Bankakreppa yfirvofandi á Íslandi?

Ekki er von á góðu eftir krísufundinn í kringum miðnættið í Seðlabankanum. Ekki er þó slegið á óvissuna heldur leyft henni að grassera gegnum nóttina. Þjóðin bíður fregna og ekki óvarlegt að gefa sér að bankakreppa sé framundan. Alveg er augljóst að ekki er boðað til slíkra fundahalda á þessum tíma á sjálfum hvíldardeginum nema mjög erfiðir tímar séu framundan og illa horfi.

Mér finnst það ábyrgðarhluti að ekki sé gefin út yfirlýsing eða talað til þjóðarinnar þegar svo ber við. En kannski þarf þess ekki. Þögnin svarar væntanlega spurningunni að eitthvað mjög stórt sé að fara að gerast. Allt er þetta þó í véfréttastíl - þjóðin bíður enn þess að heyra hvað sé að fara að gerast.

Mér finnst myndin af Davíð Oddssyni og Geir H. Haarde segja allt sem segja þarf. Það er svartur mánudagur framundan á Fróni. Svipbrigðin segja meira en þúsund orð. Ætli þetta verði ekki fréttamynd ársins?

Ráðamenn funduðu fram á nótt

Athugasemdir

[Bráðum Norsari frá Fróni (IP-tala skráð) 29.9.2008 kl. 03:27]

Flottræfilshátturinn er að keyra þessa blessuðu ballareyju í kaf. Mér finnst myndin einmitt lýsa því vel.

Ég hef verulegar áhyggjur af fréttum morgundagsins.

[Vésteinn Valgarðsson, 29.9.2008 kl. 06:13]

Myndin er alla vega lýsandi fyrir það hver stjórnar ferðinni, eða þannig...

[Villi Asgeirsson, 29.9.2008 kl. 07:43]

Þeir verða að segja eitthvað. Annars verður spekúlerað og fólk býst við hinu versta. Það kæmi mér ekki á óvart ef evran færi upp í 150 kall í dag eða á morgun ef þeir ákveða að segja ekkert.

[Hrannar Baldursson, 29.9.2008 kl. 08:56]

Getur ekki verið að ráðamenn séu loks farnir að gera eitthvað í þessum málum? Gott að þessi krísufundur hefur verið haldinn. Það þýðir að nú viðurkenna menn að vandamál sé til staðar. Ég er á þeirri skoðun að krísufundur hefði átt að fara fram í lok síðasta mars. En betra nú en eftir hálft ár.

Þetta er fyrsta skrefið í rétta átt.

[corvus corax, 29.9.2008 kl. 09:21]

Þessi mynd minnir mig skemmtilega á hljómsveitarnafnið "Ljótu hálfvitarnir".

[helgi (IP-tala skráð) 29.9.2008 kl. 10:24]

Ætli Lalli Logsuða og allir hinir 300 miljóna mennirnir hlægji ekki alla leið í aðra banka.

Við skulum ekki gleyma því að ofurlaun þeirra voru réttlæt með því að annars færu þeir úr landi að græða peninga fyrir erlenda banka.

[Villi Asgeirsson, 29.9.2008 kl. 11:25]

Mikill hefði missirinn verið.

[H.T. Bjarnason (IP-tala skráð) 29.9.2008 kl. 12:10]

Bíddu við ... þýðir þetta að Elton John komi þá ekki til með að syngja á næstu árshátíð Glitnis?

[Gísli Sigurðsson, 29.9.2008 kl. 15:02]

Þetta er nokkuð táknræn mynd sem er með þessari frétt, Davíð í bílstjórasætinu og gott ef Árni Matt er ekki lúpulegur í aftursætinu.