Dramatík á Skaganum - KR nær bara jafntefli

Það var ævintýralega skemmtilegt að horfa á leik Skagans og Keflavíkur í kvöld. Mikil hasar; dramatík og rauð spjöld setti mesta svip sinn á leikinn, sem Skaginn vann að lokum á heimavelli 2:1. Ég yrði ekki hissa á því þó að þetta yrði metinn áhugaverðasti leikur sumarsins og mikið yrði um hann deilt og tekist á að mörgu leyti.

Sérstaklega var magnað atvik og athyglisvert þegar að Keflvíkingar spörkuðu knettinum út af hliðarlínu í seinni hálfleik til að hægt væri að líta til með leikmanni Skagamanna sem meiddist í leiknum. Skagamenn tóku innkastið og boltinn barst til Bjarna Guðjónssonar, sem skaut boltanum frá miðjunni og beint í mark Keflvíkinga. Mikill hasar var á svæðinu eftir það. En Skagamenn tóku stigin þrjú.

KR náði aðeins jafntefli í leiknum gegn Fylki og fá því eitt stig. Þeir eru því enn á botninum og hafa fimm stig eftir níu umferðir, hálfa deildina semsagt. Góð ráð eru að verða dýr fyrir þá, en enn er staða þeirra fjarri því orðin vonlaus. En þeir þurfa að bæta sig verulega til að ná alvöru stöðu. FH-ingar eru efstir með 22 stig, Valur hefur 18 stig í öðru sætinu, Keflavík hefur 17 stig í því þriðja. Næst kemur Skaginn með 14. stig, Fylkir hefur 12 stig, Breiðablik og HK eru í 6.-7. sætinu með 10 stig, Fram og Víkingur eru í því 8.-9. sæti með 8 stig og KR hefur hefur fimm stig á botninum.

Þetta verður spenna í næstu umferðum, enda toppslagurinn líflegur og vonandi mun botnslagurinn verða öflugur. Það er engum til góðs að KR falli harkalega strax og vonandi að alvöru átök verði um fallsætið. Dramatíkin var allavega mikil á þessu miðvikudagskvöldi á Skaganum en þeir fóru tvö rauð spjöld, eitt á hvort lið, er yfir lýkur. Þvílíkur hasar og skemmtilegur leikur á að horfa í kvöld á Sýn.

Skagamenn lögðu Keflvíkinga á dramatískan hátt

Athugasemdir

[Ásdís Sigurðardóttir, 5.7.2007 kl. 00:08]

Ég er nú bara svo ánægð með þetta.

[Grímur Kjartansson, 5.7.2007 kl. 08:56]

"til að hægt væri að líta til með leikmanni Keflavíkur sem meiddist í leiknum"
Það var nú leikmaður ÍA sem lá á vellinum og Bjarni tók á rás FRÁ miðju framhjá tveim leikmönnum ÍBK áður en hann lét vaða.

[Bjarni Kjartansson, 5.7.2007 kl. 09:06]

Íþróttamannsleg hegðan, eða óviljaverk.

Hver skoði sjálfan sig og láti samviskuna ráða.

Miðbæjaríhaldið

[Óðinn Þórisson, 5.7.2007 kl. 09:25]

Hlíðarendastórveldiið vann  

Bjarni Guðjóns. ætlaði hann að skora - ekki samkv. skýringu Guðjóns Þ.

[Þröstur Unnar, 5.7.2007 kl. 09:50]

Skoðið upptökuna bara vel

[Stefán Friðrik Stefánsson, 5.7.2007 kl. 13:09]

Takk fyrir kommentin.

Þakka leiðréttinguna með leikmann Skagans, það var villa í textanum hjá mér, fljótfærnisvilla greinilega.

En já, þetta verður hitamál lengi. Komast aldrei allir að sömu skoðun. En ég spái því að þetta verði mál sem verði deilt um mjög lengi í boltanum hérna heima. Sögulegt móment.

mbk.