Verður Hafnarstræti 98 friðað og endurreist?

Um fátt hefur verið meira rætt hér meðal Akureyringa að undanförnu en hvað gera eigi við húsið að Hafnarstræti 98. Sitt sýnist hverjum og skoðanir verið skiptar. Sumir vilja endurreisa húsið en aðrir vilja rífa það, helst sem fyrst. Bæjaryfirvöld höfðu tekið þá afstöðu að það skyldi víkja fyrir margt löngu og nú átti brátt að koma að því að það yrði rifið. Það mál er komið á pásu eftir þá ákvörðun Húsafriðunarnefndar að leggja til að húsið verði friðað.

Ég hef ekki verið mjög áberandi svosem í þessari umræðu og ekki verið í hópi þeirra sem harðast hafa gengið fram í því að húsið skuli rifið. Hinsvegar hef ég þó mjög lengi verið í hópi þess fólks sem hefur blöskrað hvernig komið er fyrir Hafnarstræti 98 og talið ástand hússins fyrir neðan allt. Það hefur verið mikil lýti á götumynd Hafnarstrætis árum saman og verið sem ljóti andarunginn í margra augum. Ekki að ósekju. Eftir að Hafnarstræti 94 og 96 voru gerð upp varð skelfilegt ástand Hafnarstrætis 98 enn meira áberandi. Er svo komið að flestum er nóg boðið. Ef ekki eigi að rífa húsið þá verði einhver að sýna þann myndarskap að byggja það upp.

Það hefur verið beðið eftir því árum saman að einhver hefði þann mannsbrag fram að færa en sú bið hefur verið einum of löng - það gengur ekki lengur að bíða eftir því að riddarinn á hvíta hestinum komi til að redda þessu. Það er því ekki undarlegt að málið sé komið í þetta ferli. Heilt yfir finnst mér margir vilja varðveita þessa götumynd sem er vissulega mjög til staðar með þessum þrem húsum og Bautanum á hinu horninu. Ég sem Akureyringur frá fornu fari finnst það mjög mikilvægt að staðið verði vörð um gamla götumynd, en það er ekki nóg bara að hugsa hlutina. Ef ekki finnst einhver með peninga til að láta hugmyndirnar rætast er málið reist á sandi.

Það er ekki hægt að bíða lengur eftir því hvað getur mögulega gerst. Eigi að endurreisa þetta hús er nú komið að því með myndarlegum brag eða að rífa það að öðrum kosti. Það er grátlegt að sjá þetta hús í þessu ástandi og spurningin snýst því um hvort einhver sjá hag sinn í því að endurreisa það. Ákvörðun Húsafriðunarnefndar hlýtur að kalla á að þeir veiti myndarlegan styrk í að endurreisa húsið ef þeim er alvara. Ef svo er ekki og ekki sýnir einhver áhuga á því að endurreisa húsið á það að víkja að mínu mati. Það er komið að örlagastund og taka verður afstöðu sem fyrst.

Það er ekki valkostur að mínu mati að Hafnarstræti 98 standi mörg ár í viðbót í því dapurlega ástandi sem það er í.
 

Húsafriðunarnefnd vill friða öll húsin þrjú

Athugasemdir

[Pálmi Gunnarsson, 19.9.2007 kl. 14:14]

Gott hjá húsafriðunarnefnd að taka af skarið. Nú þarf að taka til hendinni og gera upp ... þetta hús á eftir að prýða miðbæinn um ókomin ár.

[Hlynur Hallsson, 19.9.2007 kl. 14:18]

Það eru góðar fréttir að búið er að friða Hafnarstræti 98. Betra seint en aldrei og ég tek undir með Pálma að nú er bara að drífa í því að gera húsið upp svo það ljómi eins og nágrannahúsin Hamborg og París. Bestu kveðjur,

[Stefán Friðrik Stefánsson, 19.9.2007 kl. 14:39]

Þakka kommentin. Er sammála ykkur með að endurreisa húsið. Er sérstaklega ósáttur með teikningarnar að nýju húsi og ekki hlynntur þeim.

mbk.