Aron Pálmi losnar úr prísundinni

Það er mikið gleðiefni að Aron Pálmi Ágústsson sé loksins laus úr prísund sinni. Mál hans hefur verið hrein sorgarsaga og ánægjulegt að hann geti nú haldið áfram að lifa lífinu eftir erfiðan áratug sem hefur einkennst af innilokun og erfiðleikum. Það hefur reyndar verið athyglisvert að fylgjast með kerfinu í Texas í nærmynd í þessu máli, en það að 13 ára gamall einstaklingur sé dæmdur í tíu ára refsivist er eiginlega illskiljanlegt.

Sá fyrir nokkrum árum viðtalsþátt fyrir Aron Pálma. Það má sannarlega segja að hann hafi farið á mis við margt vegna þessa dóms sem hefur eyðilagt mörg bestu ár hans og hlýtur að hafa haft lamandi áhrif á persónu hans eiginlega. Það var greinilegt af viðtalinu að Aron Pálmi leið mjög illa sem eðlilegt má teljast í þessari stöðu og það var mjög lærdómsríkt að sjá þetta viðtal og kynnast persónunni á bakvið Aron Pálma, sem svo mikið hefur verið í fréttum hér árum saman, í skugga þessa athyglisverða máls.

Brátt er Aron Pálmi sannarlega á heimleið. Hann ætlar sér að byggja nýtt líf handa sjálfum sér hér á Íslandi. Hann talar ekki íslensku og ætlar sér að læra málið. Það er vonandi að honum gangi vel á framtíðarbrautinni og muni eiga gott líf hérna heima á Íslandi. Það er gott að refsivistinni sé lokið og hann geti horft fram á bjartari tíma er þessum dimma kafla lýkur loksins.

Aron Pálmi frjáls maður

Athugasemdir

[Halla Rut , 19.8.2007 kl. 10:06]

Ég hef reyndar miklar áhyggjur af þessu máli. Ég óttast að hann komi hér og verði látin afskiptalaus. Hann hefur orðið fyrir kynferðislegu ofbeldi, hann hefur beitt kynferðislegu ofbeldi. Hann hefur verið í fangelsi, ekki fengið að lifa sín unglingsár eðlilega og verið í einangrun. Ég er ekki einu sinni viss um að þetta stofu fangelsi sé betra en venjulegt fangelsi því í fangelsi er vinna, félagsskapur og rútína. Hann þarf mikla hjálp og ég óttast að hún verði ekki veitt.

Ég óska honum alls hins besta og bíð hann velkomin. Hann er íslendingur og við Íslendingar erum ein fjölskylda og eigum að sjá um okkar fólk. 

[Halla Rut , 19.8.2007 kl. 11:42]

Ekki getum við lokað 11 ára barn inni að elifu og því hefði átt að hjálpa honum. Það er nú greinilega mikið að þegar 11 ára gömlu barni dettur kynlíf yfirleitt íhug en það er víst einmitt málið hann hafði orðið fyrir sama ofbeldi sjálfur.Með þetta í huga er ég sammála Árna, dómskerfi hér tekur allt of létt á kynferðis ofbeldismönnum..

[Halla Rut , 19.8.2007 kl. 12:22]

Var hann manaður uppí þetta. Það er slæmt að sagan hefur aldrei komið almennilega fram. Það er greinilegt að mikil óvissa ríkir um þetta sem er ekki gott. 

[Sigurður Þór Guðjónsson, 19.8.2007 kl. 14:11]

Er ekki líka illskiljanlegt að dæma 15 ára barn í fangelsi á Kvíabyggju? Og það er rétt að öll sagan hefur aldrei verið sögð öll á Íslandi svo ég viti.

[Halla Rut , 19.8.2007 kl. 14:48]

Sonur minn verður 15 ára næsta mars. þetta er svo mikil fjarstæða að hægt sé að loka hann inni að ég næ ekki einu sinni að hugsa út í það.  En ég veit að hann þekkir vel rétt frá röngu.

15 ára drengur þarf hjálp en ekki að vera lokaður inni þar sem hann fær að kynnast nýjum "vinum" 

[Stefán Friðrik Stefánsson, 20.8.2007 kl. 21:10]

Takk fyrir kommentin og hugleiðingarnar.

Vona að Aron Pálma muni ganga vel að aðlagast hér aðstæðum. Hann þarf svo sannarlega á aðstoð að halda og vonandi fær hann hana. Heilt yfir er þetta sorgarsaga en er um leið gott sýnishorn í bandarískt réttarfar. Mér finnst það ekki eðlilegt að börn undir fimmtán ára aldri séu sakhæf. Það að dæma þrettán ára strák í tíu ára fangelsi er grimmd, einfalt mál það og vonandi mun hann geta fetað út úr þessum skugga er hann kemur til Íslands og byggir nýtt líf.

mbk.