Ofbeldið í Breiðholtinu

Ofbeldið og lætin í Breiðholtinu eru að verða daglegt fréttaefni. Sprautunálaránin og Keilufellsmálið hafa vakið mikla athygli, einkum hið síðarnefnda fyrir grimmt ofbeldi, og nú virðist sem að eitt málið enn bætist við. Virðist þó vera týpískt rukkunarmál og dæmi um aðferðirnar í því hvernig menn sækja sér peninga.

Ætla ekkert að dæma um hvort að ofbeldi hafi verið beitt þarna eður ei. En þessi mál í Breiðholtinu eru að sýna okkur svolítið nýjan íslenskan veruleika. Finnst Keilufellsmálið sérstaklega brútalt mál og eflaust eru þau mörg rukkunarmálin sem rata ekki í fjölmiðla þó að þetta tiltekna mál virðist gera það.

Og við stefnum í bandarískan veruleika æ ofan í æ, eins og við sjáum í svo mörgum hasarmyndum.

Þrír rændu manni í Breiðholti

Athugasemdir

[Gestur Trausta (IP-tala skráð) 28.3.2008 kl. 12:26]

Ég held að þetta sé að miklu leyti byggt á því hvernig fjölmiðlar matreiða fréttir.

Gerist eitthvað í Breiðholtinu slá fjölmiðlar því upp sem atvik sem gerist í „Breiðholtinu“. Þannig er fjallað um bruna í „Breiðholti“ eða innbrot í „Breiðholti“ eða líkamsárás í „Breiðholti“. Skýrt dæmi er árásin í Keilufelli. Þar var ávallt talað um árásina í Breiðholti. RÚV gekk svo langt að fullyrða að glæpagengi Pólverja herjaði á landa sína í Breiðholti. Mætti álykta frá því að það væri nóg fyrir Pólverja að flytja í Árbæinn til að losna. Sama dag og árásin í Keilufelli átti sér stað var líkamsárás í Leifsgötu. Meira að segja útlendingar. En þar var fjallað um árás í LEIFSGÖTU – ekki árás í miðbænum. Vandamálið afmarkað við eina götu – ekki heilt hverfi.

Sömu helgi var bruni í miðbænum. Jafnvel grunur um íkveikju en því er ekki slegið upp sem „íkveikja í miðbænum“ – heldur tilgreind ein ákveðin gata.

     Sömu helgi voru íkveikjur í bílum víða á höfuðborgarsvæðinu. Eina hverfið sem var tilgreint var Breiðholtið.

     Svipað gildir um sprauturánin. Mikið hefur verið gert úr þeim í fjölmiðlum en lausleg leit á mbl.is sýnir að á svipuðu tímabili var bankarán við Lækjartorg, rán við Hverfisgötu og rán í Kringlunni. Það þarf ekki mikinn speking til að sjá að þessi rán í Fellunum voru staðbundin og framkvæmd af sömu ógæfumönnunum sem vissu það alla tíð að þeir myndu nást. Skipti ekki máli svo lengi sem þeir næðu næsta skammti.

     Þetta sést líka í umræðu um útlendinga: Ef fjölmiðlar fjalla um nýbúa í Breiðholti er yfirleitt rætt um samfélag nýbúa. Ef rætt er um nýbúa annarsstaðar er yfirleitt rætt um fjölmenningalegt samfélag.

     Tölfræðilega er það enn staðreynd að meiri líkur eru á að vera barin til óbóta í 101 en 109. Staðreyndin er enn sú að fleiri líkamsárásir eru á Akureyri (íbúafj. um 15.000) en í Breiðholtinu (milli 20.000 og 25.000) [og það þrátt fyrir að þessar 15.000 hræður hafa að lágmarki 5 lögreglumenn 24/7 til að halda uppi lögum en í Breiðholtinu er einn hverfislögreglumaður á skrifstofutíma...].  Staðreyndin er sú að á síðasta ári voru fleiri íkveikjur í Vestmannaeyjum en Reykjavík og hlutfallslega ekki fleiri í Breiðholti en öðrum hverfum borgarinnar.

     Breiðholtið er svona eins og KR. Annaðhvort hata menn það eða elska.