Samsæri í Eurovision - verður keppninni breytt?

Eiríkur Hauksson féll í gærkvöldi út úr Eurovision með lagið Valentine Lost. Það er mikið áfall fyrir Íslendinga, sem þriðja árið í röð horfast í augu við botnstreð. Mikil ólga er innan Eurovision-samfélagsins í heild með úrslitin í gærkvöldi. Ekkert lag frá Vestur-Evrópu komst í úrslitapakkann, heldur röðuðu þar sér upp lög úr austanblokkinni. Slóvenía er það land sem næst stendur vesturhlutanum. Það segir sína sögu vel.

Það er alveg ljóst, og staðfestist af úrslitum kosningarinnar í gærkvöldi, að möguleikar Íslands á að komast upp úr botninum eru hverfandi og greinilegt að stokka verður keppnina upp. Ólgan hefur oft verið ráðandi hér heima allt frá því að Selmu Björnsdóttur mistókst að komast upp úr botninum með If I had your Love í maí 2005 í keppninni í Kiev. Í fyrra var talað um að Silvía Nótt hefði skemmt fyrir sér og því ekki komist áfram. Staða Eiríks nú vekur nýjar spurningar.

Ekki aðeins reyndar er staða Eiríks rædd þarna heldur staða Vestur-Evrópu almennt. Í raun væri heiðarlegast að brjóta upp keppnina. Þarna keppa yfir 40 lönd um árangur. Það væri auðvitað best að hafa keppni fyrir Vestur-Evrópu og Austur-Evrópu. Með því væri eflaust tekið á þessu og um leið væri auðvitað tekið á þessum undanriðli og keppninni skipt upp í heiðarlegar heildir, enda er tónlistarsmekkurinn mjög misjafn á svæðinu og því miður er ráðandi staða þjóðanna í austri að eyðileggja keppnina..

Eiríkur Hauksson er töffari, hefur alltaf verið það og mun verða það í huga landsmanna. Hann talaði hreint út í gærkvöldi. Ég get tekið undir hvert einasta orð hans í þessu viðtali við Sigmar bloggvin minn. Það verður að taka þessa keppni í gegn og gera hana eðlilegri vettvang, ekki klíkumyndun og samsærisplotterí milli þjóða með þeim napra hætti sem blasir við.

Eigi Ísland að taka áfram þátt í keppninni verður að stokka hana upp, enda er orðrómurinn um samsærið ekki lengur íslenskur heldur ómar um alla V-Evrópu. Það er engin furða á því.

Eiríkur: Samsæri austantjaldsmafíu

Athugasemdir

[hee (IP-tala skráð) 11.5.2007 kl. 15:09]

Hélstu virkilega að þetta íslenska lag ætti séns á að komast áfram?

[Stefán Friðrik Stefánsson, 11.5.2007 kl. 15:16]

Ég taldi að eitthvað lag frá Vestur-Evrópu ætti séns á að komast áfram. Þetta er sláandi niðurstaða. Það verður að stokka þessa keppni upp.

mbk.

[hee (IP-tala skráð) 11.5.2007 kl. 16:14]

Ég er ekki sammála. Mér finnst reyndar synd að Andorra komst ekki áfram, en lög á borð við það svissneska, danska, norska og íslenska voru einfaldlega bara of léleg til að eiga skilið að ná árangri.

bendi annars á þessa færslu http://eirikurbergmann.blog.is/blog/eirikurbergmann/entry/206997/

[Svanur Sigurbjörnsson, 11.5.2007 kl. 17:14]

Sammála.  Mér fannst sláandi að Hollenska lagið komst ekki áfram.  Þar fór stórglæsileg og mjög góð söngkona sem flutti mjög grípandi og ágætlega samið lag.  Maður gæti haldið að Austur-blokkin hefði ekki smekk fyrir vestrænum lögum en svo fór sú ungverska áfram með sinn blues og Tyrkinn með sitt danslag þannig að það skipti greinilega litlu hvers konar lög voru í boði, svo lengi sem þau voru spiluð austan Dónár. 

Í raun var ég ekki sérlega hissa á því að lag Íslands skyldi ekki komast að núna en fannst verulega skrítið að "If I had your love" skyldi ekki komast áfram árið 2005.

Einn af stóru ánægjuþáttunum í svona keppni er að sjá að góðum lögum vegni vel en þegar það er tekið frá manni er betur heima setið en af stað farið.  Það sást t.d. þegar Sigurður var tekinn of snemma út úr X-factor keppninn í vetur að keppnin komst í uppnám og litlu munaði að hún hefði leyst upp í vitleysu.  Með breyttu (jákvæðara) viðhorfi þjálfara/dómara tókst þeim að bjarga X-factor og enginn efaðist um sigurvegarann. 

[Stefán Friðrik Stefánsson, 12.5.2007 kl. 02:34]

Takk fyrir kommentin.

Svanur: Algjörlega sammála hverju einasta orði. Takk fyrir góðar pælingar.

Hildur Edda: Andorra og Holland áttu skilið að fara lengra, það er bara þannig. Eiki var betri en nokkrir þeirra allavega sem komust áfram. Vandinn blasir við og það er bara spurning um tíma hvenær að allt springur í loft upp með þessa keppni. Spái að þetta endi með tveim keppnum, annarri í vesturhluta Evrópu og hinni í austurhlutanum, enda tvískiptum undanriðlum. Þetta er einfalt mál, enda er keppnin dauðadæmd hætti vesturhlutinn að taka þátt að mestu leyti.

mbk.