Átök í skjóli nætur

Það er fjarri því að verða stórfréttir núorðið að heyra eða sjá umfjöllun um fjöldaátök eða að hinn og þessi hafi annað hvort verið barinn í klessu eða stunginn í skjóli nætur, eða jafnvel hreinlega verið drepinn. Það er ekki langt frá því að fréttir voru um tilfelli í miðbæ Reykjavíkur þar sem maður var t.d. barinn og rændur eftir að hafa verið lokkaður inn í húsasund. Datt þetta einhvernveginn allt í hug þegar að ég las þessa frétt um fjöldaátök í austurbæ Reykjavíkur, þar sem vafi lék á hvort einn viðstaddra hefði verið stunginn eður ei.

Við erum svosem ekkert sérstök með fréttir af þessum óhugnaði. Eflaust er þetta um allan heim í mismiklu mæli og varla er þetta eitthvað einsdæmi hér. En þetta er samt að aukast sífellt hérna heima. Róleg hverfi geta orðið vígvöllur um helgar og jafnvel er fólk ekki orðið óhult við að fara út að skemmta sér að helgarnóttu, það hafa dæmin sannað. Sumir hafa verið barðir svo illa í miðbæ Reykjavíkur um nótt að þeir hafa annaðhvort dáið eða bera merki þess alla tíð eftir það. Þetta er ömurlegt ástand.

Ég hugsa oft um það hvernig samfélagið okkar sé. Það er auðvitað alltaf best að trúa á hið besta í hverjum og einum en einhvernveginn efast maður um það allt saman þegar að fréttir af þessu tagi hrannast yfir morguninn eftir helgarkvöld eða jafnvel á virkum degi. Þetta er eiginlega orðið ástand sem vekur orðið of mikla athygli til að maður hugsi ekki um það.

Eða er þetta kannski orðið svo algengt ástand að maður er hættur að kippa sér upp við það. Erfitt um að segja. Hvað mig varðar finnst mér þetta ástand sem er ekki hægt að horfa framhjá. Þetta fær mann til að hugsa um hvert við stefnum og hvernig samfélagið sé. Það er mjög einfalt mál.

Óþekkt áhald notað í fjöldaátökum í nótt

Athugasemdir

[Ragnheiður , 24.6.2007 kl. 21:06]

Sonur minn varð fyrir árás á Akureyri fyrir rúmri viku og fótbrotnaði. Hann naut gestrisni norðanmanna til þriðjudags og var afar ánægður með FSA og lögregluna í bænum.

[Marinó Már Marinósson, 24.6.2007 kl. 21:17]

Sammála þér.  Þetta er orðið óþolandi ástand.  Það verður að fara að gera eitthvað í þessu.

[Ásdís Sigurðardóttir, 24.6.2007 kl. 21:26]

Þetta er einfaldlega skelfilegt og er að hluta til vegna þess að þá virðist vera svo að ekki megi banna neitt og forsjárhyggja sé af hinu vonda. Það þarf að hafa stjórn á hlutunum, ekki með eintómu valdi en stýringu. Það er líka mikill skortur á því að börn fái það aðhald í uppvexti að þau kunni að haga sér á mannsæmandi hátt þegar þau vaxa upp.

[Jóhann Páll Símonarson, 24.6.2007 kl. 21:35]

Heill og sæll Stefán.

Nú voru það ekki Íslendingar á ferð eins og við höfum heyrt í útvarpi að undan förnu. Nú voru þetta útlendingar ég held að þetta sé rétt að byrja. Ég veit ekki hvað þessir ofbeldis karlar hafa verið hér lengi.

Það er mín skoðun að það eigi að vísa þessum mönnum úr landi strax. Það er ekki spurning. Ofbeldi hefur stór aukist á Íslandi undan farinn 4 ár. Það liggur við að stórauka þurfi Lögreglu og gefa þeim rýmri heimildir að athafna sig.

Ég hef víða komið við í erlendum höfnum þegar ég hef átt þar leið í mínu starfi. Þegar ég hef tekið mér leigubifreið til borgarinnar þá er borinn virðing fyrir lögreglu og ef menn eru með kjaft þá fá þeir það sem þeir óska sjálfir.

Á Íslandi þá standa menn upp í hárinu á lögreglumönnum og jafnvel kýla þá í andlitið að minnsta tilefni. Síðan er tekinn af þeim skýrsla og þeir fara þeir. Að lokum kemur dómurinn þeir fá enga sekt. aðeins skilorðsbundið.

Það þarf að taka hart á öllum brotum og dæma menn hart strax og beita sektum svo um munar. Því Íslensk þjóð á við agavandamál að etja. Þess vegna þarf að stórauka gæsluna og gefa lögreglumönnum rýmri heimildir til að berja niður ofbeldið sem viðgengst á götum borgarinnar og í heimahúsum

Jóhann Páll Símonarson.

[Stefán Friðrik Stefánsson, 24.6.2007 kl. 22:31]

Takk fyrir kærlega fyrir kommentin.

Hross: Gott að vita að það gekk vel þrátt fyrir óhappið. Allt er gott sem endar vel. Það er vel hugsað um alla hér sem slasa sig. Við eigum frábært sjúkrahús.

Marinó: Já, nákvæmlega. Allavega mikilvægt að velta þessu vel fyrir sér.

Ásdís: Já klárlega, tek undir hvert orð. Mjög vel skrifað hjá þér mín kæra.

Jóhann Páll: Já, ég hugsa svosem ekki um hverjir gera þetta. Er eiginlega orðið of dapurlegt til að greina það. Ég vil leyfa þeim sem koma hingað að njóta vafans. En brjóti þeir af sér og gera öðrum illt verður að endurskoða vist þeirra. Tek undir mjög margt af því sem þú segir. Raunsönn og góð skrif.

mbk.