Ríflegur samgöngupakki næsta áratuginn

Þá hefur hulunni verið svipt af samgönguáætlun næsta áratugar, árin 2007-2018. Þar eru mörg stór samgönguverkefni kortlögð til fulls. Mikil leynd hefur ríkt yfir áætluninni og hefur stjórnarandstaðan flutt ófáar ræðurnar þar sem spurt er út í komandi verkefnum á meðan að áætlunin var enn í vinnslu í þingflokkum stjórnarflokkanna.

Gert er ráð fyrir að heildartekjur og framlög til samgönguáætlunar verði 381,4 milljarðar króna á þessum ellefu árum sem áætlunin lýsir og af þeirri upphæð renni kringum 324 milljarðar króna eða 85% til vegamála. Til flugmála renna kringum 35 milljarðar og siglingamála 22 milljarðar. Vinna við áætlunina hefur staðið lengi og kominn tími til að hjúpa hulunni af henni. Samgöngumálin eru þess eðlis að allir vilja að munað sé eftir þeirra svæði og átök milli kjördæma og svæða verða óhjákvæmileg.

Í nóvember boðaði Sturla Böðvarsson, samgönguráðherra, stórátak í vegamálum á fundi Samtaka verslunar og þjónustu. Það var vissulega ánægjulegt að heyra það. Þá boðaði hann fjögurra akreina veg hingað norður til Akureyrar og austur að Markarfljóti, þangað sem beygt yrði niður að Bakkafjöru og höfn sem byggð yrði þar fyrir Vestmannaeyjaferju. Það var ánægjulegt að heyra þá að ráðherrann hefði einhvern metnað fyrir því að bæta samgöngur norður og leggja jafnvel fjögurra akreina veg hingað norður í land.

Allir sem fara leiðina Akureyri - Reykjavík sjá vel að leiðin er löngu sprungin og kominn tími til að hugsa stórt í þessum efnum. Okkur hér fyrir norðan hefur fundist leitt að ráðherrann hafi ekki hugsað nógu stórt varðandi styttingu leiðarinnar. En það er eins og það er bara. Það verður allavega fróðlegt að kynna sér samgönguáætlunina; sjá verkefni næsta áratugar og hugmyndir framtíðarinnar birtast þar.

Samgöngumál skipta alla landsmenn miklu máli og því er þessi áætlun stórt og mikilvægt plagg, ekki bara tölur á hvítum ráðuneytisblöðum.

Rúmir 380 milljarðar til vegagerðar á næstu 11 árum

Athugasemdir

[Kristján Pétursson, 12.2.2007 kl. 17:05]

Þessar áætlanir ríkisstjórnarinnar rétt fyrir kosningar eru eins og ávallt áður ómarktækur kosningaáróður,enda engin raunhæf fjárhagaáætlun,sem stendur henni að baki.Sama gildir um fyrirhugaða miljarða til Háskóla Íslands og landbúnðarmála.Fjárveitinganefnd og alþingi hefur ekkert samþykkt í þessum efnum.Þetta eru bara innistæðulaus ráðherraraup,en það er hægt að láta sig dreyma um bjartari framtíð, þegar þessi sárþreytta og úrræðalausa ríkisstjórn fer frá völdum.

[Óskar Helgi Helgason (IP-tala skráð) 12.2.2007 kl. 17:06]

Sæll, Stefán Friðrik !

Heldur er þetta þunnur þrettándi, hjá Sturlu frænda mínum; þarna hefðu þurft að vera, miðað við tímabilið a.m.k 590 - 600 milljarðar. Veit ekki betur, en þið, á Norðurlandi hafið verið í verulegu svelti, samgöngulega, að undanförnu. Þú segir, í ágætum inngangi þínum '' Allir sem fara leiðina Akureyri - Reykjavík sjá vel að leiðin er löngu sprungin og kominn tími til að hugsa stórt í þessum efnum. Okkur hér fyrir norðan hefur fundist leitt að ráðherrann hafi ekki hugsað nógu stórt varðandi styttingu leiðarinnar. En það er eins og það er bara.''

Stefán Friðrik! Er þetta ekki fullmikil hógværð, í þessum orðum þínum, gagnvart frænda ? Hvað mætti ekki gera, t.d. við þá milljarða, sem samráðherrann, Valgerður Sverrisdóttir hefir fyrir sig, og sitt ryckti, í utanríkisráðuneytinu ? Ég hygg, að leitun sé á kurteisari og hógværari manni, hér á spjallsíðum; en þér Stefán Friðrik, og engin finnst mér, a.m.k. Vestlendingi að hálfu, mótpart Sunnlendingi, ástæðan; að þakka neitt sérstaklega fyrir þetta lítilræði, til vegamálanna. Viðurkenni þó góðar meiningar Sturlu, sem fyrr, og mætti hann sitja sem allra lengst, í sínu ráðuneyti, burtséð frá úrslitum komandi kosninga, eða annars, enda einn ágætasti Snæfellingur hinna seinni ára, undan Jökli.

Vildi ei mála neinn skratta á vegg, Stefán, en þetta eru nú mínar meiningar samt, má til, að endingu að nefna, enn og aftur löngu tímabært niðurlag mont þjóðhöfðingja embættisins, að Bessastöðum!, hvar ná mætti í enn meiri fjármuni, til vegagerðar, m.a. 

Með beztu kveðjum, í Norðuramt / úr Árnesþingi

Óskar Helgi Helgason, frá Gamla Hrauni og Hvítárvöllum         

[Stefán Friðrik Stefánsson, 12.2.2007 kl. 23:19]

Takk fyrir kommentin.

Óskar Helgi: Þakkir fyrir skemmtilegar pælingar. Nei, það verður seint sagt að við Norðlendingar séum hoppandi eins og sjá má í skrifum hér seinna í kvöld, eftir þessi skrif sem þú kommentaðir á. Stigin eru góð skref með þessari ellefu ára áætlun en vissulega er alltaf hægt að gera betur og ekki hefðum við kvartað yfir því að meira hefði verið litið í áttina til okkar.

mbk.