Auðmýkjandi ósigur - mikið verkefni framundan

Það var frekar dapurlegt að fylgjast með íslenska landsliðinu tapa með auðmýkjandi hætti í Danmörku í kvöld. Ekki er hægt að segja að liðið byrji glæsilega í fyrsta leiknum undir forystu Ólafs Jóhannessonar, landsliðsþjálfara, og við rennum illilega á rassinn í þessum riðli. Það var fyrirsjáanlegt eins og komið var málum.

Það er sannarlega mikið verkefni framundan við að byggja þetta lið upp og við verðum að trúa því að það sé ekki vonlaust verkefni. Lykilvandamál fjölmargra leikja í þjálfaratíð Eyjólfs Sverrissonar voru heldur betur til staðar í kvöld og það er greinilegt að ef Ólafur á að verða sigursæll þjálfari þarf hann að setja sitt mark á liðið og reyna að snúa gengi þess við heldur betur. Verk hans verða þó ekki dæmd í dag en nú gefst honum tækifæri til að reyna að bæta úr fyrir hin sönnu átök síðar meir.

Landsliðið sá aldrei til sólar í þessum leik. Það er vissulega eldskírn fyrir nýjan þjálfara að byrja á Parken, en engu að síður verðum við að trúa því að þetta tap verði sá rassskellur sem við þurfum til að rífa liðið upp úr drullunni. Það er það sem Ólafi Jóhannessyni er ætlað að gera fyrst og fremst, það var veganesti hans til verka frá Knattspyrnusambandi Íslands í upphafi. Það veltur á því hvort hann hafi traust áfram til verka.

En þetta er enginn dómsdagur fyrir Ólaf Jóhannesson og liðið. Þar þarf að leggjast í mikla heimavinnu við að endurheimta styrk og kraft til að sækja fram. Við verðum að trúa því á þessum botni íslenska landsliðsins geti leiðin aðeins legið upp á við.

Íslendingar sáu aldrei til sólar í 3:0-tapleik gegn Dönum

Athugasemdir

[Birkir (IP-tala skráð) 21.11.2007 kl. 22:18]

Sammála síðasta ræðumanni. Fólk verður bara að gera sig grein fyrir að við erum ekkert betri en þetta í fótbolta. Það virðist vera sama einkenni hjá íslendingum og það er hjá dönum hérna í dk. Danir halda að þeir séu með 10 bestu knattspyrnuþjóðum í heimi og ættu alltaf að vera á lokamóti. Því eru allir uppi á móti landsliðsþjálfaranum því hann gerir það ekki jafn gott og þegar danir voru með menn á borð við Laudrup, Laudrup og Schmeichel.

Þótt svo að það sé gott að vera með metnað, þá er bara ekki hægt að búast við meiru af landsliði frá svona lítilli þjóð eins og Íslandi.

[Stefán Friðrik Stefánsson, 21.11.2007 kl. 22:22]

Þetta er vissulega auðmýkjandi upphaf fyrir þjálfarann og hans menn. Við horfumst auðvitað bara í augu við það að við erum ekki að standa okkur vel, eins og ég sagði í pistlinum, og í þeim orðum felst viðurkenning þess að við séum í mjög vondum málum. Hef ekkert verið að skafa utan af því svosem, en vandinn er gríðarlegur. Þó að þetta tap sé vont kemur það ekki að óvörum.

mbk.

[Einó (IP-tala skráð) 21.11.2007 kl. 22:29]

Ég skil ekki hvernig það getur verið auðmýkjandi byrjun fyrir nýráðinn þjálfara íslenska landsliðsins að tapa á útivelli gegn Dönum.

Nei við erum ekki að standa okkur vel, líklega vegna þess að íslenskir knattspyrnumenn eru hreinlega ekki góðir í fótbolta. Höfum við einhvern tíma verið með frábært landslið? Jújú við höfum staðið í hárinu á þjóðum eins og Ítalíu og Frakklandi, en þau lið hafa líka átt slæman dag gegn Andorra og Möltu! 

Áður en við kennum þjálfaranum um þennan ,,auðmýkjandi" ósigur, ættum við að finna betri knattspyrnumenn í liðið.

[Stefán Friðrik Stefánsson, 21.11.2007 kl. 22:47]

Birkir: Ekki ætla ég að gera lítið úr Dönum, þeir eru með gott knattspyrnulið, sem hefur verið sigursælt og gert margt gott. Hvað okkur varðar er bara vinna framundan og ef menn taka hana ekki verðum við enn meira athlægi en við höfum verið. Tapið fyrir Liechtenstein var botninn, trúi og treysti því allavega að neðar verði ekki komist.

Einó: Ekki var þetta allavega styrkjandi tap fyrir þjálfarann, sem hafði sjálfur sagt að við ættum ekki að vera of hræddir við Dani. Hér heima gerði fólk sér væntingar um að liðið myndi hefja uppbyggingu á Parken. Það voru óraunhæfar kröfur.

Orðrétt sagði þjálfarinn aðspurður um hvort hann óttaðist danska liðið: "Nei ég geri það ekki. Ég geri þær kröfur að menn geti gengið stoltir af velli. Ég tel okkur eiga ágætis möguleika í þessum leik".

En þetta er bara langhlaup. Það eru erfiðir tímar í boltanum hérna heima, þetta hefur verið brösótt síðustu árin, vonandi tekst að snúa því við að einhverju marki. En við sáum aldrei til sólar í þessum leik og það er mikið uppbyggingarstarf framundan.

Arnþór: Það er erfitt að segja hvað sé viðunandi. Við höfum státað okkur af því að geta átt lið sem eigi einhverja möguleika. Það er afleitt að detta í það far að segja að við eigum að sætta okkur við 3-0 tap. Það er ekki ásættanlegt, sama hver í hlut á. En það er greinilega mjög flatt yfir liðinu og gríðarleg vinna framundan. Þetta lið er mjög illa statt.

mbk.

[Stefán Friðrik Stefánsson, 21.11.2007 kl. 23:21]

Það eru hæðir og lægðir í þessu eins og öllu öðru. Við áttum virkilega góð ár þegar að Guðjón þjálfaði liðið. Síðan hefur þetta verið upp og ofan. En kannski erum við bara slakir og málið leyst - allavega hefur þjálfarastaðan ekki beinlínis verið verndaðasta starf landsins. Það verður að ráðast. Nú tekur við vinnuferli hjá liðinu og það verður bara að bíða betri tíma að spá hvort við séum fastir í þessu hjólfari eður ei.

[Björn M. Jónasson (IP-tala skráð) 22.11.2007 kl. 10:52]

KSÍ og stjórn er búin að vera í Football manager upp á síðkastið, ungmennafélagsguttar í business.  Ég er ekki afturhaldskommatittur, en það er ekki aðalhlutverk KSÍ að græða peninga og skila vænlegum rekstarafgangi.  Þeirra hlutverk er að efla viðgang knattspyrnunnar og sparkvellirnir eru gott dæmi um það og að reka landslið OKKAR Íslendinga og að tryggja möguleika okkar á að fylgjast með því.  Daginn sem KSÍ valdi að takmarka aðgang landsmanna að karla knattspyrnulandsliðinu OKKAR með því að selja réttinn til að horfa á þessa hörmung í læstri dagskrá hætti þetta að vera landslið Íslendinga og varð knattspyrnulið KSÍ.  Mér er slétt sama um knattspyrnulið KSÍ, ég sakna landliðs Íslending.

[Stefán Friðrik Stefánsson, 23.11.2007 kl. 12:13]

Algjörlega sammála þér Björn. Tek undir hvert orð.

mbk.