Lára axlar ábyrgð á dómgreindarbresti sínum

Lára Ómarsdóttir hefur gert hið eina rétta í veikri stöðu sinni og hætt sem fréttamaður á Stöð 2. Dómgreindarbrestur hennar í starfi var mjög alvarlegur og ekki hægt aðeins að biðjast afsökunar á ummælunum um eggjakastið. Hún reyndi að bæta stöðu sína með því að gefa í skyn að aðeins um grín hefði verið að ræða en það virkaði ekki sannfærandi þegar að upptaka af ummælunum varð opinber.

Í þessum efnum var fyrst og fremst spurt um trúverðugleika fréttastofu Stöðvar 2. Um leið og ljóst var að Lára hefði látið þessi umdeildu ummæli falla varð augljóst að fréttamannsheiðri hennar yrði í raun ekki bjargað. Stóra spurning málsins varð um það lykilatriði hvernig yfirmenn hennar myndu taka á málunum. Að óbreyttu hefði trúverðugleiki fréttastofunnar beðið hnekki af og bæði Láru og einkum yfirmönnum hennar varð ljóst að ekkert yrði lagað í þessu nema að Lára tæki ábyrgð á ummælunum og segði upp, ella yrði látin hætta.

Lára er manneskja að meiri að taka sjálf þessa ákvörðun og hverfa á braut. Dapurlegt er vissulega að hún hafi brugðist sínu hlutverki með ummælum sínum, sem ekki var hægt að taka trúanlegt að hefðu aðeins verið sett fram í gríni. Hefði það átt að verða gild afsökun hefði tónninn í röddinni þurft að verða annar og jafnvel þurft að fylgja hlátur með. Enginn trúði því að þetta væri aðeins húmor. Eftir stóðu aðeins óafsakanleg mistök á fréttamannsvakt.

Hættir sem fréttamaður á Stöð 2

Athugasemdir

[Ólafur H. Guðgeirsson, 25.4.2008 kl. 14:22]

Lára er ágætur fréttamaður og eftirsjá að henni.

Ég held að þetta séu ekki hennar mistök heldur finnst mér þetta vera andinn í íslenskri fréttamennsku á að minnsta kosti sumum miðlum - hlutverk þeirra hefur færst frá því að segja frá atburðum yfir í það að skapa atburði, með því markmiði að auka áhorf og þar með auglýsingatekjur.

Það er þess vegna ekki Lára sem brást sínu hlutverki heldur eru það fjölmiðlar í heild; það er svo bara Lára sem tekur ábyrgð, aðrir sitja sem fastast og halda áfram að vera fyrstir með sem allra æsilegastar og svakalegastar "fréttir" - eða horfði ég kanske bara of mikið á "Pressuna."

[365, 25.4.2008 kl. 15:57]

Ég held nú samt sem áður að það sé meiri agi á RÚV.  Það er meira um hipp  hopp og hí á Stöð 2

[Friðrik Þór Guðmundsson, 25.4.2008 kl. 16:17]

Tvennt er það sem mig dauðlangar að heyra. Annars vegar hvað viðmælandi Láru var að segja á hinum endanum (hver var það? Var hann/hún að gefa fyrirskipun og ummæli Láru viðbrögð við því?). Mér heyrist Lára ekki vera að grínast, en aftur á móti virðist mér hún vera að bregðast við ósk viðmælandans um eitthvað djúsí.

Ég get einhvern veginn ekki fyllilega metið orð Láru nema að vita þetta.

Hitt varðar árás Ágústs Fylkissonar á lögregluþjóninn. Árásin furðar mig og ég á erfitt með að meðtaka að hún hafi verið gjörsamlega tilefnislaus. Ég myndi vilja vita hvað lögregluþjónninn sagði við Ágúst augnablikið fyrir árásina. Var hann kannski að gefa komment á heilastærð Ágústs?

[Ómar Ragnarsson, 25.4.2008 kl. 20:54]

Mig langar til að benda ykkur á niðurstöður mínar af rannsókn á myndskeiðinu af visir.is sem sýnt var á Stöð 2 í kvöld.

[Valur Arnarson (IP-tala skráð) 25.4.2008 kl. 21:00]

Kæri Stefán,

 Þú talar um "óafsakanleg mistök á fréttamannsvakt"!  Finnst þér þetta ekkert of djúpt í árinni tekið?

Annars er þetta svo týpískt með Ísland, það er alltaf verkamaðurinn sem axlar ábyrgðina meðan forstjórinn sleppur.  Hver eru tildrög þeirra mótmæla sem sköpuðu þau leiðu atvik sem blöstu við okkur á skjánum?

Eru mótmælin ekki tilkomin vegna óréttlátra lagasetninga sem bitna á vörubílstjórum, þar sem menn verða að stoppa útí kannti eftir 4 tíma akstur og skíta og míga þar sem þeir standa.  Hverjir bera ábyrgð á þessu?  Ekki Lára Ómarsdóttir það er eitt sem er víst en hún er sú eina sem segir af sér.  Hún gerði sig seka um mistök, ekki óafsakanleg miðað við þau mistök sem ráðamenn þjóðarinnar hafa gert sig seka um.  Mistök ráðamanna fela í sér aðgerðarleysi sem bitnar á okkur borgurunum í þessum mótmælum.

Þrír ráðherrar hafa komið fram opinberlega og lýst því yfir að þeir ætli að halda sínu aðgerðarleysi áfram.  Þetta eru þeir Geir H. Haarde, Björn Bjarnason og Kristján L. Möller.  Með öðrum orðum þetta eru mennirnir sem bera ábyrgð á áframhaldandi aðgerðum.  Eigum við ekki heldur að krefjast afsagna þessara manna en einnar fréttakonu sem varð á mistök í hita leiksins. 

En ég tek það fram að bloggarar eins og þú Stefán hafið hrakið hana úr starfi með viðbjóðslegu einelti!  Þeir þrír menn sem ég nafngreini í þessari málsgrein eru ósnertanlegir og yfir okkur hafnir, Lára er nær okkur og því ættum við frekar að standa með henni í stað þess að ráðast á hana.

[Stefán Friðrik Stefánsson, 25.4.2008 kl. 21:16]

Takk fyrir kommentin.

Vil þakka þér sérstaklega fyrir kommentið Ómar. Það er leitt að svona skildi fara hjá Láru en ég vona innilega að hún eigi sér endurkomu í fréttamennsku. Nái að yfirstíga þessi mál. Hún hefur marga góða hluti gert og leiðinlegt að sjá hvernig fór, en þetta voru óheppileg ummæli og ekkert annað að gera í stöðunni en segja sig frá starfinu. Vona að henni gangi vel á næstunni.

[Stefán Friðrik Stefánsson, 26.4.2008 kl. 01:02]

Vil benda Val á að það hrakti enginn Láru úr starfi. Hún gerði mistök sem fréttamaður og tók ábyrgð á þeim. Sjálf hefur hún viðurkennt þau mistök og talað hreint út um eigið klúður. Best gerði hún það í Íslandi í dag í kvöld.