Hver mun verða skipaður í Hæstarétt Íslands?

Það kom ekki að óvörum að Hrafn Bragason, hæstaréttardómari, hefði ákveðið að víkja úr Hæstarétti. Hann verður sjötugur innan árs og því öllum ljóst að styttist í starfslok hans. Vangaveltur munu nú hefjast um það hverjir muni sækja um sæti Hrafns í Hæstarétti, en Björn Bjarnason, dómsmálaráðherra, mun skipa í réttinn, en hann sat hjá við tvær síðustu skipanir í kjölfar mála Hjördísar Bjarkar Hákonardóttur.

Þegar að Guðrún Erlendsdóttir lét af dómaraembætti vorið 2006 var Hjördís Björk Hákonardóttir skipuð í hennar stað, eftir að hafa ekki fengið dómaraembætti árin 2003 og 2004, þegar að Ólafur Börkur Þorvaldsson og Jón Steinar Gunnlaugsson fengu skipun í réttinn. Páll Hreinsson, forseti lagadeildar Háskóla Íslands, sótti þá um stöðuna en fékk ekki þrátt fyrir að margir töldu hann einn allra vænlegasta umsækjandann. Það kæmi ekki að óvörum þó að Páll myndi aftur sækja um núna og eflaust verður líka spáð í hvort að Eiríkur Tómasson, lagaprófessor, muni verða í hópi umsækjenda, en margir framsóknarmenn, þar á meðal Halldór Ásgrímsson lýstu yfir óánægju sinni þegar að hann fékk ekki skipun í réttinn haustið 2004 er Jón Steinar var valinn.

Tvær konur sitja í Hæstarétti. Ingibjörg Benediktsdóttir var skipuð í réttinn af Sólveigu Pétursdóttur árið 2001 og eins og fyrr segir hefur Hjördís Björk Hákonardóttir verið hæstaréttardómari frá því að Guðrún Erlendsdóttir hætti á síðasta ári, en hún var skipuð í réttinn af Geir H. Haarde, forsætisráðherra. Eflaust munu heyrast einhverjar raddir um það hvort að kona muni fá hnossið nú og eflaust munu einhverjar sækja um. Sigríður Ingvarsdóttir, héraðsdómari við héraðsdóm Reykjavíkur, sótti um embættið í fyrravor. Fróðlegt verður að sjá hvort hún verði nú í hópi umsækjenda.

Allan Vagn Magnússon, héraðsdómari, hefur sótt nokkrum sinnum um embætti hæstaréttardómara og ekki fengið. Athyglisvert verður að sjá hvort hann reynir aftur og sama mætti eflaust segja um Eggert Óskarsson, héraðsdómara, og Þorgeir Ingi Njálsson héraðsdómari við héraðsdóm Reykjaness, sem hafa reynt áður að komast í Hæstarétt.

Svo eru eflaust einhver ný nöfn fólks sem munu bætast við, fólk sem hefur víðtæka reynslu og hefur hug á embættinu. Það verður í það minnsta athyglisvert að sjá lista umsækjenda þegar að umsóknarfrestur hefur runnið út.

Athugasemdir

[Jón Ingi Cæsarsson, 3.7.2007 kl. 18:08]

Dómsmálaráðherra finnur einhvern góðkunningja sinn úr Sjálfstæðisflokknum. Það eru einhverjir á lausu úr þeim geira.

[Már Högnason (IP-tala skráð) 3.7.2007 kl. 18:35]

Umsækjendur eina fá

sem enginn stöðu varnar, 

með flúrað merki flokksins á

feitar rasskinnarnar

[Ásdís Sigurðardóttir, 3.7.2007 kl. 20:24]

Kemur í ljós. Maður vonar alltaf að verðleikar ráðu meiru en vinargreiði

[Aðalheiður Ámundadóttir, 3.7.2007 kl. 20:39]

Ég vil engan kynjakvóta heldur hæfasta umsækjandann

[Guðjón Helmut Kerchner, 3.7.2007 kl. 21:57]

Ætli hann skipi ekki einhvern góðan lögmann sem er viðriðinn Baugsmálið í Hæstarétt, svo hann fái nú "rétta" niðurstöðu úr dómskerfinu á næstuni.

[Anna Pála Sverrisdóttir, 3.7.2007 kl. 22:23]

Ég held að Eiríkur Tómasson muni ekki sækja um meðan Björn Bjarnason er ennþá dómsmálaráðherra.

[Stefán Friðrik Stefánsson, 3.7.2007 kl. 22:57]

Takk fyrir kommentin og pælingarnar við skrifin mín. Það verður fróðlegt að sjá hverjir sækja um allavega.

mbk.