Reykingar eru og verða umdeildar

Það eru ekki nýjar fréttir að reykingar séu umdeildar. Þó hefur mórallinn í þessu snúist við eftir að reykingabannið tók gildi í sumar. Nú eru reykingamenn fúlir yfir að fá ekki að reykja inni á skemmtistöðum á meðan að þeir reyklausu geta hrósað sigri, eftir að ergjan hafði verið á hinn veginn. Persónulega fannst mér það mjög gott að geta farið út að skemmta mér án þess að finna fyrir reyknum. En eflaust eru reykingamenn ósáttir með sína stöðu.

Það hefur verið hasar víða vegna þessara nýju reykingalaga hefur maður heyrt. Komið hefur til handalögmála og eflaust er fréttin sem Mogginn vísar á ekkert einsdæmi í þessum efnum. Eðlilegast er að þeir sem vilja reykja fari þó út til að stunda þá iðju. Það er þeirra val að reykja. Þoldi lengi vel ekki reykingastybbuna á skemmtistöðum, á þeim sumum var þetta gjörsamlega óþolandi. Á sumum þolanlegt en varla meira. Það eru mannréttindi fyrir reykingamenn að fá að reykja vilji þeir gera það, en það á ekki að vera á kostnað þeirra sem reykja ekki.

Reykingalögin hafa verið umdeild. Sumir hafa misst spón úr aski sínum vegna þess að reyknum var úthýst en aðrir gleðjast. Held að kaffihúsið Bláa kannan hér á Akureyri hafi verið eitt það fyrsta sem úthýsti reyk, þar hefur verið reyklaust frá fyrsta degi. Það var lúxus að koma þar og losna við reykinn hér fyrir nokkrum árum meðan að reykingastybban var órjúfanlegur hluti hinna. Hef þó heyrt ótrúlega lítið talað um afleiðingar þessa reykingabanns. Þetta fór yfir ótrúlega ljúflega og ég held að flestir séu sáttir.

En auðvitað harma reykingamenn sinn hlut og gráta í hljóði örlög sín. Skiljanlega.

Sleginn í rot fyrir að reykja í dyragætt á krá

Athugasemdir

[Margrét (IP-tala skráð) 13.11.2007 kl. 09:18]

Hætta að reykja meðan stætt er. Svo er það fokdýrt,sá sem hefur ekki mikið á ennþá minna. Spara sér 25.000......kallinn,en mér er sagt að það sé hinn minnsti kostnaður,því spóla sælgæti og gos fylgi oftar en ekki með. Svo eru 110 úrræði í boði...................Muna eitt,þvo fötin sín og gluggatjöldin,lofta út,snúa húsgögnunum svo ekki sé setið í sama gamla reyk sætinu. Og hætta að blaðra í símann,þar fara einar 3 rettur á meðan.

Og eftir árið hefurðu 300.000 til að horfa á ( ég myndi kaupa mér evrur) 

[Þórður Gunnarsson, 13.11.2007 kl. 11:07]

Auðvitað er það val reykingamanna að nota tóbak. Hins vegar er það líka þitt val að sækja þá staði sem eru uppfullur reyks.

Ákvörðunin ætti að liggja hjá veitingamönnum - þeir eiga að ráða hvort þeir heimila reykingar á sínum eigin stað. Með reykingabanninu er vegið að eignaréttinum.

Talsmaður frelsis ætti að taka undir þetta sjónarmið. 

[Stefán Friðrik Stefánsson, 13.11.2007 kl. 11:35]

Þakka kommentin.

Hörður: Var að tala um veitingamennina sem gagnrýndu helst reykingabannið, ekki þá sem reykja. Þeir sem kvörtuðu mest yfir breytingunni voru veitingamenn. Annars verður þetta alltaf hitamál, báðir hópar vilja sitt frelsi og erfitt að samræma það.

Margrét: Nákvæmlega, góðar pælingar. :)

Þórður: Hef aldrei verið svosem sérstakur stuðningsmaður þessara frægu laga. Hef talið eðlilegt að hver skemmtistaður geti haft reykaðstöðu fyrir þá sem vilja reykja ef vilji er fyrir því. Geri engar athugasemdir með það. Þessi breyting er ekki þess eðlis að það hafi úrslitaáhrif á reykingamenn. Þeir sem vilja reykja halda því áfram sama hvaða boðum og bönnum líður.

mbk.

[Auðbergur Daníel Gíslason, 13.11.2007 kl. 14:11]

Ég leggst alfarið gegn reykingum. Amma mín fékk lungnakrabbamein árið 2004 vegna reykinga, og var hátt í hálft ár á sjúkrahúsi vegna þess. Hún hafði þó ekki reykt síðan ég var ungabarn. Þetta atvik tók þungt á alla í ættinni. Alltaf er ég sé einhvern reykja fyllist ég reiði, ekki endilega í garð reykingamannanna sjálfra heldur í garð fyrirtækjanna sem framleiða þessa líkkistunagla. Í skólanum í mínum er eitthvað um reykingar ungmenna og ég er virkilega reiður yfir því að margir unglingar byrji að reykja.

Ég hvet alla reykingamenn til að hætta reykingum.

Auðbergur D. Gíslason

14 ára Sjálfstæðismaður

[Stefán Friðrik Stefánsson, 13.11.2007 kl. 15:24]

Fínar pælingar Aubbi. Gott hjá þér að skrifa um þetta.

mbk.

[Óðinn, 14.11.2007 kl. 15:39]

Þetta er reyndar alveg leiðindamál, hvernig er hægt að réttlæta bann á iðju sem lögleg er á einkaeign annarra sem eru að jafnaði ekki á móti reykingum eða þeim sem reykja? Skil alveg rökin sem notuð eru - en valdbeitingin er hins vegar röng á alla vegu. Ríkið skal ekki útvega okkur tóbaki og banna okkur að nota það á einkaeign annarra aðila.

Aubbi, flott að heyra skoðanir fólks en mundu að ekki má fyllast reiði ef þú sérð mann gera / stunda eitthvað sem þú ert ekki sammála, það gerir líf þitt mjög strembið í framtíðinni ef þú kemst ekki af þeim vana. Leyfðu fólki að hafa sitt val svo lengi sem það er löglegt, ég er reykingamaður - ertu núna reiður?

;) 

[Stefán Friðrik Stefánsson, 14.11.2007 kl. 15:56]

Takk fyrir kommentið Óðinn. Þetta er vissulega leiðindamál. Hinsvegar finnst mér dapurlegt að ekki sé veitt undanþága í þessum margfrægu lögum fyrir skemmtistaði að útbúa reykingaaðstöðu fyrir þá sem reykja. Báðir hópar vilja frelsi en það á varla að þurfa að vera algjört frelsi annars hópsins. Það væri gott ef hægt væri að samhæfa þetta.

mbk.