Glæsilegur sigur - nýjir tímar í kvennaboltanum?

Það var yndislegt að sjá íslenska kvennalandsliðið bursta hið serbneska á Laugardalsvelli í sumarblíðunni í kvöld, 5-0. Glæsilegur sigur, stelpurnar áttu hann svo sannarlega skilið. Liðsandinn og stemmningin skein af liðinu og þær fóru algjörlega á kostum. Það er alveg greinilega að blómstra þetta landslið og þjálfari og leikmenn samstíga í góðum verkum. Þarna er gott starf til fjölda ára að skila sér svo sannarlega.

Það eru nýjir tímar í kvennaboltanum. 6000 manns voru á Laugardalsvelli. Þetta er auðvitað stórglæsilegt, loksins er kvennaboltinn að fá verðskuldaðan sess. Kvennaliðinu gengur mun betur en karlaliðinu og það er í ljóma sigursældar og góðs árangurs. Svo góður árangur byggir ekki bara góða liðsheild heldur tryggir að landsmenn vilja fylgjast með. Landsmenn hafa sjaldan stutt eins vel við bakið á kvennalandsliðinu í kvöld, enda var þetta glæsilegt móment fyrir kvennaboltann að mínu mati. Þetta var mikið sigurkvöld fyrir þær sem hafa leitt þetta starf árum saman og sjá nú afrakstur þess.

Staða íslenska kvennaliðsins er góð í riðlinum. Þær leiða hann með þrjá sigra og níu stig. Þetta er auðvitað stórmerkilegur árangur. Það er alveg ljóst að þetta er lið sem getur gert enn betri hluti en þá sem áður hafa átt sér stað. Það er þó ekkert gefið fyrr en yfir lýkur og framundan eru erfiðir leikir. En þetta er lið sem getur fært góða sigra, liðsheildin er öflug og landsmenn styðja stelpurnar 110%. Það allt skiptir máli. Þetta er blanda sem getur varla klikkað. Það sjáum við vel á þessu fagra júníkvöldi.

Athugasemdir

[Pétur Björgvin, 22.6.2007 kl. 08:44]

En er þetta ekki týpískt fyrir okkur karlana. Við höfum aldrei haft áhuga á kvennaboltanum, aldrei mætt á leik og allt í einu núna eru við helstu stuðningsmenn kvennaboltans?

[Stefán Friðrik Stefánsson, 22.6.2007 kl. 14:37]

Takk fyrir kommentið Pétur.

Ég persónulega hef alltaf fylgst með kvennalandsliðinu, þetta er ekki bara byggt á einu sumri. Þessi mikla uppbygging hefur staðið í um eða yfir fimm ár. Þær hafa sífellt eflst og byggt sig upp. Þær eru nú með lið sem er í heimsklassa. Það er einfalt mál. Við eigum að vera stolt af þeim.

mbk.