Ómar leiðir nýtt framboð í Reykjavík norður

Ómar Ragnarsson, fjölmiðlamaður, var ekki að tala neina tæpitungu í Silfri Egils í dag. Framboð hans er ákveðið og stefnir nú allt í að hann leiði nýtt framboð í Reykjavík norður - nýtt framboð stuðningsmanna Margrétar Sverrisdóttur, fólks sem kemur úr Framtíðarlandinu og úr öðrum áttum. Það stefnir í hægri grænt framboð sem hefur skírskotun víða, mun greinilega ætlað að sækja i allar áttir, helst þó á miðjuna - líka til hægri og vinstri.

Hulunni er svipt nú stig af stigi af þessu nýja framboði. Það er greinilegt að Margréti og Ómari eru ætluð efstu sætin í höfuðborginni. Þarna innanborðs eru líka varaþingmennirnir Sigurlín Margrét Sigurðardóttir og Jakob Frímann Magnússon. Það verður spennandi að sjá hverjum eru ætluð efstu sætin í hinum kjördæmum landsins, en stefnt er að landsframboði. Ef marka má ummæli Ómars í dag er stutt í að framboðið verði kynnt, enda virðast meginútlínur að skýrast dag frá degi. Mest er nú spáð í hver mannskapur nýja framboðsins sé.

Það virðist stefna í spennandi þingkosningar. Þegar er ljóst að framboðin um allt land verði sex, kannski verða þau fleiri. Hver veit. Það er erfitt um að spá. Mikil gerjun virðist í pólitíkinni og ný framboð að koma fram. Þau gætu orðið örlagavaldar í spennandi kosningabaráttu. Það er allavega ljóst af nýjustu könnunum og stöðunni almennt að erfitt sé að spá með vissu fyrir um hvernig kosningarnar í vor fari. Margir telja líklegt að við fáum nýja ríkisstjórn í vor. Núverandi stjórn hefur nú setið jafnlengi og viðreisnin sögufræga - víða heyrist ákall um breytingar. Þetta gæti orðið mest spennandi kosningabaráttan í áratugi.

Ómar hefur verið beittur í tali undanfarna mánuði og er nú orðinn stjórnmálamaður í harðri kosningabaráttu. Hann hefur talað sem slíkur lengi og því kemur framboð hans í sjálfu sér ekki að óvörum. Það er kannski ekki nema eðlilegt að hann og hans hópur reyni á styrk sinn og sinna áherslna. Það verður fróðlegt að sjá hvernig þeim muni ganga í þessari hörðu kosningabaráttu - einkum verður athyglisvert að sjá Ómar sem frambjóðanda í kosningum. Það er nýtt hlutskipti fyrir hann.

Athugasemdir

[Halldór Egill Guðnason, 4.3.2007 kl. 18:28]

Það er ekki langt til kosninga og enn verið búa til flokka!!!!!! Hvar annarsstaðar en hér gæti svona andsk. rugl viðgengist svona skömmu fyrir kosningar? Hvar eru áherslur og stefnumál flokkanna? Hvað eru flokkarnir margir? Hverjir verða hvar og hver verður með hverjum? Hvar býður hver sig fram og þar fram eftir endalausum andsk... ( afsakið) vitleysisgötunum......! Má ég þá frekar biðja um Status Q og viðhalda því sem er, en ekki svona bríarísskyndireddingum sem falla akkurat í kramið þessa stundina vegna þess að þessi tilteknu mál eru "INN" punktur  

[Ágúst Dalkvist, 4.3.2007 kl. 19:50]

Á maður ekki að fara að spá hvaðan þessi tvö framboð sem eru vitanlega í burðarliðnum taki fylgi sitt.

Ég ætla að spá því að framboð öryrkja og ellilífeyrisþega taki mest af vinstri vængnum, bæði samfó og vg.

Framboð Ómars og co held ég að taki sitt fylgi víðar. Kæmi þó ekki á óvart að hann tæki mest af vg en sennilega þó töluvert af sjálfstæðisflokknum og smá von er til þess að það útrými frjálslyndum.

[Steini Briem (IP-tala skráð) 4.3.2007 kl. 20:26]

Að mínu mati er það borin von að þetta framboð lífeyrisþega komi einhverjum inn á þing. Hægri grænir taka langmest frá Sjöllum og ég spái því að þeir fái nokkra þingmenn.