100 dagar liðnir - hvað varð um Madeleine?

100 dagar eru nú liðnir frá því að Madeleine McCann hvarf sporlaust í bænum Praia de Luz á Algarve í Portúgal. Mikil dulúð hefur umlukið málið allt frá fyrsta degi og foreldrar hennar hafa leitt leitina að henni með mjög áberandi hætti í fjölmiðlum. Þetta mál hefur verið hrein skelfing fyrir foreldrana. Samviskubit þeirra yfir stöðunni hlýtur að vera gríðarlega mikið og varla minnkar það með degi hverjum.

Það er merkilegt að nú eftir alla þessa daga og fáar sýnilegar vísbendingar um hvað gerðist að kvöldi fimmtudagsins 3. maí, kvöldið sem Madeleine hvarf að talið berst að hlut foreldranna. Að mörgu leyti er það í miklum dularhjúpi og margir hafa velt því fyrir sér hvernig foreldrarnir gátu skilið dóttur sína eftir á hótelherberginu og framganga þeirra síðan hefur verið eitt stórt spurningamerki. Ljóst er að portúgalska lögreglan vann málið allt of hægt í upphafi og klúðraði væntanlega rannsókninni á upphafsstigi. En hlutur foreldranna hefur ekki síður verið til umræðu en þeirra.

Það segir sig sjálft að eftir hundrað daga hvarf manneskju verður umræðan um hvort að hún sé látin mjög hávær. Þess eru þó dæmi að fólk finnist eftir svo langt hvarf, hafi það verið numið á brott, en þau eru grátlega fá í raun og veru. Svo virðist sem portúgalska lögreglan telji líklegast að Madeleine sé látin. Það er að mörgu leyti ekki óvarlegt mat miðað við stöðu málsins eftir allan þennan tíma. Klúður lögreglunnar er þó mikið og verður aldrei framhjá því litið. Fyrir nokkrum dögum fannst blóð í hótelherbergi McCann-hjónanna. Það er auðvitað kostulegt að það finnist svo seint, enda gæti verið um stórtíðindi í málinu að ræða.

Spurningarnar um framgöngu foreldranna verða æ meira áberandi. Það yrðu athyglisverð endalok ef þau yrðu kærð fyrir vítaverða vanrækslu, eins og fram kemur í fréttinni. Þetta er að mörgu leyti athyglisvert mál. Það er mikilvægt að á það fáist einhver endir. Það verður skelfilegt fari það svo að Madeleine finnist aldrei og aldrei verði ljóst hvað gerðist fyrir 100 dögum.

Fjölmiðlar fjalla enn um málið með sama hætti og var fyrstu vikuna. Hef fylgst talsvert með því íá bresku fréttastöðvunum. Auðvitað vilja þeir fylgja eftir því sem gerðist og reyna að fá svör. Það vilja allir sem fylgjast með. Eftir því sem hver dagur líður aukast þó líkurnar á því að Madeleine sé látin. Vonin minnkar sífellt.

Það er hin napra staðreynd allra mála af þessu tagi, líka þessu auðvitað.

Lögreglan segir mögulegt að Madeleine McCann sé látin

Athugasemdir

[Stefán Friðrik Stefánsson, 11.8.2007 kl. 18:51]

Ég er að tala um að það sé kostulegt að það finnist svo seint. Það ber vitni mistökum portúgölsku lögreglunnar. Það voru mörg mistök gerð fyrstu dagana við rannsóknina og vinnslu málsins. Þetta er allt áfellisdómur yfir lögreglunni. En auðvitað er það hörmulegt, en þú ert greinilega að misskilja samhengið sem ég talaði um þetta mál. Það er ekki hægt að segja annað en að þetta sé með ólíkindum, að þetta fyrst komi upp úr dúrnum eftir um 100 daga.

[Stefán Friðrik Stefánsson, 11.8.2007 kl. 19:18]

Portúgalska lögreglan hefur algjörlega klúðrað rannsókninni. Það er auðvitað hörmulegt í sjálfu sér, en þau mistök að fyrst núna finnast lykilvísbendingar á staðnum er í senn kostulegt og hörmulegt að sjálfsögðu. Allavega ég stend við orðalagið.

[Ásdís Sigurðardóttir, 12.8.2007 kl. 00:16]

Þras og þjark í kommentum skilar henni víst ekki til foreldra sinna, vona barnsins vegna að það komi lausn á málinu á hvern vegin sem fer.

[María Anna P Kristjánsdóttir, 12.8.2007 kl. 07:11]

Mér finnst óviðeigandi athugasemdir í garð Stefáns hér að ofan hjá sumum ykkar hann er frábaer penni og getur bloggað um thad sem hann vill. En hvað varðar mál Madeleine thá hefur málið verið rannsakað frá upphafi sem mannrán,thad hefur sennilega tafið rannsóknina,grunað hefur verið í heilan mánuð að barnið vaeri látið,en loegrelga hefur ekki getað staðfest thad.Ég hef fylgst með málinu frá Spáni.

[María Anna P Kristjánsdóttir, 12.8.2007 kl. 09:45]

Árni.. ég tek undir thad að maður á að vera varkár í návist sálar,en thad er mismunandi hvernig fólk orðar hugsanir sínar.  Kveðja María

[Stefán Friðrik Stefánsson, 12.8.2007 kl. 10:52]

Hér hafa verið tekin út nafnlaus komment sem voru fyrir neðan allt. Vil taka það skýrt fram að ætli fólk að setja út á skrifin eða mig persónulega að koma fram undir nafni. Ella verður þeim hent út. Það er mjög einfalt mál.

Nafnlaus skrif af þessu tagi auka aðeins líkurnar á að hætt verði hér með kommentakerfi svo ég vil beina því til svörtu sauðana að eyðileggja ekki fyrir öðrum hér sem vilja kommenta af viti.

[Stefán Friðrik Stefánsson, 12.8.2007 kl. 11:05]

Það eru skilyrði vegna kommenta. Það sést hér ofarlega á síðunni. Það eru mjög skýrar leikreglur. En ég ætla ekki að fara að eyða miklum tíma í að ritskoða efni hér. Fari þetta yfir mörkin endalaust mun þetta enda með því að kommentakerfinu verður lokað. Það er mjög einfalt mál.