Útlit fyrir spennandi álverskosningu í Firðinum

Það stefnir í spennandi kosningu um stækkun Alcan í Straumsvík í kosningu bæjarbúa í Hafnarfirði eftir rúman hálfan mánuð, þann 31. mars nk. Þetta er kosning sem fylgst er með um allt land, enda gæti hún niðurstaðan orðið örlagarík fyrir kosningabaráttuna til Alþingis. Einn þingmaður Samfylkingarinnar sagði reyndar í mín eyru að þetta væri mikilvæg kosning fyrir flokkinn sem slíkan, niðurstaðan skipti máli um t.d. Fagra Ísland, umhverfisstefna sem gladdi mjög andstæðinga Samfó.

Falli tillagan verði talað um að Samfylkingin hafi stýrt málinu rétta leið í kosningaferli og verið ábyrg og flott - verði hún samþykkt muni VG segja að Samfylkingin hafi leitt málið til sigurs fyrir Alcan í Hafnarfirði eflaust. Við megum ekki gleyma því að Ögmundur Jónasson er kominn í framboð á kragasvæðinu eftir tólf ára þingsetu fyrir Reykjavík. Sú tilfærsla var mjög til marks um að keyra ætti t.d. á þessu máli og andstöðu VG við það, enda hefur VG tekið mjög afgerandi afstöðu gegn stækkun.

Er á hólminn kemur er kosið um framtíðina þarna. Vill fólk stærri stóriðjukost í nágrenni bæjarins og eða jafnvel eiga á hættu að missa álverið. Síðarnefnda planið er greinilega aðaltaktík þeirra hjá Alcan og stuðningsmanna álversins; að það muni fara verði það ekki stækkað. Einnig verður höfðað til þess hversu stór þáttur Alcan sé á svæðinu í atvinnumálum og þessháttar og hversu miklar tekjur komi frá þeim til bæjarins. Mér finnst umræðan hafa snúist talsvert á nokkrum vikum. Fyrir jólin hefði ég spáð því að tillagan myndi kolfalla með einhverjum mun.

Er ekki eins viss í dag og spái því að þetta geti farið á hvorn veg sem er, jafnvel að tillagan verði samþykkt. Skv. Gallup-könnun í ársbyrjun var 51% þátttakenda andvíg stækkun en 39% voru henni fylgjandi. Nýlega voru fylkingarnar jafnar að mig minnir í Fréttablaðskönnun. Ég tel að það verði mikil spenna vegna þessarar kosningar og greinilegt að útlit er fyrir minni mun en áður var talið, altént ef marka má þessar kannanir. Mikla athygli mína vakti reyndar að ekki skyldi kosið um stækkunina samhliða alþingiskosningum þann 12. maí, en þess í stað kosið viku fyrir páskahátíðina.

Það er greinilega mat meirihluta Samfylkingarinnar í Hafnarfirði að þetta mál þurfi að klárast fyrir lokasprett kosningabaráttunnar til Alþingis, sem hefst strax eftir páskana. Það hefur blasað við að þetta hafi verið meginumræðuefnið í kjördæminu síðustu vikur og flestir bíða spenntir eftir úrslitunum. Það fróðlegt að sjá á hvorn veginn þetta fer er á hólminn kemur.

Athugasemdir

[Steini Briem (IP-tala skráð) 15.3.2007 kl. 17:06]

Konan er ekki eyland og það er álverið ekki heldur, enda er kona þar innsti koppur í búri. Álverið þarf að vera í stuði til að fútt sé í partíinu og til þess þarf virkjanir og raflínur út um allar koppagrundir, e-pillur. Sama vers með nýtt álver í Helguvík. Fólkvangar og eldfjallaþjóðgarður á Reykjanesi úr sögunni en hann er einstakur í heiminum, að sögn jarðfræðinga. Sömu sögu er að segja af Framsóknar-Jóni en ekki Hvell-Geira. Það eru til margar útgáfur af honum út um allan heim. Búið spil. Sjónlínur allar útbíaðar í raflínum þvers og kruss, langsum og þversum. Slíkur garður veltir árlega milljörðum króna á Hawaii og veitir þar þúsundum manna góðan starfa með hreint loft í huga og lungum. Aðlaðandi er konan ánægð. Ilmsölt öll og angan til fyrirmyndar og draga að erlenda túrhesta, eins og Steini dregur að kvenfólk úr öllum heimshornum, svo út úr flæðir og Addi kveinkar sér, rúinn öllu kvenfylgi.

[Glanni (IP-tala skráð) 15.3.2007 kl. 20:16]

Álverið er eins og aldingarður við hliðina á iðnaðarhverfinu í hrauninu. Það mætti  nú eyða aðeins meira púðri í að taka þar til.

[Gústaf Níelsson (IP-tala skráð) 15.3.2007 kl. 23:28]

Finnst þér ekki sérkennilegt Stefán hvað bæjarstjóri þeirra Hafnfirðinga er hljóðlátur um eigin skoðanir á þessu máli? Sýnir afstöðuleysið mikla forustuhæfileika? Er hann ekki bara að hugsa um að vera í sigurliðinu og vill því bíða fram á elleftu stund með eigin afstöðu? Það skyldi þá vera?