Tony Blair yfirheyrður öðru sinni af lögreglu

Tony Blair, forsætisráðherra Bretlands, hefur verið yfirheyrður öðru sinni af lögreglu vegna "Cash-for-honours"-skandalsins. Blair hefur réttarstöðu vitnis í málinu. Málið þykir sífellt vera að spinna upp á sig og staðan að versna fyrir forsætisráðherrann. Nokkrir dagar eru síðan að Levy lávarður, sem verið hefur einn helsti forystumaður fjármálaráðs Verkamannaflokksins, var handtekinn og ennfremur Ruth Turner, sem hefur verið yfirmaður almannatengslamála í D10.

Þetta hneykslismál, sem byggist á því að Verkamannaflokkurinn hafi þegið 14 milljóna punda lán frá auðmönnum fyrir þingkosningarnar árið 2005 í skiptum fyrir góð sæti í lávarðadeild breska þingsins og umtalsverð áhrif, þykir vera sérlega vont fyrir Blair og Verkamannaflokkinn í ljósi þess að Blair hafði á sér blæ heiðarleika við komu sína til valda og hann væri nýr valkostur nýrra tíma. Það yrði mjög táknrænt myndi þetta mál skaða pólitíska arfleifð hans og það myndi festast við hann með afgerandi hætti.

Sumir telja þetta vera mál af sama skala og Watergate-hneykslið sem eyðilagði bæði stjórnmálaferil og pólitíska arfleifð Richards M. Nixon. Það skal ósagt látið hvort sé. Það er þó öllum ljóst að þetta mál er hið allra versta fyrir Blair og pólitíska arfleifð hans og skaðlegt fyrir Verkamannaflokkinn. Framvinda þessa máls er að verða ótrúleg hreint út sagt og í raun má segja að pólitísk framtíð Blairs ráðist af því hvernig að þessi rannsókn muni í raun fara er á hólminn kemur.

Það þarf ekki færan stjórnmálaskýranda til að sjá að þetta mál er hið versta fyrir bresk stjórnvöld. Séu þessar ásakanir réttar munu þær enda loða alla tíð við nafn forsætisráðherrans og ekki síður flokksins sem hann stýrir. Það mun loða við þó að Blair yfirgefi Downingstræti 10. Reyndar má segja að svo gæti farið að þetta mál yrði pólitísk endalok Blairs, sem ríkt hefur í D10 í áratug í maí. Það yrðu sagnfræðilega séð merkileg endalok á ferli hans kæmi til þess.

Blair yfirheyrður öðru sinni