Kristján biður skipaverkfræðinginn afsökunar

Það var gríðarlegt pólitískt klúður hjá Kristjáni L. Möller, samgönguráðherra, að kenna Einari Hermannssyni, skipaverkfræðingi, einum um Grímseyjaferjuklúðrið mikla. Seint og um síðir hefur hann nú beðið Einar afsökunar. Er með ólíkindum hversu mjög Kristján hefur dregið þá afsökunarbeiðni og eiginlega honum til skammar að hafa beðið svo lengi. Með þessu var ráðherrann að hengja bakara fyrir smið. En betra er jú seint en aldrei að átta sig á mistökum sínum.

Róbert Marshall, aðstoðarmaður samgönguráðherra, bætti ekki úr skák fyrir ráðherranum þegar að hann geystist fram á ritvöllinn til að reyna að verja þetta klúður ráðherrans. Hann hafði enga stjórn á orðavali sínu í skrifum til Bjarna Harðarsonar, alþingismanns, og minnti mig á fyllerístal varaformanns Frjálslynda flokksins í garð undirritaðs, Halldórs Blöndals og Björns Bjarnasonar, nótt eina á spjallvef fyrir þrem árum, þar sem hann vildi sprengja okkur til helvítis. Stjórnlaus og ómálefnaleg skrif sem voru engum manni í pólitísku starfi til sóma.

Róbert missti svo enn og aftur stjórn á sér í spjallþætti fyrir viku þar sem hann réðst að Bjarna með skít og skömm. Var svona á tímapunkti varla að maður tryði því að þar færi maður sem hefði verið fréttastjórnandi á einu alíslensku fréttastöðinni í sjónvarpi. Róbert varð sér til skammar og opinberaði sinn innri mann rétt eins og varaformaður Frjálslynda flokksins á sínum tíma. Hann varð sér algjörlega til skammar og gengisfelldi sig svo um munaði. Hann gerði illt verra fyrir Kristján Lúðvík Möller, sem væntanlega vildi reyndan fjölmiðlamann til að aðstoða sig til að ná til pressunnar en ekki draga sig upp úr svaðinu í leiðinni.

Kristján er maður að meiri fyrir að játa á sig mistök sín og leysa þennan hnút sem hann átti svo erfitt með að leysa með aðstoð Róberts Marshalls.

Kristján biðst afsökunar

Athugasemdir

[Heimir Lárusson Fjeldsted, 22.9.2007 kl. 14:33]

Bæði Kristján L. Möller og Róbert Marshall urðu sér til háborinnar skammar.

Í þættinum með Bjarna Harðarsyni (sem vex við hverja raun) varð hann bara aumkunnarverður.

Kristján bætir úr skák með afsökunarbeiðni sinni en ég hygg að Róbert beri ekki gæfu til þess.

[Fannar frá Rifi, 22.9.2007 kl. 17:42]

Er Kristján ekki í mjög slæmum málum núna? Þetta mál getur endað með því að fylgja honum allann sinn pólitíska feril. Sérstaklega þar sem aðstoðarmaður hans fór svo mikinn eins og raun bar vitni?

[Stefán Friðrik Stefánsson, 22.9.2007 kl. 21:45]

Þakka kommentin.

Heimir: Algjörlega sammála. Róbert fór alveg með sig þarna. Hann ætti að sýna sóma sinn að biðja Bjarna Harðar afsökunar.

Fannar: Já, þetta er vont mál fyrir Möllerinn. Það gæti fylgt honum mjög lengi vissulega, enda beið hann alltof lengi með afsökunarbeiðnina. Mikið klúður í alla staði fyrir ráðherrann að ætla að hengja bakara fyrir smið og koma svo á hnjánum með afsökunarbeiðnina eftir allan þennan tíma.

mbk.