Skelfilegt fjöldamorð í Bandaríkjunum

Það er skelfilegt að heyra fréttirnar af fjöldamorðunum í tækniháskólanum í Virginíu í Bandaríkjunum. Að minnsta kosti 32 féllu í valinn, sem er hið mesta í slíkri skotárás vestanhafs. Byssumaðurinn var einn, hann var felldur af lögreglu. Var að horfa á umfjöllun um þetta á Sky, atburðarásin og staða mála er hægt og rólega að verða ljósari.

Þetta eru óneitanlega mjög sjokkerandi tíðindi, þetta er gríðarlegt áfall fyrir bandarískt samfélag, svo skömmu eftir Columbine-skotárásina. Man mjög vel eftir þeirri skelfingu fyrir átta árum. Það bliknar þó hreinlega í samanburði við þær hörmungar sem þarna hafa átt sér stað og það blóðbað sem við blasir nú. Það eru skv. fréttum eins og fyrr segir 32 látnir og talað er um að allt að 30 séu særðir. Farið var bæði í kennslustofur og á heimavist og skotið á allt sem fyrir varð og byssumaðurinn hafi gnægð skota og vel vopnaður.

Þetta er svakalegt hreint út sagt. Þessi vondu tíðindi öðluðust óneitanlega enn meiri dýpt í lýsingum Dagmar Kristínar Hannesdóttur, sem sem er í doktorsnámi í sálfræði, í kvöldfréttum íslensku sjónvarpsstöðvanna. Heyrði á Sky áðan sjokkerandi lýsingar eins sem er nemandi við skólann og var nær vettvangi en Dagmar Kristín. Þetta er mikill sorgardagur vestanhafs og þessi vondu tíðindi skekja samfélagið þar og mun víðar.

Bowling for Columbine, mynd Michael Moore, í kjölfar skelfingarinnar í Columbine árið 1999 vakti ekki síðri alheimsathygli en voðaverknaðurinn sjálfur og myndin hlaut óskarsverðlaun sem besta heimildarmyndin árið 2003. Hún er eftirminnileg flestum sem hana sjá. Það er ógnvænlegt að sjá svona atvik gerast enn eina ferðina.

Það af hversu stórum skala þetta atvik nú er telst skelfilegt. Það geta engin önnur orð passað betur.

22 látnir í skotárás í Virginíu

Athugasemdir

[Sveinn Valdimar Ólafsson, 16.4.2007 kl. 20:12]

Blacksburg í Virginíufylki, þar sem Virginia Polytechnic Institute & State University (Virginia Tech) er staðsettur,  er einhver friðsælasti bær sem undirritaður hefur kynnst. Undirritaður stundaði verkfræðinám við fyrrgreindan háskóla í 4 ár. Lífið þar gengur einfaldelga út á lærdóm og rannsóknir og ofbeld er eins lítið í þessum bæ og hugsast getur.  Bærinn er svo öruggur að maður hikaði ekki við að ganga úti að næturlagi.

Það er því mikið áfall að fá þessar fréttir og ekki ætla ég mér að draga neinar ályktanir að svo stöddu. Virðist vera æðiskast einhvers sturlaðs manns. 

Votta mínum gamla skóla og Blacksburg innilega samúð.

lifið heil

Sveinn

[Ásdís Sigurðardóttir, 16.4.2007 kl. 21:00]

Þetta eru skelfilegar fréttir, tek undir það, maður bara skilur þetta enganveging og getur ekki sett sig í spor þeirra sem lenda í svona.

Annars langar mig að þakka þér fyrir góða pistla. Ég er ánægð að vera búin að fá þig að tölvunni aftur, var hálf abbó að vita af þér og Herdísi í Höllinni, langaði svooo að vera þar líka en svona er þetta bara. Hlakka til þegar við hér á Selfossi opnum kosningaskrifstofuna á fimmtud. þá fer maður að kíkja daglega á vinina og frambjóðendur. Gangi ykkur vel á Akureyri.

[Sveinn Valdimar Ólafsson, 16.4.2007 kl. 23:48]

Slæmt þykir mér að lesa sum viðbrögð hér heima þar sem gleymist alveg að um fórnarlömb er að ræða.  Sumir er svo illa uppteknir af Bush að sú staðreynd gleymist.  Fórnarlömb í USA er líka fórnarlömb eins og fólk í Írak, UK eða Súdan. Allt er þetta fólk meir að segja Kanar líka.  Guð veri með öll því fólki sem fellur.

Kær kveðja

Sveinn

[Stefán Friðrik Stefánsson, 17.4.2007 kl. 00:45]

Kærar þakkir fyrir kommentin Sveinn. Vel skrifað og ég tek undir hvert orð hjá þér.

Þakka þér fyrir skrifin Ásdís mín. Það er gott að koma heim og mjög notalegt að fara aftur að skrifa. Það er gott að einhverjir hafa saknað manns. Þetta var frábær og gaman að taka sér smápásu, en enn skemmtilegra að byrja aftur að skrifa.

mbk.