Lánleysi KR heldur áfram - sex leikir án sigurs

Það hlýtur að vera ískalt yfir fótboltaveldinu gamalgróna í vesturbænum og stuðningsmönnum þess við tapið gegn íslandsmeisturum FH í kvöld. Lánleysi KR heldur áfram. Eftir sex leiki í úrvalsdeildinni í sumar er KR enn án sigurs og aðeins með eitt stig. Liðið er auðvitað á botninum og eru góð ráð eflaust farið að teljast orðin ansi dýr í vesturbænum.

Það hlýtur að blasa við að einhver tíðindi eru væntanleg úr herbúðum KR. Staða liðsins er auðvitað langt undir öllum væntingum. Lið KR er stjörnum prýtt en samt sem áður er hlutskipti þess hreint og klárt botnskrap. Staða Teits Þórðarsonar telst varla góð og þeir eru varla margir sem veðja peningunum sínum á það að hann klári tímabilið með KR úr því sem komið er málum.

KR hefur alla tíð verið stórveldi í íslenskri knattspyrnu. Þrátt fyrir upp og ofan gengi á tímabilinu 1968-1999, er liðið var án Íslandsmeistaratitils, er staðan sem nú blasir við að verða sögulega eftirminnileg sem hin versta. Sumarið 2001 var álíka vandræðagangur yfir liðinu og þá fór liðið í gegnum allsherjar uppstokkun á ýmsum sviðum til að bæta úr.

Það yrðu varla stór tíðindi úr þessu þó að verulega yrði hrist til eftir þessa martraðarbyrjun gamla vesturbæjarveldisins.

KR enn án sigurs eftir tap gegn FH

Athugasemdir

[Heimir Lárusson Fjeldsted, 15.6.2007 kl. 00:42]

Þið virðist eiga nóg af salti:-(

[Andrea, 15.6.2007 kl. 01:01]

Það er nú ekki svo kalt í frostaskjóli, góður andi meðal stuðningsmanna sem enn halda í trúna, og trúin okkar fékk byr undir báða vængi í kvöld því KR spilaði mjög vel í kvöld utan þess að ná ekki að skora. Það voru bara þessar tuttugu mínútur sem tók að komast í gang og þær vorur dýrar því þar fengum við á okkur tvö mörk.

KR er að skríða af stað, áfram KR :)

[Stefán Friðrik Stefánsson, 15.6.2007 kl. 01:27]

Takk fyrir kommentin.

Sveinn: Já, þetta er ekki beint kræsileg staða og augljóst að eitthvað gerist fyrr en seinna. Það verður fróðlegt að sjá hvað það verður. Ekki er þó allavega staða Teits beysin.

Heimir: Þetta er bara staðan. En vonandi mun KR ná að rétta eitthvað úr kútnum þó titladraumar séu eflaust orðnir súrir. Þetta verður fyrst og fremst úr þessu varnarspil um að halda velli í deildinni. KR hefur oft séð það svart og mun eflaust reyna að bjarga sér frá þessu. Enn er auðvitað von til staðar.

Andrea: Já, það verður spennandi að fylgjast með næstu leikjum. Man þó ekki eftir daprari byrjun hjá KR síðan að ég fór að fylgjast með boltanum. Þetta vekur athygli þegar að svo gamalgróið veldi með einvalalið leikmanna að því er virðist og þjálfara með gott record fær svona útreið fyrsta hringinn á mótinu. En það blasir auðvitað við að eitthvað verði gert. Þetta verður vonandi skemmtilegt fótboltasumar.

mbk.

[Sigurður Þórðarson, 15.6.2007 kl. 02:35]

Ég hlustaði á KR útvarpið í kvöld og langt viðtal við þjálfarann. 

Teitur ætlar að halda ótrauður áfram.

[Tómas Guðbjörn Þorgeirsson, 15.6.2007 kl. 12:26]

Eigum við ekki að spyrja að leikslokum...hef alltaf verið mjög á móti því að reka mann og annan þegar illa gengur.  Leyfum honum Teiti að sigla skútunni og ef hún siglir í strand then so be it!!

Held að KR-ingarnir eigi eftir að rétta úr kútnum og ná að halda sér uppi...

[Jahá, 15.6.2007 kl. 14:28]

Leitt að sjá KRinga í þessari stöðu, en rétt er að boltinn sem þeir hafa verið að spila sé ekki augnayndi né áhrifaríkur.