Valsmenn komnir með aðra höndina á bikarinn

Valsmenn eru með pálmann í höndunum í úrvalsdeildinni eftir glæsilegan sigur á lánlausum FH-ingum í Hafnarfirði í dag. Þeir þurfa nú að stóla á sigur í næsta leik til að hampa bikarnum, rétt eins og FH verður að stóla á að Valur misstígi sig. Valur hefur ekki staðið nær Íslandsmeistaratitlinum í tvo áratugi en liðið vann síðast árið 1987 í úrvalsdeildinni.

Það var greinilegt á öllu að Valur var hungraðra í sigur í dag og eðlilegt eftir að hafa svo lengi beðið eftir Íslandsmeistaratitlinum. FH hefur unnið titilinn þrjú ár í röð og sennilega hafa þeir verið rólegri fyrirfram, pressan var mun meira á þeim en Valsmönnum. Þetta var mjög skemmtilegur leikur, sennilega er þetta stórleikur sumarsins að óbreyttu. Valsmenn náðu þarna loksins að komast á toppinn og leiða nú slaginn. Það verður nýr kafli sem opnast fyrir félagið með sigri um næstu helgi og tryggja sér titilinn eftir langa hríð. FH á hvort sem er enn möguleika á bikarmeistaratitli í leik gegn væntanlegu úrvalsdeildarliði Fjölnis.

En það er líka spennandi að fylgjast með botninum. KR var hársbreidd frá því að sigra Fram og tryggja sér þar með nokkuð örugglega sæti áfram í úrvalsdeildinni. Með því að ná jafntefli á lokamínútum leiksins náðu Framarar að toga í KR og halda þeim áfram á sprengjusvæðinu. Fyrirfram verður þó staða Víkings að teljast afleit, en þeir eiga eftir leik gegn FH og þurfa að sigra Íslandsmeistarana til að halda sér uppi. Varla munu Hafnfirðingar verða áfjáðir í að tapa lokaleiknum og enda mörgum stigum undir Val og reyna að halda sér sem næst þeim.

En þetta var skemmtilegur dagur í boltanum. Valur er með örlög sín í höndunum, hafa aðra höndina á bikarnum og hafa frumkvæðið þegar að haldið er í lokaumferðina. Hvað varðar botninn er spennan þar enn yfir vötnum, þó sennilega telji flestir að Víkingar standi verst að vígi. Enn er spenna með toppinn og botninn og það er mjög gott.

Heilt yfir samfagna ég með Valsmönnum, enda er hungur þeirra í titil öllum ljós og nú er það þeirra sjálfra að láta draumana rætast vilji þeir ná takmarkinu mikla. Myndi sannarlega vel una þeim að vinna titilinn núna eftir langa bið.

Valur sigraði FH, 2:0, og fór á toppinn

Athugasemdir

[Hafrún Kristjánsdóttir, 23.9.2007 kl. 23:01]

Lánlausir FH-ingar???

[Stefán Friðrik Stefánsson, 23.9.2007 kl. 23:08]

Sveinn: Já, bið Valsara er orðin löng. Nú er það undir þeim sjálfum komið hvort þeir verði meistarar núna. Ef þeir ná þessu ekki úr þessu munu þeir sjálfir klikka því og vita því hvað verður sagt um þá flaski þeir á sigri í síðasta leiknum.

Habba: Lánlausir í dag alveg hiklaust. Þeir hefðu getað orðið meistarar í dag en í staðinn tapa þeir fyrir Val og þurfa að stóla á það að þeir klikki einhverju í síðustu umferðinni til að þeir eigi enn séns á dollunni. Ég myndi segja að það væri engin gleði í Hafnarfirðinum á þessum degi. En annars getur FH vel við unað hvernig sem fer. Þeir hafa unnið þrjú ár í röð og eiga enn góða möguleika á bikarmeistaratitlinum hvernig svo sem þetta fer í deildinni.

[Hafrún Kristjánsdóttir, 24.9.2007 kl. 00:54]

Þeir voru ekkert lánlausir.... bara ekki nógu góðir