Símaauglýsingu kippt út - hefnd af himnum ofan?

Ég var að heyra það áðan að auglýsingu Símans hefði verið kippt úr umferð - vegna þess að þar glittir í merki Vodafone. Verulegar deilur voru um þessa auglýsingu, enda var síðasta kvöldmáltíð Jesú Krists sviðsett þar, við litla hrifningu forsvarsmanna Þjóðkirkjunnar og tekist var á um framsetningu hennar í fjölmiðlum. Síminn fékk verulega ókeypis umfjöllun og gat vel við unað, markaðsmenn fyrirtækisins slógu sannarlega í gegn.

En þetta er óneitanlega ansi fyndið; að auglýsingin sé kippt úr umferð. Væntanlega verður henni breytt eitthvað. Ég verð þó að viðurkenna að ég sé ekki þetta Vodafone-merki. Það er þá glettilega smávægilegt í auglýsingunni. Veit eiginlega ekki hvar það er. Þarf kannski að líta aftur á auglýsinguna til að sjá það, ef það þá sést nema með stækkunargleri.

Einhverjir myndu kalla þetta hefnd af himnum ofan. Þetta er allavega hlægilegt twist eftir allt sem á undan er gengið.

Athugasemdir

[Ásdís Sigurðardóttir, 11.9.2007 kl. 20:25]

Það þarf mikla rýni til að sjá þetta merki en það er þarna.  Hrekkur að ofan?? hver veit, GUÐ hefur allavega kímnigáfu það er ég viss um.

[Fransman (IP-tala skráð) 11.9.2007 kl. 20:42]

Nú hef ég ekki séð þessa auglýsingu, en mig grunar að þetta 3G þar sem búið er að hylja hluta af '3' geti staðið fyrir OG í undirvitund margra.

[Ragnheiður , 11.9.2007 kl. 21:43]

http://www.visir.is/article/20070911/FRETTIR01/70911098

Sjáðu hérna Stefán,hérna sést það greinilega.

Kveðja og takk fyrir hlý orð á síðunni minni

[Kristján Pétursson, 11.9.2007 kl. 23:18]

Júdas sveik Jesú og Símann líka og Vodafone fékk bestu auglýsingu ársins.Merki Vodafone var lúmskulega falið,en þó greinilegt þegar manni var á það bent.

[Stefán Friðrik Stefánsson, 13.9.2007 kl. 16:33]

Takk kærlega fyrir kommentin og ábendingarnar. Það vekur sannarlega athygli að Vodafone fái pláss hjá Símanum í þessari sögulegu auglýsingu sinni. :)

mbk.