Glæsilegur sigur hjá Kimi Räikkönen

Eftir margra ára baráttu hefur Finnanum Kimi Räikkönen loks tekist að ná heimsmeistaratitlinum í Formúlunni. Hann stóð nærri titlinum fyrir þrem árum í harðri baráttu við Michael Schumacher og tekst nú að landa sigrinum í nafni Ferrari, gamla liðsins hans Schumachers. En tæpt stóð það vissulega. Fyrirfram töldu flestir að Bretanum Lewis Hamilton myndi takast að komast á spjöld sögunnar; vinna titilinn á fyrsta keppnisári og verða sá yngsti, 22 ára, í sögunni. Það tókst ekki vegna vandræðalegra mistaka kappans strax á fyrsta hring.

Flestir áttu síst von á að Raikkönen myndi ekki takast að landa sigrinum og þetta yrði einvígi "félaganna" hjá McLaren, Alonso og Hamilton. Þökk sé ómetanlegri aðstoð keppnisfélagans Felipe Massa og klúðri Hamiltons tekst Finnanum loksins að verða heimsmeistari, innan við áratug eftir að hinum finnska Mika Hakkinen tókst það tvisvar í nafni McLaren. Þó að Lewis Hamilton nagi sig eflaust í handarbökin fyrir að takast að klúðra því að ná titlinum þrátt fyrir góða stöðu fyrir lokaumferðirnar tvær má hann vel við una.

Fyrirfram má gefa sér það að Lewis Hamilton verði einn hinna stóru á komandi árum. Árangur hans hefur verið vægast sagt ævintýralega góður. Strax á fyrsta ári hefur hann stimplað sig inn sem meistaraefni og tókst að skáka tvöföldum heimsmeistara, Fernando Alonso, innan McLaren-liðsins. Eflaust vildi Alonso verða meistari liðsins og drottna yfir hinum unga, verða lærifaðir hans. Fyrirfram bjuggust allir við því. En niðurstaðan varð sú að hinn 22 ára nýliði tók meistarann í bakaríið og trompaði hann gjörsamlega. Það hefur lítið farið fyrir samvinnu þeirra á milli eftir því sem leið á mótið og undir lokin beinlínis hatur milli kappanna.

Nú hefur Formúlan sagt sitt síðasta hjá Ríkissjónvarpinu. Það verður áhugavert að sjá hvort að Gunnlaugur Rögnvaldsson, sem er óneitanlega maðurinn sem hefur verið í fararbroddi umfjöllunar í Formúlu í sjónvarpi hér heima síðasta áratuginn, muni stýra umfjöllun hennar á Sýn næsta keppnisárið. 

Räikkönen heimsmeistari

Athugasemdir

[Ólafur Hannesson (IP-tala skráð) 21.10.2007 kl. 19:00]

Ég var nú virkilega að vona að við myndum sjá nýliðann vinna. Og einnig þann yngsta. Það hefði verið sérstakt. En í staðin fengum við það sama og við fáum alltaf, ekkert sérstakt.

mbk

Óli

[Stefán Friðrik Stefánsson, 21.10.2007 kl. 19:41]

Räikkönen á þetta vissulega skilið. Staðið nærri þessu áður en nær loks að landa titlinum. En það er auðvitað svolítið súrt að Hamilton tókst ekki að ná sigri á fyrsta móti og verða bæði fyrsti blökkumaðurinn og nýliðinn til að ná titlinum. Hann stóð grátlega nærri þessu, en það er skiljanlegt að hitinn hafi borið hann ofurliði. Það er oft sálfræðilega erfitt að ná að landa svona titli og pressan getur orðið nýliðum erfið. En ég held að það sé ekki langt í að hann nái titlinum. Enn hefur hann næstu tvö keppnisár til að verða yngsti heimsmeistari Formúlusögunnar.

mbk.