Árni Johnsen inni á lista kjörnefndar í Suðrinu

Árni Johnsen, fyrrum alþingismaður, er annar á lista Sjálfstæðisflokksins í Suðurkjördæmi skv. lokatillögu kjörnefndar flokksins í kjördæminu, sem nú hefur lokið störfum. Kjördæmisþing mun á sunnudag taka endanlega ákvörðun um framboðslistann. Flestir sjálfstæðismenn bíða spenntir eftir endanlegri ákvörðun um framboðslistann, en pólitísk endurkoma Árna hefur verið mjög umdeild, sérstaklega eftir að Árni lét þau ummæli falla að afbrot hans árið 2001 hefðu verið tæknileg mistök.

Andstaðan innan Sjálfstæðisflokksins gekk svo langt að Samband ungra sjálfstæðismanna og Landssamband sjálfstæðiskvenna ályktaði gegn Árna með áberandi hætti fyrir jólin. Síðan hefur lítið borið á Árna, utan þess að hann skrifaði grein í Morgunblaðið í nóvemberlok sem merkja mátti sem afsökunarbeiðni á ummælunum umdeildu. Mörgum fannst þó sú grein koma of seint og afsökunarbeiðnin eilítið hol. Enn eru skiptar skoðanir á því hvort Sjálfstæðisflokkurinn ætli að hafa Árna sem frambjóðanda í sínu nafni í vor.

Það verður fróðlegt að fylgjast með þessu máli um helgina. Á sunnudag ráðast örlög í þessu máli. Kjördæmisráð mun taka endanlega ákvörðun um listann og ráða því hvernig flokkurinn á svæðinu ber fram listann. Það verður athyglisvert að fylgjast með því hvort að tillaga muni verða á fundinum um að breyta röð listans og stokka hann upp að einhverju leyti. Ljóst er að ekki eru allir sáttir við veru Árna á listanum, en fróðlegt hvort tillaga um veru hans komi fram. Sögum um það ber ekki saman og því bíða flestir fundarins eftir endanlegum lista sem flokksmenn á svæðinu staðfesta.

Athugasemdir

[Heimir Lárusson Fjeldsted, 17.1.2007 kl. 13:17]

Fyrir flokkinn held ég að sé betra að hafa svo Frjálslyndan innanborðs.

[Snorri Magnússon (IP-tala skráð) 18.1.2007 kl. 11:03]

Bíð spenntur eftir því hvað gerist um helgina.  Búinn að taka endanlega ákvörðun um það að kjósa EKKI Sjálfstæðisflokkinn verði Árni í framboði.  Hef þó kosið flokkinn frá því að ég fékk kosningarétt fyrir rúmum tveimur áratugum.

Þó nokkrir vinnufélagar mínir, sem munu gera slíkt hið sama, og þar að auki veit ég um einn sem formlega sagði sig úr flokknum vegna þessa.

[Óskar Þór Hallgrímsson (IP-tala skráð) 18.1.2007 kl. 17:32]

Já ég bíð spenntur, hann mun stór skemma okkar starf sem erum að vinna fyrir flokkinn til að auka vegsemd hans.  Óþolandi mál sem ætti ekki að getað átt sér stað.