Repúblikanar bíða færis að méla Obama niður

Það er greinilegt að repúblikanar ætla sér að méla persónu Barack Obama niður muni hann ná útnefningu sem forsetaefni demókrata í kosningabaráttunni síðar á árinu. Las umfjöllun Sunday Times, en þar er dregin upp mynd af honum sem vinstrisinnaðasta frambjóðanda í forsetakjöri frá því George McGovern var og hét og hann sé á mála hjá spilltum auðmönnum.

Það er löngu orðið þekkt að áróðursvél repúblikana hlífir ekki andstæðingum og greinilegt að öllum steinum verður velt við muni Obama fara gegn John McCain í forsetakosningunum og reynt að draga upp ófagra mynd af honum. Reyndar er það nú svo að ótrúlega lítið er í raun vitað um Obama. Hann talar lítið um stefnumál, hefur ekki ljáð máls á kappræðum síðustu dagana og flytur innlifaðar ræður um breytingar án þess að gera vel grein fyrir stefnumálum sínum. Margir vita ekki hver þessi maður er og fyrir hvað hann stendur.

Það er kannski varla óeðlilegt sé það rétt að hann sé vinstrisinnaðasti maður í forsetakjöri frá því á áttunda áratugnum sem á raunhæfa möguleika á Hvíta húsinu. Ekki talar hann sem slíkur og virðist frekar vera að reyna að leyna bakgrunni sínum en tala hreint út um málefni. Mér finnst Obama allt að því magnaður predikari með sjarma en mér finnst vanta áþreifanlega að hann tali hreint um lausnir á málefnum, tali um hugsjónir sínar og það sem hann ætlar að gera nái hann völdum. Það vantar málefnapælingarnar í allar draumsýnirnar um breytingar.

Það er greinilegt að hann verður að tala mun skýrar þegar að hann mætir áróðursvél repúblikana. Hillary Rodham Clinton hefur verið hrædd við að impra á fortíð Obama og hjóla í persónu hans af ótta við að það springi framan í hana sjálfa. Svo virðist sem að repúblikanar ætli að taka það verkefni að sér án þess að hika. Tengsl Obama við peningamenn með miður gott orðspor í Chicago mun ekki styðja hann og greinilegt að repúblikanar ætla sér ekki að taka hann með silkihönskum verði hann keppinautur þeirra.

Ef marka má orðróminn mun fyrri harkaleg persónuleg átök síðustu forsetakosninga blikna í samanburði við það skítkast og árásir sem blasa við í kosningunum eftir tæpa níu mánuði.

Áróðursherferð gegn Obama í undirbúningi

Athugasemdir

[Sigurður Þórðarson, 17.2.2008 kl. 16:27]

Stebbi, eru þessar fabúleringar ekki dæmigerð spunafrétt?

Eða hverjum dettur í hug að menn treysti Suday Times fyrir helsta hernaðarleyndarmáli og leynivopni sínu?  Ég efa ekki að menn munu grafa upp fortíð frambjóðenda en trúðu mér Stebbi þetta verður alveg örugglega ekki notað. 

Ég hef ekki trú á að  demókratar eða republikanir séu svo hugulsamri að vara keppinautana við ef þeir hafa tromp á hendi.  

[Stefán Friðrik Stefánsson, 17.2.2008 kl. 16:30]

Þetta er dæmi um það sem koma skal. Þetta verður mjög hörð kosningabarátta, gildir þar einu hvort McCain mætir Hillary eða Obama. Það er alltaf eitthvað fært í stílinn í fréttaumfjöllun en það blasir samt við öllum að þetta verður harkaleg barátta, enda um mikið að keppa. Síðustu forsetakosningar, milli Bush og Gore og Bush og Kerry voru mjög harkalegar. Þar var ráðist t.d. að herferli Kerrys, farið yfir lið fyrir lið hvernig hann kaus í lykilmálum og dregin upp persónuleg mynd af honum. Þetta var líka gert við Gore, en heppnaðist betur fyrir maskínu repúblikana hvað varðaði Kerry.

[Haraldur Haraldsson, 17.2.2008 kl. 17:13]

það hefir maður alltaf sagt frá  byrjun að þetta mundi ske ef Obama yrði Forsetaefni þeirra Demokrata,þess vegna verða þau að fara að semja Clinton og Obama um að Hillary verði forsetaefni en hann varaforsetaefni ,og eg held að þetta verði niðurstaða flokksþingsins/annars fer þetta á þann veg, að auðveldur verðir sigur Repulblika/Halli gamli

[Valsól (IP-tala skráð) 17.2.2008 kl. 23:01]

Það er þekkt aðferð hægri manna að nota smjörklýpur til að rakka niður pólitíska andstæðinga sína. Þetta er óheiðarleg óþveraaðferð sem við hér á landi fengum að kynnast í kosningunum 2003 þegar hægri menn notuðu þessar aðferðir á Ingibjörgu Sólrúnu Gísladóttur. Svo það er rétt hjá þér þetta með ljótar aðferðir hægri manna.