Í minningu Ástu Lovísu

Ásta Lovísa Vilhjálmsdóttir var jarðsungin í dag. Ásta Lovísa öðlaðist sess í huga okkar því að hún gerði baráttu sína opinbera í netskrifum sem halda nafni hennar lengi á lofti, hún hikaði ekki við að deila hugsunum sínum; allt í senn vonbrigðum, vonum, væntingum, eldmóð, bakslögum og baráttuþreki með okkur. Við urðum að áhorfendum að baráttu hennar.

Það er ekki auðvelt að lifa svona baráttu svo opinbert og halda reisn sinni og glæsileik allt til enda. Það tókst Ástu Lovísu. Öll vonuðum við að hún næði að sigrast á meininu og þrátt fyrir bakslögin undanfarnar vikur sem fram komu á blogginu var andlátsfregn hennar fyrir rúmlega tíu dögum sláandi og var mikið áfall. Slíkur varð krafturinn á bakvið baráttu hennar að hún virkaði aldrei vonlaus, þó erfið væri. Hún barðist enda allt til hinstu stundar.

Ég tel að við öll sem höfum bloggað í dagsins önn minnumst Ástu Lovísu sem eins af þeim fremstu í okkar bloggveröld. Hún þorði að skrifa frá hjartanu og opna hug sinn og hjarta þó á raunastundum væri. Hún talaði með bjartsýni að leiðarljósi hvort sem um sigra eða ósigra á vegferðinni var að ræða. Hún kenndi okkur öllum að lífið getur oft verið ein barátta út í gegn, en það skipti máli að berjast brosandi og vonast ávallt eftir bjartari tíð.

Ég votta fjölskyldu hennar samúð mína og vona að Guð styrki þau í þeirra miklu sorg.

Athugasemdir

[Bryndís Helgadóttir, 11.6.2007 kl. 15:37]

Fallega skrifað hjá þér um fallega manneskju...

[Stefán Friðrik Stefánsson, 11.6.2007 kl. 19:05]

Takk kærlega fyrir góð orð um skrifin.

mbk.

[Ragnheiður , 12.6.2007 kl. 09:53]

Svo satt og rétt sem þú skrifar um hana, ljósið mesta. Hún hafði meiri áhrif á sína lesendur en flestir aðrir. Hún var alla tíð öðrum fremri. Takk fyrir fallegu orðin Stefán.

[Stefán Friðrik Stefánsson, 13.6.2007 kl. 11:41]

Takk kærlega fyrir góð orð um skrifin mín.

mbk.