Gott viðtal - Hannes spilar vel úr sínum spilum

Mér fannst Hannes Hólmsteinn Gissurarson komast mjög vel frá viðtalinu í Kastljósinu í kvöld. Þar fór hann yfir öll þau mál sem tengjast honum og talaði einlæglega og heilsteypt um það allt. Hann segist hafa lært á mistökum sínum við ritun fyrsta bindis ævisögunnar um Halldór Kiljan Laxness og hyggur á endurútgáfu þess bindis.

Með þessu viðtali tel ég að Hannes Hólmsteinn hafi styrkt stöðu sína og talað um málið allt á nýjum forsendum. Tel að þetta sé snjall leikur í stöðunni fyrir Hannes, enda er alveg óþarfi að vera í meiri hnútuköstum vegna þessara mála í kjölfar bréfaskrifa Kristínar Ingólfsdóttur, háskólarektors, og hæstaréttardómsins fyrir nokkrum vikum. Það þarf að fá endalok á þetta mál og ummæli Hannesar eru liður í því ferli að hann fari út úr því með sóma.

Mér finnst Hannes spila þetta endatafl málsins af skynsemi og mikilli stillingu. Bætir stöðu sína mjög. Umfram allt vona ég að allir málsaðilar hafi lært á málinu - það virðist altént ljóst af ummælum Hannesar Hólmsteins og hinni sterku fjölmiðlaframmistöðu hans í Kastljósinu.

„Ég hefði átt að vanda mig betur"

Athugasemdir

[haraldurhar, 3.4.2008 kl. 22:33]

   Það eru allmerkileg sjónarmið þín að maður er hefur verið dæmdur fyrir ritstuld af Hæstarétti, fari frá dómi sínum með sóma.

  Hannes varði gjörðir sínar með oddi og egg í áraraðir, þó svo fjölmargir fræðimenn kæmu fram og rökstuddu mál sitt á svipaðan hátt og Hæstiréttur.

   Hannes hefur komist upp með það að fara með staðlausa stafi í marga áratugi, og er skemmst að mynnast árása hans á Stefán Ingólfsson, og Indriða Þorláksson er þeir greindu frá að skattbirði einstaklinga hefði aukist, en ekki minnkað eins og haldið hefur verið fram af stjórnmálamönnum.  Hann hefur fleiprað um fiskveiðistjórunarkerfið í áraraðir, án þess að hafa hið minnsta vit á því sem hann hefur verið að fjalla um.  En batnandi mönnum er best að lifa, og Hannes er maður að meiri hafa viðurkennt villu sína í þessu máli.

    Varðandi syndajátingar Hannesar í sjónvarpinu í kvöld, get ég ekki tekið undir að hann hafi telft endataflið vel.

[Stefán Friðrik Stefánsson, 3.4.2008 kl. 22:37]

Jú, mér finnst Hannes hafa tekið þetta endatafl með miklum sóma. Mér fannst hann standa sig vel í kvöld og umfram allt finnst mér hann heill í ummælum sínum og einlægur hvað það varðar að viðurkenna mistökin og klára þetta mál með þeim hætti að iðrast þess að hafa ekki klárað bókina rétt. Það breytir engu um dóminn eða neitt slíkt, en mér finnst hann maður að meiri að tjá sig eins og hann gerði í kvöld. Allir nema harðir andstæðingar mannsins geta tekið undir það.

[Þorvarður Goði Valdimarsson (IP-tala skráð) 3.4.2008 kl. 23:45]

Ég hef alltaf verið hrifinn af eldmóði Hannesar en einhversstaðar verður menntaskólalífið að hætta og alvara lífsins að taka við. Eitt er að kasta fram því "sem manni finnst" og "því sem er rétt". Sannfæringarkraftur Hannesar er mikill og engin spurning að fáir eru jafn klárir í að rökstyðja sín sjónarmið, en spurningu verður að setja við undirstöður rökstuðnings og heimildir sem hafðar eru fyrir hverju því máli því sem er sett fram eða hvort slíkt tilheyri hentisemi hverju sinni.

Ég veit það ekki, bara tilfinning sem ég hef og geri mig kannski sekan um sambærileg vinnubrögð með því að blaðra á þennan hátt.

En hej-hop!, er það ekki nákvæmlega hvað málið snýst um?

Hannes er klár, ekki spurning, en þannig er einnig farið með fullt af öðru fólki líka.

góðar stundir

TG

[Gunnar Th. Gunnarsson, 3.4.2008 kl. 23:54]

Ég er alveg sammála þér Stefán Friðrik. Hann lokar málinu með hófstillingu og auðmýkt.

[Pétur Svavarsson (IP-tala skráð) 4.4.2008 kl. 01:42]

Alveg sammála þér Stefán. Þetta var flott viðtal. Hannes var frábær. Kom mér á óvart. Hann er algjört séní kallinn, alltaf flottur. En er það ritstuldur þegar maður getur heimilda, sem hannn gerði?? Sú umræða hefur farið heldur hljótt finnst mér. Fyrir hvað er hann sekur.

[Þorsteinn Sverrisson, 4.4.2008 kl. 08:17]

Mér fannst viðtalið gott og Hannes er alltaf flinkur í rökræðum. Það leggja allir við hlustir þegar hann talar.  Það er þakkarvert hversu ötull og óþreytandi hann hefur verið að boða boðskap frjálslyndis undanfarna áratugi.  Hann hefur samt einhvernveginn alltaf haft sérstakt lag á því að stuða andstæðinga sína, oft að óþörfu finnst mér. Þannig að það hefur skaðað málstaðinn frekar en hitt.

[Sigurður Ingi Jónsson, 4.4.2008 kl. 12:33]

Líkast til hefur Hannes þegið góðra manna ráð fyrir Kastljósþáttinn og reynt að koma til skila auðmýkt og yfirlýsingar um betrun.

Það er ekki víst að það dugi honum til frambúðar, þá sér í lagi ekki í starfi sem prófessor við HÍ.

Kristín Ingólfsdóttir, rektor HÍ, hefur lýst mjög metnaðarfullri áætlun um að koma HÍ á blað sem einn af 100 bestu háskólum heims. Það er á brattan að sækja þar, því skólinn er nú í sæti 258 á lista "Webometric Ranking of World Universities" samkvæmt Cybermetrics Lab hjá CSIC á Spáni. Hjá öðrum kemst hann ekki á lista yfir topp 500.

Fari svo að framtíðaráform rektors HÍ rætist ekki með HHG í stöðu prófessors, þá gætu einhverjir freistast til að kenna því um.