Er ráðgátan um hvarf Madeleine að leysast?

Það er ekki hægt að segja annað en að það sé sláandi að heyra fréttir af því að móðir Madeleine McCann hafi nú stöðu grunaðrar í máli hennar. Flest virðist benda til að hún verði ákærð vegna hvarfs hennar síðar í dag, enda hafa blóðleifar úr Madeleine fundist í bifreið sem foreldrarnir höfðu til umráða eftir hvarf hennar. Þetta eru stórfréttir í málinu og leiða hugann að því auðvitað hvort foreldrarnir hafi verið valdir að dauða Madeleine.

Fjölmiðlar hafa talað mikið um það sérstaklega síðustu 50 dagana hvort að verið gæti að sakborningar í þessu máli séu sjálfir foreldrarnir, þau sem næst standa Madeleine. Atburðarás þessa máls hefur reyndar alla tíð verið undir smásjá slúðurblaða og deilt um hvern einasta þátt hennar, sérstaklega þann þátt foreldranna að hafa ákveðið að fara út að borða með börn sín ein síns liðs heima í íbúðinni sem þau dvöldu í. Strax vegna þess vaknaði viss vafi og margir hugleiddu það talsvert.

Held samt að margir hafi ekki viljað leggja þau undir grun, þó fátt hafi bent til annars en að augljósasta skýringin á örlögum Madeleine væri sú sem stæði næst. Það verður hinsvegar að segjast eins og er að grunurinn hefur sífellt færst meira í áttina að þeim eftir því sem liðið hefur frá hvarfi Madeleine. Einhverjar vísbendingar hafa borist um hvarf hennar, en þær hafa allar verið mjög haldlitlar og ekki beint til að byggja mikið á, þó slúðursögurnar hafi orðið mun fleiri. Foreldrarnir hafa verið í kastljósi fjölmiðla frá fyrsta degi og verið í fjölda viðtala og aðeins eru nokkrir dagar síðan að þau voru saman í löngu viðtali á Sky sem ég sá og þar komu þau fram af miklu öryggi.

Það er auðvitað til marks um verulega kaldrifjað hugarfar ef þau hjón bera ábyrgð á dauða dóttur sinnar og hafa á meðan getað leikið svo sannfærandi hlutverk hinna örvæntingarfullu foreldra. Get bara ekki sagt annað. Er satt best að segja að vona að verið sé að hafa þau fyrir rangri sök eins og Chamberlain-hjónin í Ástralíu fyrir um þrem áratugum, en þau voru sökuð um að hafa myrt kornabarn sitt, en síðar kom í ljós að dingó-hundar átu það. Það var frægt mál sem var fjallað um í kvikmyndinni A Cry in the Dark árið 1988 með Meryl Streep og Sam Neill í aðalhlutverkum.

En þessar vísbendingar eru mjög afgerandi og erfitt að verjast þeim. Það blasir við. En það er alveg ljóst að dómur almennings og fjölmiðla yfir McCann-hjónunum verður verulega þungur sé málið svona vaxið eins og sannanir gefa til kynna.

Lögregla segir blóð úr Madeleine hafa fundist í fjölskyldubílnum

Athugasemdir

[Árni Gunnarsson, 7.9.2007 kl. 12:48]

Málið er mér óskiljanlegt. Ef þessar grunsemdir um viðbjóðslegan glæp foreldranna hef ég mesta áhyggjur af fyrirbærinu "menning."

Þá sýnist mér einboðið að stokka spilin upp á nýtt og undirbúa flutning mannkynsins til baka upp í skóginn og til upprunans.

Ég held dauðahaldi í skárri skýringar en þær sem nú er verið að skoða.

[Njörður Lárusson, 7.9.2007 kl. 12:58]

Útilokað mál, að þau hafi fyrirkomið barni sínu.   Þau gætu hugsanlega verið að fela misnotkun, hörmulegt slys, eða eitthvað álíka.  Niðurstaða rannsóknarmanna gæti líka verið röng.  Annað eins hefur átt sér stað, þrátt fyrir nýjustu DNA tæknigreiningar,  þá eru þær ekki óskeikular.  Hvað ef blóðið er svo bara úr systkyni hennar, sem skar sig á einhverju í bílnum ? 

[Haraldur Haraldsson, 7.9.2007 kl. 14:11]

Fólk er saklaust þar til sekt er sönnuð!!!!!/Halli Gamli

[Stefán Friðrik Stefánsson, 9.9.2007 kl. 14:21]

Takk fyrir kommentin. Alveg sammála þér Halli með að fólk er saklaust uns sekt sannast. Það er vinnuregla alls sem vert er að hafa í heiðri.

Persónulega trúi ég ekki að þau hafi drepið stelpuna. Finnst það of skelfilegt til að trúa því hreinlega. Ef það er satt hafa þau leikið tveim skjöldum alla tíð og farið um heiminn og presenterað leit að látnu barni og leitað aðstoðar þekkts fólks með fölskum brag. Það er skelfilegt ef það reynist rétt.

mbk.