Björn vill heilbrigðismálin til sjálfstæðismanna

Björn Bjarnason, dómsmálaráðherra, segir á heimasíðu sinni orðið tímabært að Sjálfstæðisflokkurinn fái heilbrigðisráðuneytið í sinn hlut og fái tækifæri til að takast á við málaflokkinn. Tveir áratugir eru liðnir frá því að Sjálfstæðisflokkurinn hafði síðast ráðuneytið undir sinni verkstjórn og aðeins tveir sjálfstæðismenn hafa setið á ráðherrastóli þar frá stofnun ráðuneytisins árið 1970; þau Matthías Bjarnason og Ragnhildur Helgadóttir.

Tek ég heilshugar undir þessa skoðun Björns. Nú hefur Sjálfstæðisflokkurinn verið samfellt í ríkisstjórn í sextán ár, fyrstu fjögur ár þess tíma var málaflokkurinn hjá Alþýðuflokknum en í tólf ár, eða frá árinu 1995, hefur Framsóknarflokkurinn haft heilbrigðismálin. Hefði farið vel á því að við sjálfstæðismenn hefðum fengið þennan málaflokk í okkar hlut eftir alþingiskosningarnar 2003, enda verið rétt og eðlilegt þá að meiri hrókeringar hefðu orðið á ráðuneytum. Heilbrigðismálin voru sá málaflokkur sem ég hefði allavega helst viljað í hlut flokksins þá.

Það er langur tími liðinn, heilir tveir áratugir, liðnir frá því að sjálfstæðiskonan Ragnhildur Helgadóttir var heilbrigðisráðherra. Síðan hafa kratar og framsóknarmenn leitt verkin þar, eins og fyrr segir lengst af í samstarfi við Sjálfstæðisflokkinn. Verði Sjálfstæðisflokkurinn í ríkisstjórn í vor finnst mér mjög mikilvægt að hann fái ráðuneytið í sinn hlut.

Sjálfstæðismenn fái heilbrigðismálin

Athugasemdir

[Haraldur Haraldsson, 12.2.2007 kl. 11:15]

Tek heilsuhugar á undir þetta með ykkur Birni ,þetta er það sem koma skal,þó fyrr hefði verið / Halli Gamli

[Eiríkur Kjögx (IP-tala skráð) 12.2.2007 kl. 11:51]

Það þarf nú ekki heilt heilbrigðisráðuneyti til að laga undarlegar draumfarir ykkar Bíbí og Sjálfgræðisflokkurinn verður hvergi við völd á næstunni, ekki einu sinni í kvenfélaginu á Dalvík!

[Siggi (IP-tala skráð) 12.2.2007 kl. 12:57]

Það er kannski kominn tími til að Pétur Blöndal verði heilbrigðisráðherra. Hann er stærðfræðingur og getur reiknað út og suður.

Nú eða Árni Johnsen?  Báðir þessir menn eru glæsilegir fulltrúar Sjálfstæðismanna á Alþingi íslendinga.