Sir Sean snýr ekki aftur úr eftirlaunakyrrðinni

Það eru nokkur ár liðin frá því að eilífðartöffarinn Sir Sean Connery hætti kvikmyndaleik eftir glæsilegan leikferil. Það eru mikil vonbrigði að hann ætli ekki að snúa aftur á hvíta tjaldið í fjórðu myndinni um Indiana Jones, sem nú er í vinnslu. Bundu aðdáendur myndanna miklar vonir við að hann sneri aftur til að leika föður fornleifafræðingsins Indys, nú 18 árum eftir hina stórfenglegu Indiana Jones and the Last Crusade, þar sem Connery og Harrison Ford áttu magnaðan samleik. Svo verður greinilega ekki.

Flestir kvikmyndaunnendur hafa talað vel um þriðju myndina í kvikmyndabálknum. Stærsti hluti myndarinnar og hinn dramatískasti var byggður á stirðbusalegu sambandi föður og sonar en restin var hreinn eltingarleikur með hvern æsilegan og glæsilegan hápunktinn á fætur öðrum. Þetta var mögnuð blanda og innkoma Connerys var toppur myndarinnar. Þó að Connery nálgist áttrætt og hafði haldið sjálfskipaður í eftirlaunakyrrðina voru vonir bundnar við að hann yrði allavega hluti fjórðu myndarinnar. Það verður fróðlegt að sjá handritið og uppbyggingu myndarinnar við þessa ákvörðun.

Það eru auðvitað mikil tíðindi svosem að Harrison Ford ætli sér að leika Indy aftur. Það eru eins og fyrr segir átján ár frá þriðju myndinni. Ford hefur elst nokkuð á frekar skömmum tíma, er allavega ekki lengur sá ferski og hressi maður sem hann var í myndunum þremur. Það er visst hættuspil að gera fjórðu myndina og ég vona að það áhættuspil sanni sig að vera farsælt með þetta einvalalið í frontinum. Það er þó áfall fyrir þá að Connery ákveði að sitja til hliðar og standi við þá ákvörðun að vera sestur í helgan stein. Vonandi verður myndin góð.

Connery verður ekki með í fjórðu myndinni um Indiana Jones

Athugasemdir

[Ásdís Sigurðardóttir, 8.6.2007 kl. 12:15]

Ætli málið sé ekki að það er orðinn of lítill aldursmunur á gæjunum? Þeir eru samt báðir flottir. 

[Stefán Friðrik Stefánsson, 8.6.2007 kl. 15:43]

Sæl Ásdís mín

Jú, það er ekkert svo rosalega mikill aldursmunur á þeim tveimur. Harrison Ford er tólf árum yngri en Sir Sean.

Vona að gangi vel á Akureyri þessa dagana. Við kannski eigum eftir að hittast yfir kaffibolla meðan að þú stoppar í bænum. Sjáum til.

heyrumst

mbk.