Hafnfirðingar hafna stækkun álversins

Hafnfirðingar höfnuðu stækkun álvers Alcan í Straumsvík í íbúakosningu í dag með 88 atkvæða mun. Ótrúlega naumt og í raun má segja að bærinn hafi skipst í tvær nærri hnífjafnar fylkingar. 6382 greiddu atkvæði gegn stækkun (50,06%) en 6294 voru meðmæltir stækkuninni (49,37%).

Úrslitin urðu enn tæpari en marga hafði órað fyrir og var spenna alla talninguna, þó andstæðingar hefðu alltaf haft yfirhöndina. Sýnt þótti er öll atkvæði á kjörfundi lágu fyrir að stækkun yrði felld, en margir töldu þó muninn gæti minnkað verulega. Það gerðist en niðurstöðu kjörfundar í dag var ekki hnekkt með utankjörfundaratkvæðum.

Þetta er vissulega nokkuð merkileg niðurstaða. Hún er táknræn og boðar endalok þessa máls. Lúðvík Geirsson, bæjarstjóri, sagði í viðtölum eftir að úrslit lágu fyrir að ekkert yrði meira úr málinu, altént meðan að umboð núverandi bæjarstjórnar gildir þar til í júní 2010. Það er því ljóst að stækkun er úr sögunni næstu árin. Lúðvík lýsti aldrei yfir í öllu kosningaferlinu hver afstaða hans væri, sem vakti mikla athygli og hann vildi ekkert segja um hvað hann kaus eftir að úrslit lágu fyrir.

Það var gríðarleg þátttaka í þessari kosningu. Fleiri kusu um þessa deiliskipulagstillögu um stækkun álversins en í sveitarstjórnarkosningunum 27. maí 2006, sem segir alla söguna um hversu mjög bæjarbúum var umhugað um að taka afstöðu.

Þessi niðurstaða er mikið áfall fyrir álverið í Straumsvík sem brátt á fjögurra áratuga starfsafmæli og ennfremur fyrir Rannveigu Rist, sem markaði söguleg spor er hún varð forstjóri álversins fyrir áratug.

Það verður fróðlegt að sjá hver framtíð álversins verður, en Rannveig Rist lýsti því yfir þó með afgerandi hætti í kvöld að niðurstaða á þennan veg myndi marka endalok álvers í Straumsvík.

Hafnfirðingar höfnuðu stækkun álversins

Athugasemdir

[Guðmundur Jónas Kristjánsson, 1.4.2007 kl. 00:40]

Fyrirgefðu! Finnst þú oftar en ekki vera í hlutverki  að segjas frá!  En hver er
þín afstaða í þessu máli? Hef lýst minni !

[Lára Stefánsdóttir, 1.4.2007 kl. 00:45]

Já Stefán er ágætur fréttaskýringamaður og að mínu mati hefur hann fulla heimild til að nota bloggið sitt á þann hátt.

Hvað varðar þátt Lúðvíks Geirssonar þá hafa menn gagnrýnt hann fyrir að lýsa ekki sinni skoðun á deiliskipulagstillögunni. Ég held að það sé einmitt ágætt að gera það ekki og gefa íbúum frið til þess að móta sína skoðun og greiða atkvæði. Eina sem ég velti fyrir mér eftir þessa kosningu hvort ekki þurfi að móta einhverjar reglur um hvernig kynningu fyrir kosningu af þessu tagi skuli vera háttað. Hvort ekki þurfi að móta frekari reglur um íbúalýðræði þannig að leikreglurnar séu skýrar í upphafi.

Samfylkingin í Hafnarfirði beitti nútímalegum vinnubrögðum en ekki afturhaldslegum að ákvarða hlutina án samráðs og það er svo sannarlega til fyrirmyndar.

[Haraldur Haraldsson, 1.4.2007 kl. 00:54]

Folkið hefur valið og það verður að virða/Eg personulega er á móti þessu starx ,við skoða malin betur og liggur ekki svona mikið á/En það sem eg er mest hrifin af er þetta að lát fokið kjósa sjáft um þetta,eg veit að þetta eru nyjar aðferðir en væri ekki bara gott að gera þetta um umdeild mal i farmtiðinni/!!!!Eg held að min flokkur þurfi að læra doltið af þessu/eða það fyynst mer!!!!Virðigarfyllst Halli Gamli

[Bergur Þorri Benjamínsson, 1.4.2007 kl. 01:06]

Ég segi bara. Eins manns dauði er annars brauð. Vonandi eykur þetta líkurnar á Álveri við Húsavík.

[Reynir Jóhannesson, 1.4.2007 kl. 01:26]

Ég er ekki sammála því að það var rétt að lýsa ekki sinni skoðun opinberlega. Þetta gera fulltrúar Samfylkingarinnar vegna þess að núna erum við á leið inn í kosningabaráttu. Þá er nú bannað að hafa verið með "ranga skoðun" á málinu. Alltaf best að halda með sigurliðinu, er það ekki? Stjórnmálamaður sem lýsir ekki skoðunum sínum í mikilvægum málum, og kannski þeim mikilvægustu sem hann hefur komið að, er ekki spennandi stjórnmálamaður/leiðtogi.

[Sveinn V. Ólafsson (IP-tala skráð) 1.4.2007 kl. 01:47]

Til Hamingju Húsavík / Helguvík

Vilji íbúa Hafrnarfjarðar er kýrskýr og ekkert verður af stækkun. Þar sem vitað er að á bæði  Húsavík og í Reykjanesbær er gífurlega mikill stuðningur við álver er ljóst að þar munu rísa myndarleg álver innan tíðar.  Vilji íbúa ræður og þá ber að virða þeirra vilja eins og Hafnfirðinga.  Gott mál.

kær kveðja

Sveinn

[Stefán Friðrik Stefánsson, 1.4.2007 kl. 02:40]

Takk fyrir kommentin.

Guðmundur Jónas: Ég leit alltaf á þetta sem mál Hafnfirðinga. Var svosem ekkert áfram um að þetta væri samþykkt frekar. Vilji íbúa þarna er kominn og þetta mál er út af borðinu. Það er ekkert meira um það að segja. Hafnfirðingar eru bestir til að dæma um hvort að þeir vilji þennan kost eður ei. Vil annars benda á að sjálfur bæjarstjórinn í Hafnarfirði komst upp með það að taka aldrei afstöðu, eins fyndið og það hljómar.

Lára: Takk fyrir góð orð um mig og skrifin. Fannst Lúðvík svolítið hjákátlegur að taka ekki afstöðu, vera heiðarlegur með sitt mat. En það er rétt að bæjarbúar fengu valdið og þau dæmdu. Þau lifa við það. Allavega er þessu máli lokið, enginn vafi á því.

Halli: Takk fyrir þín skrif.

Bergur Þorri: Algjörlega sammála, gott komment.

Reynir: Takk fyrir góð skrif, við erum 110% sammála.

Sveinn: Gott komment, mikið til í þessu.

mbk.

[Steini Briem (IP-tala skráð) 1.4.2007 kl. 03:38]

AUÐVITAÐ leggur þetta álver upp laupana fyrr eða síðar, eins og öll önnur álver í heiminum, en það verður nú ekki alveg á næstunni. Álverið er um 40 ára gamalt og það þýkir nú gott að fyrirtæki verði svo gömul yfirleitt.

[Sigurður Jónsson (IP-tala skráð) 1.4.2007 kl. 09:08]

Það er óðelilegt að kjörinnir fulltrúar séu að hafa bein afskipti af íbúalýðræðinu og vinnur það beinlínis gegn tilgangi íbúalýðræðisins, þ.e. að bæjarbúar taki ákvörðun.

Bæjarstjórnin hefði allt eins tekið bara ákvörðunina eins og að fara að blanda sér á fullum þunga með eða á móti í svona kosningum. Þannig á íbúalýðræði að vera, kjörinnir fulltrúar eiga að halda sig til hlés og fyrir það fær Samfylkingin mikinn plús hjá mér.

Ég var á móti, og mér fannst jafn asnalegt að bæjarfulltrúi VG væri svona hörð gegn þessu eins og bæjarfulltrúar Sjálfstæðisflokksins væru með þessu. Í íbúalýðræði eiga þessir kjörnu fulltrúar að láta valdið í hendur íbúanna og þeir eiga að mestu að halda sig til hlés.

Sérstaklega á bæjarstjórinn ekki að gefa upp sína afstöðu í svona máli, hann þarf jú að geta unnið að fullum heilindum með báðum fylkingum nú þegar niðurstaðan liggur fyrir og því hefði verið mjög óheppilegt að hann gæfi upp sína afstöðu.

Þessi frábæra tillaga hjá Samfylkingunni að leyfa okkur að kjósa um stækkunina gerir það að verkum að ég ætla að kjósa flokkinn í alþingiskosningunum í vor. 

[Guðmundur Jónas Kristjánsson, 2.4.2007 kl. 00:13]

Takk fyrir heiðarlegt svar Stefán Friðrik