Sögulegur ósigur KR - staða Teits veikist enn

KR beið í gærkvöldi stingandi ósigur fyrir HK í úrvalsdeildinni. Sá ósigur er mjög sögulegur. Það hefur enda ekki gerst frá árinu 1975 að KR-ingar tapi fyrir nýliðum í deildinni, en það sumar tapaði KR fyrir FH 0-1. Það er öllum ljóst að eitthvað verulega mikið er að í Vesturbænum og allt tal um tímabundinn vanda eiga ekki lengur við. Um er að ræða mesta vanda KR í þrjá áratugi.

Það leikur enginn vafi á því að Teitur Þórðarson er valtastur í sessi flestra þjálfara landsins það sem af er liðið sumrinu. Það eru auðvitað stórtíðindi að KR sé með eitt stig í úrvalsdeild eftir sjö umferðir og liðið án sigurs enn þegar að sér fyrir endann á júnímánuði á næstunni. Þetta er staða sem hlýtur að teljast niðurlægjandi fyrir mannskap af þessu tagi, þar sem valinn maður skipar nærri hvert pláss og allt ætti að ganga vel.

Það er von að spurt sé hvað gerist nú í Vesturbænum. Staða Teits veiktist gríðarlega með þessum sögulega ósigri. Það að nýliðar á borð við HK rassskelli hið gamla knattspyrnuveldi er pínlegt fyrir þá sem leiða starfið í Vesturbænum og hafa verið máttarstólpar þess í gegnum tíðina. Teitur Þórðarson hefur mjög góðan feril að baki í þjálfun. Andleysið og stemmningsleysið sem einkennir KR eru mikil tíðindi og greinilegt að þar er allt að klikka sem má klikka. Það vantar mikið upp á að lykilpóstar spilamennskunnar virki og það er raunalegt að fylgjast með þessu forna stórveldi vera í þessari stöðu.

Það er erfitt að spá um hvað gerist með Teit. Það er þó ljóst að tækifæri hans eru að verða uppurin, nema þá að enginn metnaður sé í Vesturbænum til að gera hlutina almennilega. Varnarbaráttan fyrir tilveru í deildinni er að verða raunin og það er greinilegt að eitthvað stórlega hefur klikkað undir leiðsögn Teits. Það var ekki stefnt að botnbaráttu með ráðningu Teits og eflaust mikil vonbrigði nú yfir stöðunni, þar sem allt er reynt til að halda haus en ekkert gengur. Það er erfitt, jafnvel fyrir fornt stórveldi, að lifa við slíkt tíðarfar.

Teitur: Mín staða óbreytt

Athugasemdir

[Signý, 21.6.2007 kl. 12:33]

Ég hugsa nú að Teitur sé ekkert sérstaklega valtur í sessi þar sem að hann var KR mjög dýr og samningur hans er langur eða til 2010. Svo það útskýrir líklega endalausa þolinmæði KR-sport fyrir þessum manni. Held að það verði ansi dýrt spaug að reka Teit með svona langan samning á bakinu og þurfa þá að sjá fyrir launum til tveggja þjálfara...

[Ásdís Sigurðardóttir, 21.6.2007 kl. 12:36]

Ég átti nú alveg eins von á því að fyrsta frétt í morgun yrði um brottrekstur Teits en eins og Signý bendir á er maðurinn dýr og mikið eftir af samningnum.

[Stefán Friðrik Stefánsson, 21.6.2007 kl. 12:37]

Takk fyrir kommentið Signý. Erfitt að segja til um hvað muni gerast. Eflaust er mikið spáð og spekúlerað í Vesturbænum. Það eru engir góðir valkostir í stöðunni, þeir eru þó misvondir. Það fer að líða að því að þetta ástand verði ekki viðunandi nema að menn vilji að KR falli. Það þurfa ekki margir svipaðir leikir í viðbót að eiga sér stað til að svo muni fara. Staðan er grafalvarleg, einkum líka vegna þess að KR hefur, þrátt fyrir að hafa ekki unnið titilinn í þrjá áratugi, alltaf verið topplið og skarað fram úr. Þetta eru dimmir dagar hjá stórveldi. En góð ráð eru að verða dýr og það er klárlega eitthvað stórlega að klikka. Ég held að stórtíðindi séu í nánd, það blasir bara við.

mbk.

[Stefán Friðrik Stefánsson, 21.6.2007 kl. 12:39]

Já, Ásdís, samningurinn hans er góður og það skiptir máli sérstaklega fyrir hann. En það standa margir öflugir menn að grunni KR og þeir munu frekar velja kostinn að reyna að stokka hlutina upp, þó dýrt sé, heldur en að horfa á liðið í þessu mellow-i mikið lengur. En þetta er rosaleg staða og fátt gott til ráða í henni. Ömurlegt fyrir hvaða lið sem er að lenda í svona skelfilegum botni.

mbk.

[Bjarni Kjartansson, 21.6.2007 kl. 12:47]

Menn sögðu ða hjartað hafi sigrað budduna.  Hvað svo sem menn meintu með slíkum meldingum.

Við Valsarar töpuðum uppi á Skaga og er það rómur menna, að þar hafi verið spiluð knattspyrna af breskri gerð, fautaskapur og leiðinda taktíkk, af hálfu Skagamanna en stigin telja.

 KRingarnir rifja hugsanlega upp lítillætið og æðruleysið.  Voru orðnir all stórir uppá sig upp á síðkastið.

Miðbæjaríhaldið

[Einar Örn Ólafsson (IP-tala skráð) 21.6.2007 kl. 13:40]

Mótið er nú ekki einu sinni hálfnað og KR geta auðveldlega styrkt stöðu sína í deildinni.

Ég legg til að Teitur fari að prufa nýja og unga leikmenn. Þeir hafa eflaust einhverjir mikinn metnað og eru tilbúnir að leggja sig 100% fram í verkefnið. Það er allavegana augljóst að þessir reynslumeiri eru ekki að skila því sem til er ætlast.  

[Heimir Lárusson Fjeldsted, 21.6.2007 kl. 13:51]

Ég sé á skrifum ykkar að þið sáuð ekki leikinn.

KR átti meirihlutann í honum og ótal marktækifæri, sem nýttust ekki.

Samleikurinn góður og mannskapurinn góður. HK leikur feikna árangursríkan varnarleik og voru fanta heppnir í báðum marktækifærum sínum en kenna má markverði KR um síðara markið.

Ungu mennirnir í liði KR voru að mínu mati bestir þeirra.

[Þórður Gunnarsson, 21.6.2007 kl. 14:06]

Ég myndi nú fara í orðnotkuninni "rassskelling". Ég sá þennan leik og það er hreinlega með ólíkindum að HK hafi sett 2 mörk, voru í vörn í 90 mínútur.

[Stefán Friðrik Stefánsson, 21.6.2007 kl. 14:13]

Bjarni: Stundum þarf maður að tapa til að sjá hlutina í réttu ljósi, jafnvel nýju líka. Það getur stundum gengið upp og niður. Það er misjafnt. Á vondu dögunum er oft gott að hafa framsýni til að horft í spegil og séð hvað er að. Valur varð fyrir áfalli um daginn, en vonandi ná þeir að há alvöru baráttu um titilinn. Það er ömurlegt ef það verður ljóst um mitt sumar hver fær dolluna.

Einar Örn: Það er auðvitað alls ekki ómögulegt að snúa til baka úr svona botni. Enda eru skrif mín hér enginn dauðadómur þó staðan sé vond fyrir KR. Það er ekkert enn orðið of seint og það er enginn fallinn. Ég vona að KR nái að hysja upp um sig og taka næstu leiki vel og halda sér inni í dæminu. Það er mikilvægt fyrir boltann að þetta verði spennandi fótboltasumar en ráðist ekki fyrir mitt sumar.

Heimir: Það er ekkert vonlaust fyrir KR þó á móti blási. Staðan er þó orðin grafalvarleg. Þetta er versti botn KR í þrjá áratugi sem blasir núna við á þessum tímapunkti. En enn er tími og í svona botni geta falist tækifæri greini menn sig niður í grunninn og reyni að komast úr sjálfheldunni. Ég sá úr leiknum og sá að KR hafði ótalmörg tækifæri. Þeim mistókst að nota þau. Það er eitthvað stórlega að hjá KR. Það er afskaplega einfalt mál.

Doddi: Mér finnst það rassskelling þegar að HK tekur KR 2-0, þegar að litið er til sögu þeirra og mannskapsins í liðunum. HK eru nýliðar í deildinni og tókst að vinna með ekkert svo sérstökum leik þannig séð. Mér er ekki illa við KR, en það þarf ekkert sérstakan sérfræðing til að sjá að þar er allt í volli. En í botni felast tækifæri merkilegt nokk.

mbk.