Skelfileg staða íslenskra námsmanna erlendis

Ég hef fengið nokkra tölvupósta frá íslenskum námsmönnum erlendis þar sem farið er yfir stöðuna hjá þeim. Hún er vægast sagt ófögur og útlitið fjarri því bjart. Auk þess hef ég heyrt frá ættingjum sem eru erlendis. Þetta eru ekki ánægjulegar sögur og leitt til þess að hugsa hvernig komið er. Sérstaklega vorkenni ég sárlega ungu íslensku fólki sem hefur lagt mikið á sig að fara erlendis í nám og lenda svo í slíku; hafa varla efni á mat og vera í algjörri örvæntingu um næstu skref.

Get ekki betur séð en við Íslendingar verðum að brjóta odd af oflæti okkar og leita eftir aðstoð í þessari erfiðu stöðu, þó væntanlega verði það erfið skref fyrir einhverja. Væntanlega mun það fara svo að Alþjóða gjaldeyrissjóðurinn leggur okkur lið og hjálpar íslensku þjóðinni í gegnum erfiðasta hjallann. Mig minnir að við höfum ekki leitað til hans í ein 25 ár og höfum verið skuldlausir við hann síðan árið 1987.

Svo verður að ráðast hvort Rússar leggja okkur lið, eins og útlit hefur verið fyrir í þessari viku. Í viðræðunum í Moskvu mun væntanlega koma fram hvort og þá hvaða skilyrði Rússar setji fyrir að veita okkur lán. Þegar er farið að tala um að Rússar ætli sér að kaupa velvild við Atlantshafið. Vel má vera. Kannski fer það svo að Bretum og Bandaríkjamönnum muni svíða framkoman við okkur þó síðar verði.

Rússar og IMF sameinist um lán

Athugasemdir

[Eiríkur Sjóberg, 11.10.2008 kl. 01:17]

Sæll Friðrik

 Þetta eru náttúrulega all sérstæðir tímar fyrir okkur.

 Mjög mikilvægt er fyrir Ísland að treysta orðsporið.  Og að vinna að því að byggja undir traust útlendra á íslenskum fjármálamarkaði og efnahagslífi.

 Mér sýnist allt stefna í að Alþjóða gjaldeyrissjóðurinn komi til hjálpar.  Engin minnkun er í því - alls engin!  Slík hugsun má alls ekki trufla möguleikann.

 Að auki eru margar þjóðir mjög viljugar að hjálpa okkur - og þar ber að þakka góðu orðspori íslensku þjóðarinnar!  Um ræðir þó einkum þjóðir sem við myndum venjulega ekki hugsa fyrst til, svo sérkennilegt sem það er!  Nefna má Rússana auðvitað, og Litháa og önnur Eystrasalts-lönd, auk Japana t.d.

 Skuldsetninga útrásar-Pésanna er náttúruelga svakaleg.  En ef við opnum okkur aðeins gagnvart raunveruleikanum sem við okkur blasir núna og viðurkennum hversu vandinn er geysilegur, þá eru margir boðnir og búnir að aðstoða okkur.  Og þegar aðstoðin berst trúi ég að gengi íslensku krónunnar muni styrkjast og þar með bæta hag margra, m.a. námsmannanna sem stunda nám í útlöndum!

 Eftir hverju erum við þá að bíða með að þiggja aðstoð Alþjóða gjaldeyrissjóðsins, sem nánast biður um að fá að aðstoða okkur?

[spritti (IP-tala skráð) 11.10.2008 kl. 09:08]

Það eru nú fleiri en bara námsmenn þarna úti sem eru í vanda. Gamla fólkið sem ætlaði að nota strípaða ellilífeyrinn sinn í lágu verðlagi á kanarí er núna í vandræðum.