Hátíðleg jólastund

Jólin hafa verið stund hátíðleika og helgi í huga mér, eins og eflaust allra þeirra sem vefinn lesa. Veðrið hér hefur verið heilt yfir mjög gott, en það bætti allhressilega í jólasnjóinn seinnipartinn í dag og verður því ekki hægt að kvarta yfir snjóleysi þessi jólin. Sem betur fer. Það er mikilvægt að slappa vel af á jólunum og njóta lífsins, eins og frekast er unnt. Hefur það sannarlega verið í heiðri haft á þessum jólum, en ég reyni að forðast tölvuna á þessum dögum.

Heilt yfir hafa þetta verið mjög hefðbundin jól hjá mér. Aðfangadagskvöldið mitt var mjög líkt þeim hinum fyrri. Eftir góðan mat, jólakorta- og pakkastund, var farið í miðnæturmessu, sem var notalegur endir á heilögum degi venju samkvæmt. Í dag hefur bókalestur og jólaboð verið í aðalhlutverki. Er að lesa ævisögu Davíðs Stefánssonar frá Fagraskógi. Hef alltaf verið heillaður af ljóðum Davíðs og það er sannarlega áhugavert að lesa bók um ævi skáldsins. Sogaðist gjörsamlega að þessari bók eftir miðnættið í gærkvöldi og kláraði þá þegar nokkra kafla og hélt svo áfram með hana í dag og er að fara að lesa aftur á eftir smá.

Davíð Stefánsson var litríkur karakter og honum er heiðarlega og vel lýst í þessari bók, allavega það sem af er lestrinum hið minnsta. Þetta var svona sú bók um jólin sem heillaði mig mest og hún veldur ekki vonbrigðum. Enda er varla hægt að gera leiðinlega ævisögu um mann af kalíberi Davíðs Stefánssonar. Næst stendur til að lesa bókina um Halldór Laxness eftir Ólaf Ragnarsson; þar sem Ólafur gerir skil síðustu samtölum sínum við skáldið og síðustu æviárum hans. Ólafur á mikið hrós fyrir að hafa klárað bókina, en hann er mikið veikur og berst við illvígan sjúkdóm. Það verður sérstaklega áhugavert að lesa þessa bók og að ég tali ekki um viðtalsbók Péturs Blöndals við skáld.

Ekki er hægt að kvarta yfir matarleysi á degi sem þessum. Í jólaboðunum sem ég var í, í dag svignuðu borð undan góðum krásum, hangikjöti og meðlæti, auk veisluborðs með brauði. Þar var notalegt spjall og hátíðarstund. Allt eins og best verður á kosið. Heilt yfir eru þetta notalegir dagar. Lífið verður eiginlega aldrei skemmtilegra en á hátíð ljóss og friðar, þar sem skammdegið er lýst upp af sælu og gleði.

En semsagt, yndisleg og góð jól - hátíð í bæ. Vona að þið hafið það öll sem best á þessum hátíðlega tíma.

Gleðileg jól!