Jón Magnússon leiðir frjálslynda í Reykjavík suður

Það hefur nú verið tilkynnt opinberlega að Jón Magnússon, lögmaður, muni leiða lista Frjálslynda flokksins í Reykjavík suður. Það kemur ekki að óvörum, enda blasað við eftir að forysta flokksins batt trúss sitt við hann að Jóni væri ætlaðar vegtyllur innan flokksins. Forysta frjálslyndra hefur talað um Jón sem hvern annan flokksmann en væntanlega mun það tal þagna núna þegar að ljóst er að forystan ætlar að reyna að koma honum á þing.

Jón leiddi Nýtt afl í kosningunum 2003 í Reykjavík suður. Nú leiðir hann lista frjálslyndra í sama kjördæmi, kjördæminu þar sem Margrét Sverrisdóttir var síðast í forystusveit. Eins og flestir vita mun Margrét væntanlega leiða nýtt framboð í sama kjördæmi, þannig að þau munu hittast í kosningabaráttunni, rétt eins og þeirri síðustu, og takast á. Má þar búast við líflegri rimmu, enda hafa skot gengið þeirra á milli um stöðuna innan Frjálslynda flokksins.

Það að forysta frjálslyndra leiði Jón Magnússon til öndvegis hjá flokknum í höfuðborginni segir allt sem segja þarf um að flokkurinn ætlar að keyra baráttu sína á innflytjendamálunum. Skoðanir Jóns hafa verið mjög umdeildar og ekki fallið öllum í geð. Kaffibandalagið gufaði upp sem trúverðugur valkostur í vor vegna þess að frjálslyndir bökkuðu upp innflytjendatal Jóns sem leiðarstef sitt. Það verður athyglisvert að sjá hvort að Jón geti klárað kosningabaráttuna án þess að minnast á þessi mál. Ekki munu margir veðja á það.

Það hefur verið vitað mál allt frá innkomu Jóns með atbeina forystu frjálslyndra að honum væri ætlað forystuhlutverk. Ef marka má nýjustu skoðanakönnun Gallups er Jón inni á þingi fyrir suðurhluta borgarinnar. Fróðlegt verður að sjá næstu könnun og ekki síður hvernig baráttan vindur upp á sig og hvort að forysta frjálslyndra fari nú að kannast við leiðtogaefnið sem þeir ætla að búa til úr Jóni í sínu nafni.

Athugasemdir

[Steini Briem (IP-tala skráð) 26.2.2007 kl. 14:11]

Enda þótt Jóni hafi verið hleypt úr skjóðunni hefur það engin áhrif í Himnaríki.

[Ragnar Bjarnason, 26.2.2007 kl. 15:23]

Ég er sammála þér í því að þetta kemur ekkert á óvart enda fyrir mér vitað mál að Jón M. hefði ekki leitt sinn "her" í Frjálslynda fyrir önnur býtti en fyrsta sæti á lista með það auðvitað fyrir augum að komast á þing. Hann hefur marga fjöruna sopið í þeim efnum, þ.e.a.s. að reyna á þing að komast, en allt hefur það nú reynst fullerfitt hingað til. Ég sé ekki að hann hafi neitt meira í hlutina að gera núna þó á nýjan völl sé kominn. Frjálslyndir fengu rúm 2448 atkv. í RS síðast og Nýtt afl 504 og samanlagt (8%) dugar það líklega ekki fyrir þingsæti. Þá verður auðvitað að hafa í huga að MS fer líklegast fram í RS eins og þú segir og líklega tekur hún helling af atkvæðum frá Frjálslyndum og í raun mun líklegra að hún næði þingsæti. Þetta eru slæm skipti fyrir Frjálslynda flokkinn, bæði mannalega séð sem og stefnulega.

[Stefán Friðrik Stefánsson, 26.2.2007 kl. 20:27]

Takk fyrir kommentin Keli og Raggi. Mjög sammála ykkur.

mbk.