli bílstjóranna við fjármálaráðuneytið og samgönguráðuneytið, sem blokkeraði formenn stjórnarflokkanna í Hafnarhúsinu, svo þau urðu að fara fótgangandi frá, vakti t.d. að ég tel mun meiri athygli og einhverja samúð en hitt. Það er alltaf svo að þegar byrjað er að mótmæla getur málstaðurinn veikst ef ekki er haldið skynsamlega á málum. Það er enginn vafi á því að það var farið svolítið langt í þessum mótmælum og þau voru byggð upp spontant og ekki skipulega að ég tel. Það er enda erfitt að halda dampi í svona mótmælum mjög lengi með sömu aðferðum.

Ekki vantaði samstöðuna, en ég tel að bílstjórar hér nyrðra t.d. hafi gert þetta mun skynsamlegra en félagar þeirra fyrir sunnan, með því að lama ekki umferðina alveg, heldur hægja á henni og senda skilaboð með því. Mótmæli bílstjóranna hér voru auk þess ekki upp á hvern dag og þeir komu sínu vel á framfæri. Held að margir styðji enda málstað bílstjóranna en það hafi misst tiltrú á aðferðunum sem slíkum í mótmælunum.

En stóra spurningin er auðvitað nú hvernig bílstjórarnir muni bregðast við ákærunni á hendur Sturlu. Munu þeir berjast áfram og loka af umferðaræðar? Þeir létu greinilega af því verklagi í byrjun vikunnar og vöktu athygli með mótmælum á mánudag, en fróðlegt verður að sjá hvaða stefnu þeir taka núna.

Bílstjórar: „Við höldum áfram"

Athugasemdir

[Eysteinn Þór Kristinsson, 9.4.2008 kl. 12:08]

Það hefði verið tilvalið að aka t.d. Miklubrautina hægt á annatíma og með svolitlum flautulátum. Öllu má ofgera og í mótmælum verða menn að passa sig að missa ekki samhug almennings, ástandið eins og það er er óþolandi. Mótmælin eru nauðsynleg og bílstjórarnir hafa staðið sig vel en verða að passa að fara ekki yfir strikið. Það mættu vera meiri svona táknræn mótmæli við ráðuneytin.

[Sigurður Ingi Jónsson, 9.4.2008 kl. 12:21]

Það má sjá hvaða augum ríkisstjórnin lítur olíugjaldið sitt með því að lesa breytt viðurlög við notkunar á litaðri olíu frá RSK: Orðsending nr. 1 / 2007.

Vörubílstjóri, sem verður uppvís af því að nota litaða olíu, vélaolíu, er sektaður kr. 1.250.000 við fyrsta brot! Þessi upphæð tvöfaldast við ítrekuð brot.

Mótmæli gegn ofurálagningu ríkisins á eldsneyti virðast litin alvarlegri augum en eiturlyfja- og ofbeldisglæpir.

[Ólafur Guðmundsson, 9.4.2008 kl. 12:53]

Sigurður, "...ofurálagningu ríkisins á eldsneyti...". Álagningin er síst of lítil.

[Haraldur Haraldsson, 9.4.2008 kl. 13:00]

það er alveg sama hvernig á þetta er litið,að Rikisstjórininni er það bara skylda að læka oliur og bensin við þessar aðstæður/Halli gamli

[Sigurður Ingi Jónsson, 9.4.2008 kl. 13:09]

Það er vert að benda áhugasömum á að verð á eldsneyti hefur bein áhrif á vísitölu neysluverðs. Þannig verða ruðningsáhrif þeirra griðarlegu verðhækkana undanfarið til þess að afborganir lána hækka, skuldabyrði heimila eykst og íslenskur almúginn fær í hausinn reikninginn fyrir ofsagróða fjármálafyrirtækja, innlendra og erlendra, sem hafa tekið skortstöður gegn íslensku krónunni.

[Óðinn Þórisson, 9.4.2008 kl. 20:24]

Það að kalla Sturlu til skýrslutöku er alveg rökrétt en það er spurning hversvegna ekki hinir sem hafa staðið í þessum ólögmætu aðgerðum.
Ef þeir halda þessum ólögmætu aðgerðum áfram er lítið annað fyrir lögregluna að gera en að beita öllum þeim löglegu aðgerðum gegn þeim sem þeir hafa   - þetta gengur ekki lengur.
Ég held að stuðningur almennings við þeirra baráttu fari dvínandi dag frá degi.
Ég hef og mun aldrei stiðja einskaklinga/hópa sem stunda ólögmætar aðgerðir.