Bandarískur kennari svaf hjá kærasta dótturinnar

Ekki er langt síðan að það komst í heimsfréttirnar að 25 ára stærðfræðikennari í Nebraska hefði átt í ástarsambandi við þrettán ára nemanda sinn og stungið af með honum yfir landamærin til Mexíkó. Síðan hafa komið upp tvö mál af svipuðum toga í Bandaríkjunum. Í hinu fyrra er reyndar um að ræða að kennari um þrítugt svaf margoft hjá kærasta dóttur sinnar, nemanda í skólanum, fjórtán ára strák. Það fylgdi reyndar sögunni að bæði dóttirinn og eiginmaðurinn hefðu ekki sagt skilið við hana þrátt fyrir að upp hefði komist um málið. Styðja þau við hana í yfirvofandi dómsmáli.

Í vikunni var svo í fréttunum að kennari í Tennessee hefði átt í ástarsambandi við þrettán ára nemanda sinn. Það var tekið meira að segja fram að kennarinn, Pamela Turner, hefði kennt líffræði í skólanum og verið gift körfuboltaþjálfara skólans sem hún starfaði í. Hún hefur nú verið kærð fyrir nauðgun, rétt eins og báðir fyrrnefndu kennararnir, enda eru allir strákarnir sem um ræðir innan við fjórtán ára aldur og þær innan við þrítugt.

Mál af þessum toga bera vitni talsverðu siðleysi í Bandaríkjunum. Það er auðvitað skuggalegt þegar að kennarar sofa hjá nemendum sínum og misnota það traust sem skólayfirvöld gefa þeim með starfi sínu. Það eru engar málsbætur með því að kennarar eigi í kynferðislegu sambandi við nemanda sína, sem hafa ekki náð lögaldri.

Það hefur reyndar fylgt sögunni í Bandaríkjunum að skv. könnunum telja margir Bandaríkjamenn eðlilegra að kvenkyns kennari sofi hjá nemanda en að karlkyns kennari geri slíkt hið sama. Á þessu á varla að vera nokkur munur og greinilegt að eitthvað stórlega vantar á siðferði þeirra sem starfa í bandarískum skólastofnunum.

Athugasemdir

[Kristján Emil Guðmundsson (IP-tala skráð) 16.11.2007 kl. 10:10]

Það eru nú til fjöldamörg dæmi á íslandi um ekkert ósvipaða hluti, ég er nú nokkuð viss um að það þætti ekki einu sinni fréttnæmt ef að 25 ára kona myndi sofa hjá 14 strák, enda er þetta lögleg hegðun á íslandi!

[Brjánn Guðjónsson (IP-tala skráð) 16.11.2007 kl. 11:21]

Maður hefur nú alveg heyrt af íslenskum dæmum, þar sem kennarar og nemendur skiptust á vessum. Annars tel ég fráleitt að ætla að kennarar séu öðruvísi, hvað þetta varðar, en annað fólk. Þeir eru vissulega innan um unglingana svo þeir eiga auðveldara með að gera svona, en t.d. vörubílstjórar eða læknaritarar.

[Stefán Friðrik Stefánsson, 16.11.2007 kl. 18:07]

Þakka kommentin.

Kristján: Það er ekkert eðlilegt við það að þrettán ára strákur sofi hjá kennaranum sínum eins og var í Nebraska. Mér finnst á mjög gráu svæði að svona gerist. Það er stóralvarlegt mál þegar að kennarar sofa hjá grunnskólanemendum. Fer ekki ofan af því. Held að allir foreldrar þrettán til fjórtán ára grunnskólabarna geti tekið undir það annars. Þetta er siðleysi af verstu sort. Hvaða dæmi frá Íslandi hefurðu um það að þrettán ára nemandi sofi hjá kennaranum sínum?

Brjánn: Það hafa alveg verið mál þar sem kennarar sofa hjá nemendum en það er þá mun frekar í framhaldsskólum, þar sem aldursmörkin líta öðruvísi út. En mér finnst þetta stóralvarlegt mál gerist þetta í grunnskóla. Held að allir geti tekið undir það.

mbk.