Isabel Peron handtekin... en látin svo laus

Isabel Peron, fyrrum forseti Argentínu, sem er 75 ára gömul, var handtekin í Madrid á Spáni í gærkvöldi. Isabel hefur búið á Spáni frá árinu 1981, en hún varð fyrsti kvenforseti heimsins og sat við völd á Argentínu árin 1974-1976, en hún varð forseti við lát eiginmanns síns, hins umdeilda Juan Domingo Peron, sem tvívegis varð forseti Argentínu, í fyrra skiptið við hlið hinnar áhrifamiklu Evitu, eiginkonu sinnar, og síðar við hlið Isabel, en hann var þá farinn að heilsu.

Isabel var látin laus gegn skilyrðum skömmu eftir handtökuna, en yfir henni vofir að vera framseld til Argentínu, landsins sem hún dvaldi aðeins í sem þegn í tæpan áratug, en varð samt þjóðhöfðingi þess. Hún og Peron komu úr útlegð hans árið 1973, þá hafði Peron ekki komið þangað í 18 ár, en honum var steypt af stóli í byltingu árið 1955. Hann gerði Isabel að varaforseta sínum. Isabel, sem var næturklúbbadansmær í Panama á sjötta áratugnum, er hún kynntist Peron, erfði svo stjórn landsins er Peron féll frá. Það varð svo sannarlega brösugt tímabil, sem endaði með kuldalegum hætti.

Í stuttum pistli hér í gær fór ég yfir bakgrunn Isabel og pólitíska sögu þeirra hjónanna, sem er auðvitað stórmerkileg þó seint verði hún talin glæsileg. Valdatími Isabel, sem auðvitað var algjörlega óreyndur stjórnmálamaður og hafði ekki hundsvit á málefnum Argentínu eða gat ekki verið andlit stjórnmálatilveru þar, var þyrnum stráður og að því kom auðvitað að honum lauk með hranalegum hætti. Herinn steypti henni af stóli. Hún var enda vissulega mjög utanveltu stjórnmálamaður og hafði það ekki til að bera sem þurfti til að stjórna landinu, sem eins og fyrr og síðar hefur verið mjög hriktandi af hernaðarlegum og fjárhagslegum krísum.

Isabel, sem markaði spor í söguna með forsetaferlinum, vill varla halda aftur til Argentínu. Stjórnvöld þar vilja að hún svari til saka fyrir að bera ábyrgð á mannránum og mannshvörfum þegar hún var forseti Argentínu á árunum 1974-1976. Hún er nú komin í sömu stöðu og Augusto Pinochet, annar litríkur forystumaður í s-amerískum stjórnmálum undir lok tíunda áratugarins og eftir það; að vera á flótta undan réttvísinni. Það verður fróðlegt að sjá hver örlög þessarar hálfáttræðu konu verða, fyrsta kvenforsetans í sögu heimsins.

Isabel Perón látin laus með skilyrðum

Athugasemdir

[Hlynur Hallsson, 13.1.2007 kl. 09:44]

Samkvæmt frétt á vísi hefur Isabel Peron verið framseld til Argentínu sem vonandi reynist rétt því þar á hún yfir höfði sér ákærur fyrir blóðuga slóð hægrimanna eða dauðasveita fyrrum stjórnvalda. Ég trúi því að hún verði dæmd ólíkt óþokkanum Pinochet sem slapp alltaf. Bestu kveðjur,

[Stefán Friðrik Stefánsson, 13.1.2007 kl. 10:02]

Isabel var handtekin og færð fyrir dómara í gær, en hún hefur ekki verið framseld. Henni hefur verið gert að gera grein fyrir sér hjá lögregluyfirvöldum á 15 daga fresti og með því er fylgst að hún yfirgefi ekki Spán. Argentínskum yfirvöldum hefur verið veittur frestur til að skýra nánar mál sitt og leggja fram formleg gögn um ástæður ákæru og fleiri þætti, ef marka má BBC.