Er Sigurjón að bíða af sér biðlaunin?

Það hefur vakið mikla athygli að enn hefur Sigurjón Þórðarson, fyrrum alþingismaður, ekki verið formlega ráðinn framkvæmdastjóri Frjálslynda flokksins, þrátt fyrir orðróm um það úr öllum áttum. Það er að verða mánuður liðinn frá því að Sigurjón missti þingsæti sitt og honum vantar því eflaust verkefni. En hann er enn á biðlaunum og verður svo í sumar. Þar virðist stranda helst á málum, enda má viðkomandi ekki vera í launuðum verkefnum á meðan að biðlaunatíma stendur.

Sigurjón gagnrýndi Kristján Þór Júlíusson, leiðtoga Sjálfstæðisflokksins í Norðausturkjördæmi, mjög harkalega í kosningabaráttunni hér í vor fyrir að þiggja biðlaun sem hann átti rétt á skv. samningum og þau réttindi sem almennt fylgja er hann lét af embætti bæjarstjóra á Akureyri í janúar 2007. Nú er hann sjálfur á biðlaunum og þiggur þau réttindi sem starfi sínu fylgdi og mun njóta þess í þá þrjá mánuði sem líða frá því að hann missti þingsætið. Þetta er nokkur kaldhæðni eflaust að einhverra mati sem heyrði á tal Sigurjóns í kosningabaráttunni hér.

Það er ekki óeðlilegt að forysta Frjálslynda flokksins vilji halda Sigurjóni í pólitískum störfum þó að þingsætið hafi tapast. Hann þekkir til stjórnmálastarfa og hefur starfað í þeim bransa sem helstur er í pólitíkinni, enda verið alþingismaður í fjögur ár. Hann verður þeim eflaust góður starfskraftur í forystunni þegar að biðlaununum sleppir og hann hefur tekið til starfa.

Athugasemdir

[Jens Guð, 9.6.2007 kl. 12:27]

  Ég er í Frjálslynda flokknum og hef fylgst með þessu máli.  Sigurjón hefur rekið á eftir því að frá ráðningu hans í starf framkvæmdastjóra verði gengið.  Guðjón Arnar hefur hinsvegar dregið lappirnar varðandi það.  Þetta hefur komið út eins og Guðjón ætli að ganga á bak orða sinna.  Hann samdi við Sigurjón um að rýma fyrir Kristni H. í Norðvesturkjördæmi en fara þess í stað fram í Norðausturkjördæmi.  Þar hefur Frjálslyndi flokkurinn aldrei átt möguleika á þingsæti.  Þar mældist fylgi flokksins rétt um 2 %.  Þingsæti Sigurjóns væri því fyrir bí en hann yrði þess í stað ráðinn framkvæmdarstjóri flokksins.  Sigurjón var reyndar hársbreidd frá því að ná fylgi flokksins upp í þingsæti.  Hann fékk 5,9%.

  Fyrir nokkrum dögum þegar enn var gengið á Guðjón Arnar upplýsti hann loks að ráðningu Sigurjóns verði frestað fram á haust.  Ástæðan er fjárhagsvandamál flokksins í kjölfar kostnaðarsamrar kosningabaráttu.

  Þetta er ekki frestun sem Sigurjón hefur óskað eftir.  Hans vilji liggur til þess að hefja sem allra fyrst framkvæmdastjórastörf og taka til hendinni á þeim vettvangi.  Frestunin er alfarið ákvörðun Guðjóns.    

[Stefán Friðrik Stefánsson, 9.6.2007 kl. 15:11]

Þakka þér fyrir kommentin Jens.

Þetta mál er allt hið vandræðalegasta fyrir Sigurjón og Frjálslynda flokkinn. Það er kostulegt eigi að tefja framkvæmdastjóraráðninguna til hausts og ekkert sem blasir við í þeim efnum að strandi á nema biðlaunin. Sigurjón verður að afþakka biðlaunin til að geta tekið við framkvæmdastjórastöðunni. Staðan er mjög einföld og það virðist ekkert standa í vegi nema einmitt það. Þetta er ekta biðleiksstaða. Guðjón Arnar er nú ekki að koma vel fram við Sigurjón að draga hann á asnaeyrum í allt sumar sé staðan upp á hann að kenna. En umræðan um biðlaunadæmið er bara rétt að byrja spái ég, held að þetta verði metið aðalástæðan og ekki er það neitt undrunarefni. Þetta lítur allt hið vandræðalegasta út fyrir alla hlutaðeigandi.

mbk.

[Jens Guð, 9.6.2007 kl. 19:43]

  Ég tek undir það að þetta er óheppileg staða.  En ég ítreka að það er ekki við Sigurjón að sakast.  Alls ekki.  Þvert á móti er hann ósáttur yfir þeim drætti sem orðinn er á ráðningunni.  Mér er sömuleiðis kunnugt um að Grétar Mar og Kristinn H.  eru því fylgjandi að Sigurjón verði strax ráðinn.  Guðjón Arnar er ekki að sýna góða leiðtogahæfileika með því að glutra stöðunni niður í þetta vandræðalega horf.