Sorglegt

Það er sorglegt að heyra af enn einu banaslysinu í umferðinni. Þetta er það fyrsta á árinu 2007 - og það gerist hér á þessu svæði, við Krossastaði í Hörgárdal. Árið 2006 var eitt það sorglegasta í umferðinni hérlendis. 30 létu þá lífið í umferðarslysum hérlendis. Það var mjög napurt ár, enda veit ég að margar fjölskyldur voru í sárum á þeim krossgötum, sem þeim fylgdu.

Í grunninn séð vekja þessi sorglegu umferðarslys okkur öll til lífsins í þessum efnum, eða ég ætla rétt að vona það. Dapurleg umferðarslys seinustu mánaða og hörmuleg örlög fjölda Íslendinga sem látist hafa eða slasast mjög illa í skelfilegum umferðarslysum á að vera okkur vitnisburður þess að taka til okkar ráða - það þarf að hugleiða stöðu mála og reyna að bæta umferðarmenninguna. Það er lykilverkefni að mínu mati.

Ég votta þeim samúð mína sem hafa misst ástvin og félaga í þessu umferðarslysi í Hörgárdal.

Banaslys í Hörgárdal

Athugasemdir

[Steini Briem (IP-tala skráð) 4.3.2007 kl. 13:29]

Það þarf að bæta bæði umferðarmenninguna og vegina, tvöfalda þjóðveginn á milli Selfoss og Akureyrar og gera jarðgöng undir Vaðlaheiðina. Margir keyra á seinna hundraðinu innan Akureyris. Ég keypti 17 ára gamall fyrsta bílinn minn á Akureyri, gamlan leigubíl, Ford Fairlane módel 1957, 2,5 tonn, power stýri og power bremsur. Fór í kappakstur á Drottningarbrautinni við einhverjar stelpur en minns tók þá upp á að verða vita bremsulaus á gríðarlegri siglingu. Voru þá góð ráð á uppsprengdu verði, því rauð umferðarljós voru framundan. Fyrir neðan Bautann var ómalbikað bílaplan með stórum kantsteinum og brá undirritaður, skipstjórinn, á það ráð að sigla yfir gulmálað stórgrýtið á 100 sjómílna hraða. Spindilkúlubotn bar þar ekki bætur og stöðvaðist þar þessi frægðarför með miklum bravúr. Vagninn eins og honum hefði verið parkerað á planinu með stæl. Ég splæsti í kók á Bautanum handa allri áhöfninni, ferðafélögum mínum, en þeir voru svo skjálfhentir að þeir sulluðu því öllu niður. Þannig að ef fólk heldur að örvitaháttur ungra manna í umferðinni hafi verið fundinn upp í fyrra er það algjör skilmysingur.

 http://rides.webshots.com/photo/1139550177026817487ialREC 

[Kolbrún Baldursdóttir, 4.3.2007 kl. 13:30]

Þetta er skelfilegt svo mikið er víst, margir eiga um sárt að binda.
Hverju sætir þetta? Stundum er það hraðakstur en síðan geta orsakir verið mýmargar. Hef ekki heyrt hvað olli þessu slysi í Hörgárdalnum.