Samstaða í Valhöll - Geir mætir á fund stjórnanna

Full samstaða virðist vera meðal sjálfstæðismanna í Reykjavík eftir fund stjórna flokksfélaga í Valhöll í kvöld. Geir H. Haarde, forsætisráðherra og formaður Sjálfstæðisflokksins, mætti sjálfur á fundinn til að tala máli Vilhjálms Þ. Vilhjálmssonar, leiðtoga borgarstjórnarflokksins og fyrrum borgarstjóra í Reykjavík, en mikið hefur verið talað um hversu veik staða hans er vegna atburðarásar þess að flokkurinn missti völdin eftir 16 mánaða forystu í Reykjavík.

Það er auðvitað fyrir öllu að flokksfélögin í borginni séu samstíga í verkum og litið verði fram á við í borgarmálunum en ekki aftur. Þetta er umfram allt mál sem verður að kryfja og fara yfir í innsta kjarna Sjálfstæðisflokksins til enda, þar má ekki láta neina lausa enda flækjast fyrir til lengri tíma litið. Þetta er sögulegt áfall fyrir flokkinn í borginni og í raun á landsvísu. Sjálfur hef ég talið þetta mesta áfall Sjálfstæðisflokksins frá endalokum þriggja flokka stjórnar Þorsteins Pálssonar fyrir tveim áratugum, mun verra áfall en sigur R-listans fyrir þrettán árum. Tel ég að flestir geti verið sammála um það mat innst inni.

Það er alveg ljóst að þetta mál er fyrst og fremst innsta kjarnans í höfuðborginni að vinna úr. Sá hópur verður að vega og meta hversu sterkur forystumaður Vilhjálmur Þ. Vilhjálmsson er eftir atburðarás síðustu 30 daga og taka að því loknu af skarið. Það er greinilegt að Geir hefur farið inn á fundinn með þann boðskap að standa beri vörð um Vilhjálm Þ. á þessum erfiðu tímum og virðist það vera niðurstaða fundarins. Það verður að ráðast svosem hverjir eftirmálar þess verði og hvort það verði niðurstaða sem teljist heilsteypt til lengri tíma litið.

Að mínu mati þarf fólk að vinna sig frá þessu erfiða máli og horfa fram á veginn með einum eða öðrum hætti. Það er mikilvægast að staða leiðtogans sé afdráttarlaus meðal flokksmanna, enginn vafi sé þar á málum. Það er alveg kristaltært að Vilhjálmur Þ. hefur veikst og hans bíður nú að vinna sér traust og kraft að nýju vilji hann halda áfram og telji formaður Sjálfstæðisflokksins það réttast í stöðunni eins og við blasir af innkomu hans á þennan fund lykiltrúnaðarmanna flokksins í borginni.

Það er langt í næstu borgarstjórnarkosningar - rúmir 30 mánuðir eru vissulega langur tími en þó ekki það langur að horfa verður fram til næstu kosninga. Í þeim efnum verður að hugleiða hvað sé best með heill og hag flokksins í huga. Leiðtoginn getur ekki verið laskaður á þeirri vegferð sem framundan er og mikilvægt að flokksmenn taki af skarið með hver sá leiðtogi eigi að vera.

Það dugar ekkert að klastra bara upp í sprungur með hagsmuni fárra einstaklinga í huga. Þar verður að hugsa um flokkinn og hvað getur styrkt hann mest og best.

Geir H. Haarde mætti á fund Sjálfstæðisfélaganna í Reykjavík

Athugasemdir

[Ásdís Sigurðardóttir, 18.10.2007 kl. 20:52]

Innlitskvitt frá fjöryrkja á hlaupum.

[Eggert Guðmundsson (IP-tala skráð) 18.10.2007 kl. 22:30]

Sammála Geir. Það er ekki hægt annað en að líta fram á við og læra af fortíðinni. En það má ekki gleyma öllum "prinsippum" í þeirri ferð. Sannleikann verður að leiða í ljós. Það verður að passa upp á öll "hrossakaup" og ekki gefa tommu eftir gagnvart sannleikanum, hvernig sem hann hljóðar.

[Steingrímur Jónsson (IP-tala skráð) 18.10.2007 kl. 23:02]

Dagurinn í dag er einhver sá sorglegasti í sögu lýðræðis á Íslandi.  Einhver stærsta einstaka stjórnmálafélag landsins heldur fund, á hann kemur formaður Flokksins og segir "svona á þetta að vera" og viti menn, niðurstaða fundarins er nákvæmlega eins og formaðurinn segir, en svo segja menn að nærvera formannsins hafi ekki haft nein áhrif!

Svo mætir formaðurinn í viðtal um kvöldið og aldrei nokkurn tíma hefur einn maður svarað jafn oft "að hann hefði ekki skoðun á málinu".  Þegar þáttarspyrjandi spyr hann þó aftur þá kemur í ljós að hann hafði skoðun - og það mátti þá hefja heila Júmbóflugvél á loft á snúningunum sem hann tók á málunum!

Jæja, þetta verður þá vonandi til þess að Sjálfstæðisflokknum verði gefin frí frá landsmálunum - það veitir ekki af því!

[Leifur Þorsteinsson, 18.10.2007 kl. 23:42]

Steingrímur Viltu heldur hafa púkana úr framsóknar

fjósinu eða tilbera frá samfylkingunar.

[Einar Jón, 19.10.2007 kl. 15:19]

Er ekki undarlegt að tala um samstöðu á fundi eins og þessum? Vissulega heyrðust engar óánægjuraddir, en enginn fékk að tala nema formaðurinn. Ég hélt að svona lagað gerðist bara í kommúnistaríkjum.

Og hvernig ætla menn að læra af fortíðinni ef menn neita að ræða hvað fór úrskeiðis?