Ásthildur Helgadóttir hættir í boltanum

Ásthildur Helgadóttir hefur ákveðið að leggja skóna á hilluna og hætta virkri þátttöku í fótbolta. Koma þessi tíðindi í kjölfar yfirlýsingar fyrr í dag um að hún sé hætt hjá Malmö. Þetta eru nokkur tíðindi, enda á Ásthildur að baki farsælan feril í íþróttum og er hiklaust ein besta knattspyrnukona landsins fyrr og síðar. Hefur Ásthildur átt við erfið meiðsli að stríða og er ákvörðun um að hætta tekin væntanlega vegna þeirra. 

Ásthildur hefur verið glæsileg fyrirmynd kvenna í íþróttum og hefur verið áberandi í hópi knattspyrnukvenna sem rifu upp kvennalandsliðið til vegs og virðingar á alþjóðavettvangi á síðustu árum. Hún hefur þó ekki bara verið áberandi í íþróttum. Í fyrra náði hún glæsilegum árangri í prófkjöri Sjálfstæðisflokksins í Kópavogi og náði kjöri í fjórða sætið á framboðslistanum og var kjörin bæjarfulltrúi í kosningunum í maí 2006.

Eftir því sem mér skilst hefur Ásthildur verið í leyfi frá setu í bæjarstjórn Kópavogs nú um skeið. Það verður áhugavert að sjá hvort að hún ætli að taka þar sæti aftur og fara fram í næstu kosningum, jafnvel ofar á framboðslistann, eða hvort hún ætlar eingöngu að fara í verkefni tengd verkfræðimenntun sinni við lok íþróttaferilsins. 

Ásthildur Helgadóttir hætt hjá Malmö

Árás á íslenska konu í Mósambík

Það er alltaf sláandi að heyra af árásum á Íslendinga á erlendri grund. Sem betur fer fór vel miðað við aðstæður hjá þessari íslensku konu í Mósambík. Það er eðlilegt að um þetta sé fjallað hérna heima, enda erum við svo fámenn þessi þjóð að þrengingar eins verða í sjálfu sér mál okkar allra. Eða það ætti almennt að verða svo finnst mér.

Annars er þetta eflaust lýsandi um ástandið á þessum slóðum. Rán eru því miður daglegt brauð víða á strætum þarna. Þar sem eymdin er jafnan mest er örbirgðin svo mikil að fólk rænir sér til viðurværis, til að hafa í sig og á. Það er eitthvað sem er mjög fjarri almennt okkar veruleika en verður stingandi þegar að Íslendingar finna fyrir því.

Ráðist á íslenska stúlku

Sorglegt mál

Það er eðlilegt að fólk í Reykjanesbæ sé slegið vegna hins sorglega slyss á föstudag þar sem lítill drengur slasaðist það alvarlega að hann lést. Sérstaklega er ekki hægt annað en að taka undir með kröfum íbúanna við Vesturgötu þar sem slysið varð. Það er víða keyrt of hratt í götum við íbúabyggð og tekið hefur jafnan verið á því með hraðahindrunum og eða öðrum leiðum til að slá á umferðina í svokölluðum vistgötum þar sem hraðamörk eru lægri en ella.

Árni Sigfússon, bæjarstjóri, talaði af ábyrgð um þessi mál í gær í fréttatímum og ég get ekki betur séð en að samstaða ætti að geta nást um að taka á þessum málum þar sem fólk telur hættu á ferðum vegna umferðar. Þekki þetta svosem vel enda bý ég við eina mestu umferðargötuna á Akureyri, sem er Þórunnarstræti. Þar er mikil umferð daga og nætur. Það hafði jákvæð áhrif að breyta veginum við leikskólann Hólmasól og sló aðeins á hraðann.

En samt eru áhyggjur þeirra sem búa í miklum umferðargötum skiljanlegar. Það er þó mjög dapurlegt að svo sorglegt slys þurfi til að fólk vakni til meðvitundar um að úrbóta sé þörf.

„Við viljum ekki sjá annað svona slys í götunni okkar“

Drengurinn látinn

Drengurinn sem keyrt var á í Reykjanesbæ síðdegis á föstudag er látinn. Ég vil votta fjölskyldu stráksins innilega samúð mína.


Víkurfréttir á Suðurnesjum fullyrða á vef sínum í kvöld að maðurinn sem handtekinn var fyrir að keyra á drenginn sé útlendingur. Þetta hefur reyndar visir.is fjallað um ennfremur. Veit ekki hvort að sú staðreynd að útlendingur hafi orðið valdur að dauða drengsins í Reykjanesbæ hafi áhrif á umræðuna um málið. Kannski má búast við því að það leiði enn til umræðu um útlendingamál, í ljósi nauðgunarmála og fjölda annarra mála sem hafa verið í umræðunni. Ætla að vona að það verði ekki aðalatriði þessa hörmulega máls.

Það sem skiptir mestu máli á þessu stigi er að upplýst verði hver keyrði á drenginn og hvers vegna hann hafi yfirgefið vettvang slyssins án þess svo mikið sem að hringja á aðstoð. Það tel ég að allt venjulegt fólk hefði gert í stöðunni. Kannski hefur viðkomandi óttast að taka á sig ábyrgð á málinu vegna þess að hann var útlendingur og farið á taugum vegna þess. Erfitt um að segja. Það er mikilvægast að upplýsa lykilatriði málsins áður en annað verður svosem rætt.

Skiljanlega er fólk slegið í Reykjanesbæ og um allt land vegna þessa máls. Þetta mál er enda í alla staði hinn mesti harmleikur. Sú staðreynd að ökumaðurinn stingi af frá vettvangi gerir það að öllu leyti verra. Það er sem betur sjaldgæft að svona gerist hér á landi og hafi það gerst hefur viðkomandi jafnan gefið sig fram. Veit ekki hvort það hafi verið tilfellið í þessu máli en svo virðist þó ekki vera af fréttaumfjöllun að dæma.

Það má vera að hefnd sé fyrsta hugsun margra í þessu máli. Hefndin gerir þó ekkert gott í tilfelli á borð við þetta. Það sem skiptir mestu máli er að lögreglan hafi handtekið réttan mann og rannsókn málsins fari rétta leið í kjölfar þess.

Ökumaðurinn á bláa skutbílnum handtekinn

Það er ánægjulegt að ökumaðurinn á bláa skutbílnum í Reykjanesbæ hafi verið handtekinn. Þá ætti að vera hægt að fylla upp í heildarmynd þessa sorglega máls. Eins og ég sagði fyrr í dag hlaut hringurinn um viðkomandi að þrengjast mjög og aðeins tímaspursmál hvenær maðurinn yrði í haldi lögreglu.

Fyrst og fremst verður áhugavert að vita ástæður þess hversvegna maðurinn yfirgaf vettvanginn og skildi strákinn eftir í sárum sínum. Það er stærsta spurning þessa dapurlega máls í raun og veru. Það má skynja að fólki er verulega brugðið vegna þessa máls og margir hafa tjáð sig um það.

Það er engin furða að svo sé. Það er stóralvarlegt mál þegar að fyrsta hugsunin eftir svona slys er að stinga af og taka ekki ábyrgð á gjörðum sínum. Ég get ekki séð að undrunarefni sé að fólk sé undrandi og slegið vegna þess og tjái sig óhikað um það.

Maður í haldi, bíll í rannsókn

Athugasemdir

Ég vil benda á ábendingar mínar varðandi athugasemdir hér á síðunni. Skilmálar varðandi athugasemdir eru mjög skýrir og ættu ekki að fara framhjá neinum manni. Það eru nokkrar vikur síðan að ég setti lás á athugasemdir. Þær birtast nú ekki nema að ég samþykki þær. Tók það skref eftir persónuleg leiðindaskrif í kommentum og sé ekki eftir þeirri ákvörðun. Hún var tímabær.

Ég vil leyfa heiðarleg skoðanaskipti hér, en að sama skapi geta þeir sem vilja vera með persónulegt skítkast og almenn leiðindi verið á öðrum vettvangi en hér. Þeir sem geta ekki viðhaft málefnalegheit og almenna kurteisi í athugasemdum hér er vísað út í hafsauga með það sama. Hika ekki við að loka á þá sem brjóta þær fáu og sjálfsögðu reglur sem ég hef sett um athugasemdir.

Verðskuldaður heiður fyrir Margréti Pálu

Það er óhætt að segja að Margrét Pála Ólafsdóttir, framkvæmdastjóri og hönnuður Hjallastefnunnar, verðskuldi að hljóta barnamenningarverðlaunin. Hún hefur markað skref í skólamenninguna hér á landi og verið talsmaður nýrra hugmynda í skólamálum sem vakið hafa athygli og verið farsælar.

Hjallastefnan hefur verið áhrifavaldur víða um land og braut upp gamaldags skólakerfi hér á sínum tíma og opnaði eiginlega nýja sýn á það fyrir okkur öll. Margrét Pála fékk mörg góð tækifæri og hefur sannarlega staðið undir þeim og gott betur en það. Það höfum við séð t.d. hér á Akureyri, en Hjallastefnan rekur hér leikskólann Hólmasól með glæsibrag.

Fannst samt Margrét Pála rísa eiginlega hæst í málflutningi sínum þegar að hún sagði í Silfri Egils síðasta vetur að sjálfstæður skólarekstur gæti verið konum til hagsbóta, veitt þeim áhrif, myndugleik og umfram allt betri laun í staðinn fyrir að þær séu það sem hún nefndi "valdsviptar vinnukonur kerfisins". Hún leiftraði af mælsku við útskýringarnar.

Margrét benti þar enda á að um 60% kvenna væru að vinna hjá hinu opinbera, en það væri aðeins rúmlega 20% karla. Held að vinstri grænir hafi aldrei stuðast eins mikið og þá, gleymi aldrei svipnum á Guðfríði Lilju Grétarsdóttur sem var í þættinum með henni. Ögmundur var líka fljótur að svara Margréti Pálu í einhverri grein. Svona frjálsræði og hugsun hugnaðist ekki vinstri grænum.

Margrét Pála er fyrst og fremst þekkt fyrir þetta; frumlega nálgun og skemmtilega óvænta. Hún er þó ekki með neitt blaður út í bláinn, heldur er krafturinn og farsældin sýnileg í verkum Margrétar Pálu. Óska henni til hamingju með þennan heiður.

Margrét Pála hlaut Barnamenningarverðlaun

Ofurhugi fellur frá

Það verður ekki um það deilt að einn mesti ofurhugi 20. aldarinnar hafi verið Evil Knievel. Hugdirfska hans og sýniþörf fyrir að svífa í lausu lofti hefur verið rómuð alla tíð. Fáir hafa náð þeim hæðum sem hann náði í orðsins fyllstu merkingu. Evel Knievel bæði græddi og tapaði á þessari hugdirfsku. Stundum virkaði hann á fólk eins og kötturinn sem kom standandi niður.

En það kom fyrir að hann slasaðist mikið í atriðum sínum, eftirminnilegast var það væntanlega er hann kom niður á bakinu af áhættuatriði sínu af vélhjóli og var hann yfir þrjú ár að jafna sig, enda fór hann mjög illa. Fræg er sú saga að hann hafi brotið nærri hvert bein í líkamanum á ferlinum. Oftar en ekki voru atriði hans stórvel heppnuð. En hann fór mjög illa með heilsu sína í þessum bransa og væntanlega má rekja andlát hans á hinum tiltölulega besta aldri til þessarar hugdirfsku sinnar.

En minningin um Evel Knievel lifir. Hann var að mörgu leyti algjörlega einstakur. Verk hans og hugdirfska voru sönn í gegn. Knievel var mörgum fyrirmynd - fjöldi þeirra sem leika áhættuatriði með hans brag nefna hann sem þann er þeir vilji líkjast í sínum verkum. En enginn hefur náð hæðum hans og fimni - og gerir varla.

Evel Knievel látinn