Björn Ingi rannsakar sjálfan sig - óverjandi verklag

Það getur varla talist annað en algjörlega óverjandi verklag að Björn Ingi Hrafnsson sitji í starfshópi sem fara eigi yfir málefni Orkuveitunnar og REI. Þetta lyktar allt af því að sópa eigi málum undir teppi og grafa málið sem fyrst. Skipan starfsstjórnar í Orkuveitu Reykjavíkur er ennfremur sett fram með þeim hætti að fulltrúar meirihlutans verði tímabundið valdir og svo muni Björn Ingi snúa þar aftur við hlið Sigrúnar Elsu Smáradóttur.

Það virðist vera sem að pólitískt sjónarspil sé í gangi að hálfu vinstrimeirihlutans í Reykjavík í málefnum Orkuveitunnar. Það hlýtur að teljast súrsætur brandari fyrir borgarbúa að sá maður sem ber eina helstu ábyrgð á málum sé skipaður í starfshóp til að fara yfir verk síns sjálfs og dæma um hvort þau séu rétt eða röng. Sjálfstæðisflokkurinn tók ekki þátt í því verklagi sem vinstrimeirihlutinn stundar og hefur skipað Hönnu Birnu Kristjánsdóttur sem sinn fulltrúa í starfshópinn en ekki Vilhjálm Þ. Vilhjálmsson, fyrrum borgarstjóra.

Mér finnst upphaf þessa svokallaða starfshóps meirihlutans ekki lofa góðu um hvernig unnið verði á komandi vikum í að gera upp þetta grútskítuga spillingarmál sem ég tel málefni Orkuveitunnar og REI undanfarnar vikur vera í grunninn. Þar þarf allt upp á borðið og heiðarlega yfirferð á málum. Ekki finnst mér líklegt að sú verði raunin með Björn Inga Hrafnsson í broddi fylkingar að hálfu meirihlutans. Innkoma hans lyktar af allt öðru en siðbót eftir spillingarmálin sem hafa riðið yfir.

Tvær stjórnir - árekstur strax

Athugasemdir

[Gísli Bergsveinn Ívarsson, 19.10.2007 kl. 17:27]

Dagur sagði að nýr meirihluti myndi viðhafa fumlaus vinnubrögð.

Annaðhvort skilur hann ekki merkingu orðsins eða þá að þetta séu þau fumlausu vinnubrögð sem hann og nýr meirihluti ætli að vera með.

[Stefán Friðrik Stefánsson, 19.10.2007 kl. 17:37]

Slembinn: Björn Ingi situr sjálfur í starfshópi til að fara yfir mál sem fóru úrskeiðis á hans vakt. Það kalla ég að vera í broddi fylkingar og stend hiklaust við þau orð. Heldurðu virkilega að þessi starfshópur muni vinna gegn oddamanni meirihlutans sem í ofanálag situr í sjálfum starfshópnum? Þetta lyktar mjög illa, vægast sagt.

Gísli: Já, þetta er mjög undarleg byrjun. Þau ætla að sópa þessu undir teppið, þau ætla að hafa Binga góðan. Illa er komið fyrir henni Svandísi. Allt álit mitt á henni, sem var mikið, er við það að gufa upp. Finnst hún hafa gleypt völdin og sjálfa sig frekar ódýrt.

mbk.

[Áddni, 19.10.2007 kl. 18:21]

Mér rennur svo hugur að ekki hefðu verið slælegri vinnubrögð ef litlu tyrkirnir úr Valhöll hefðu verið í sömu stöðu! Ekki stóð fyrir þeim að fórna greyið Villa gamla á altari pólitíkur, og virðist nú vera að sá hildarleikur sé ekki búinn.

[Páll Jóhannesson, 19.10.2007 kl. 18:33]

Ég spyr mig oft þeirra spurninga - ef meirihluti sjálfstæðis og framsóknar hefði haldið, hvert framhaldið hefði orðið. Væru menn innan sjálfstæðisflokks tilbúnir að rannsaka eigin gerðir?